প্ৰাক নিৰ্বাচনী হিংসা-প্ৰতিহিংসাৰে জৰ্জৰিত নগাঁও জিলাৰ ৮৮ নং চামগুৰি বিধানসভা সমষ্টিত বুধবাৰে প্ৰায় শান্তিপূৰ্ণভাৱেই সম্পন্ন হয় প্ৰথম পৰ্যায়ৰ পঞ্চায়ত নিৰ্বাচনৰ ভোটগ্ৰহণ।
সমষ্টিটোৰ ২৩টা গাঁও পঞ্চায়তত প্ৰায় শান্তিপূৰ্ণভাৱে ভোটদান প্ৰক্ৰিয়া সম্পন্ন হ’লেও কোনো কোনো পঞ্চায়তত বিজেপি আৰু কংগ্ৰেছ দলৰ কৰ্মী-সমৰ্থকৰ মাজত সংঘাট দেখিবলৈ পোৱা যায়।
জানিব পৰা মতে,আমবাগান জিলা পৰিষদৰ অন্তৰ্গত চাৰি নং ভগামুখত কংগ্ৰেছ কৰ্মী সমৰ্থকে বিজেপিৰ দলীয় সমৰ্থক চুদাম শ্বাহ (৫৭) আৰু এচিন আলি (৪৭) ক শাৰীৰিক প্ৰহাৰ কৰাৰ ফলত দুয়োজন গুৰুতৰভাৱে আহত হয়। পৰৱৰ্তী সময়ত দুয়োগৰাকীকে প্ৰশাসনে চিকিৎসাৰ ব্যৱস্থা কৰে।
আনহাতে, ৭ নং ভগামুখটো নিৰ্বাচনকেন্দ্ৰিক হুলস্থুলীয়া পৰিৱেশৰ সৃষ্টি হয়। ঠিক তেনেদৰে চাৰি নং ভূৰবন্ধাটো ৰেগিঙৰ আশ্ৰয় লোৱা বুলি বিজেপি কৰ্মীয়ে অভিযোগ কৰিছে। প্ৰাপ্ত অভিযোগ মতে, চেক্টৰৰ দায়িত্বত থকা আৰক্ষীৰ সহকাৰী পৰিদৰ্শক জনৈক ইছলামৰ দুৰ্বলতাৰ ফলতেই শান্তিপূৰ্ণ ভোটগ্ৰহণ প্ৰক্ৰিয়াত ব্যাঘাট জন্মে।
আনহাতে, পেনাইতো এক মাৰপিটৰ ঘটনা সংঘটিত হয় যদিও নিৰাপত্তাৰক্ষী আৰু স্থানীয় লোকৰ তৎপৰতাত পাছত সমষ্টিটোত শান্তিপূৰ্ণভাৱে ভোটগ্ৰহণ সমাপ্ত হয় ৷
উল্লেখ্য যে চামগুৰি সমষ্টিৰ চাৰিটা জিলা পৰিষদ ক্ৰমে চামগুৰি, বাজিয়াগাঁও, শিঙিমাৰী আৰু আমবাগানৰ অন্তৰ্গত মুুুঠ ২৩টা গাঁও পঞ্চায়তত সমষ্টিটোৰ প্ৰায় ১৪৯৮৩৩ গৰাকী ভোটাৰে নিজ পচন্দৰ প্ৰাৰ্থীসকলক বিজয়ী কৰাবলৈ ভোট প্ৰদান কৰা পৰিলক্ষিত হয়।
স্মৰ্তব্য যে, সমষ্টিটোৰ অন্তৰ্গত মিকিৰহাট ভোটগ্ৰহণ কেন্দ্ৰকে প্ৰমুখ্য কৰি বহু কেন্দ্ৰত পূৰ্বে ভোট দান কৰা লোকৰ নাম ভোটাৰ তালিকাত সন্নিৱিষ্ট নোহোৱাত ভোটদানৰ বঞ্চিত হয় যাৰ বাবে উক্ত লোকসকল ক্ষুভিত হৈ পৰে।
