দেওবাৰে ছৌডি আৰৱৰ ৰাছ তানুৰা তৈল শোধনাগাৰত ছৌডিৰ আগশাৰীৰ তৈল প্ৰতিষ্ঠান এৰামকোৰ এখন হেলিকপ্টাৰ দুৰ্ঘটনাগ্ৰস্ত হোৱাৰ ফলত ইয়াত থকা চৈধ্যজন লোকৰ কৰুণ মৃত্যু ঘটে। ছৌডি ৰাষ্ট্ৰীয় সংবাদ সংস্থাই প্ৰকাশ কৰা অনুসৰি, হৰমুজ প্ৰণালীৰ উপকূলত অৱস্থিত ৰাছ তানুৰাত সংঘটিত এই ভয়ংকৰ দুৰ্ঘটনাত প্ৰাণ হেৰুওৱা আটাইকেইজন লোক ছৌডি আৰৱৰ নাগৰিক আছিল।
দুৰ্ঘটনাটোৰ প্ৰকৃত কাৰণ এতিয়ালৈকে জানিব পৰা হোৱা নাই যদিও কৰ্তৃপক্ষই ইয়াৰ কাৰণ উদ্ঘাটন কৰিবলৈ ইতিমধ্যে এক বিস্তৃত তদন্ত আৰম্ভ কৰিছে। এই সন্দৰ্ভত ৰাষ্ট্ৰীয় সংবাদ সংস্থাটোৱে এক বিবৃতিত প্ৰকাশ কৰিছে যে হেলিকপ্টাৰ দুৰ্ঘটনাটোৰ কাৰণ নিৰ্ধাৰণ কৰিবলৈ সংশ্লিষ্ট কৰ্তৃপক্ষৰ অংশগ্ৰহণেৰে তদন্ত প্ৰক্ৰিয়া অব্যাহত ৰখা হৈছে।
উল্লেখযোগ্য যে, মধ্যপ্ৰাচ্যত আমেৰিকা যুক্তৰাষ্ট্ৰ, ইজৰাইল আৰু ইৰাণৰ মাজত চলি থকা যুদ্ধৰ বাবে প্ৰায় চাৰি মাহ ধৰি বন্ধ হৈ থকাৰ পাছত এৰামকোৱে যোৱা শুকুৰবাৰে উপসাগৰীয় অঞ্চলৰ গুৰুত্বপূৰ্ণ ৰাছ তানুৰা টাৰ্মিনেলত পুনৰ খাৰুৱা তেলৰ লোডিং আৰম্ভ কৰিছিল।
বিশ্বৰ সৰ্ববৃহৎ তেল ৰপ্তানিকাৰী দেশ ছৌডি আৰৱে শেহতীয়াকৈ আমেৰিকা যুক্তৰাষ্ট্ৰ আৰু ইৰাণৰ মাজত যুদ্ধ বন্ধ কৰাৰ এক অন্তৱৰ্তীকালীন চুক্তিৰ পূৰ্বে মধ্যপ্ৰাচ্যৰ উৎপাদকসকলে তেল আৰু গেছৰ উৎপাদন আৰু ৰপ্তানি বৃদ্ধি কৰাৰ পাছতেই কাৰ্গ‘ স্থানান্তৰ কৰাৰ তীব্ৰ প্ৰতিযোগিতাত লিপ্ত হৈছিল। বৰ্তমান সংশ্লিষ্ট কৰ্তৃপক্ষৰ দ্বাৰা চলি থকা তদন্তৰ অন্ততহে হেলিকপ্টাৰখন দুৰ্ঘটনাগ্ৰস্ত হোৱাৰ প্ৰকৃত কাৰণ পোহৰলৈ আহিব বুলি প্ৰশাসনে জানিবলৈ দিছে।
