থানে জিলাত এক ভয়ংকৰ চিকিৎসা গাফিলতিৰ ঘটনা পোহৰলৈ আহিছে। কল্যাণ-ডম্বিৱলী অঞ্চলৰ এখন চৰকাৰী চিকিৎসালয়ত ঋতুস্ৰাৱজনিত সমস্যাৰ বাবে ভৰ্তি হোৱা এগৰাকী ১৭ বছৰীয়া কিশোৰীক পৰিয়ালৰ সন্মতি অবিহনে গৰ্ভধাৰণৰ পৰীক্ষা কৰোৱা হয় আৰু চিকিৎসকে তাইক গৰ্ভৱতী বুলি এক ভুৱা ৰিপ’ৰ্ট প্ৰদান কৰে।
জানিব পৰা মতে, কিশোৰীগৰাকীক শেহতীয়াকৈ কল্যাণ-ডম্বিৱলীৰ শাস্ত্ৰী নগৰ চিকিৎসালয়ত ভৰ্তি কৰোৱা হৈছিল। তাত চিকিৎসকে তাইক একেৰাহে তিনিবাৰকৈ গৰ্ভধাৰণৰ পৰীক্ষা কৰায় আৰু পৰিয়ালক জনায় যে কিশোৰীগৰাকীৰ ৰিপ’ৰ্ট পজিটিভ আহিছে। এই কথাত পৰিয়ালৰ লোকসকল আতংকিত হৈ পৰে আৰু লগে লগে তাইক আন এখন ব্যক্তিগত চিকিৎসালয়লৈ লৈ যায়।
ব্যক্তিগত চিকিৎসালয়খনত পুনৰ পৰীক্ষা কৰাৰ পিছত ফলাফল ঋণাত্মক ওলায়, অৰ্থাৎ কিশোৰীগৰাকী গৰ্ভৱতী নহয় বুলি প্ৰমাণিত হয়। ইয়াৰ পিছতে চৰকাৰী চিকিৎসালয়খনৰ চিকিৎসা পদ্ধতি আৰু পৰীক্ষাক লৈ তীব্ৰ প্ৰশ্নৰ সৃষ্টি হৈছে। ব্যক্তিগত চিকিৎসালয়খনৰ চিকিৎসকে কিশোৰীগৰাকীৰ প্ৰকৃত ঋতুস্ৰাৱৰ সমস্যাটোৰ চিকিৎসা কৰে আৰু ঔষধ দি কিছু সময়ৰ পিছতে ঘৰলৈ যাবলৈ দিয়ে।
এই সমগ্ৰ ঘটনাক লৈ শাস্ত্ৰী নগৰ চিকিৎসালয়ৰ চিকিৎসকসকলৰ দায়িত্বহীনতাৰ ওপৰত তীব্ৰ প্ৰতিক্ৰিয়াৰ সৃষ্টি হৈছে। দোষীৰ বিৰুদ্ধে কঠোৰ ব্যৱস্থা গ্ৰহণ কৰাৰ লগতে গোচৰ ৰুজু কৰাৰ দাবী উত্থাপন হৈছে। শেহতীয়াকৈ এখন স্থায়ী সমিতিৰ বৈঠকত এই বিষয়টো উত্থাপন কৰা হয়, যাৰ পিছত পৌৰ আয়ুক্তই সমগ্ৰ ঘটনাটোৰ এক উচিত তদন্তৰ নিৰ্দেশ দিছে। বিষয়াসকলে জনোৱা মতে, কি পৰিস্থিতিত কিশোৰীগৰাকীৰ সন্মতি অবিহনে এই পৰীক্ষাসমূহ কৰা হৈছিল, সেয়া তদন্তৰ শেষতহে পোহৰলৈ আহিব।
