দীৰ্ঘদিন ধৰি বলীউডত অভিনয়ৰ দক্ষতাৰ বাবে সুকীয়া পৰিচয় গঢ়ি তুলিছে সৌৰভ শুক্লাই। বিভিন্ন চৰিত্ৰত অভিনয় কৰি তেওঁ দৰ্শকৰ হৃদয়ত স্থান দখল কৰিছে। বহু বছৰ অভিনয়ৰ অন্তত অভিনেতাগৰাকীয়ে এতিয়া নতুন পথত খোজ দিয়াৰ ইচ্ছা প্ৰকাশ কৰিছে।
শেহতীয়াকৈ তেওঁৰ আগন্তুক ছবি ‘কিং’ৰ শ্বুটিং সম্পূৰ্ণ কৰিছে। কিন্তু এই ছবিখন সম্পূৰ্ণ হোৱাৰ পিছত সৌৰভে কেৱল অভিনয়তে সীমাবদ্ধ থাকিব নিবিচাৰে। বৰঞ্চ এতিয়া তেওঁ কেমেৰাৰ আঁৰৰ পৰা নিজৰ চিন্তা আৰু কাহিনী উপস্থাপন কৰাত অধিক মনোনিৱেশ কৰিব বিচাৰিছে। সেয়েহে অভিনেতাজনে কয় যে ‘কিং’ৰ কাম সম্পূৰ্ণ কৰাৰ পিছত তেওঁৰ পৰিচালনাত নিৰ্মাণ হৈ থকা ছবিখনৰ কামত ব্যস্ত হৈ পৰিব।
নিয়মীয়া ছবি বা ধাৰাবাহিকত অভিনয় কৰিলে স্বাভাৱিকতে আৰ্থিক অৱস্থা স্বচ্ছল থাকে। ফলত অভিনয় কমাই দিলে সেইটোও প্ৰভাৱিত হ’ব পাৰে। এই কথা স্বীকাৰ কৰি সৌৰভে কয় যে ইয়াৰ প্ৰভাৱ বিত্তীয় স্বচ্ছলতাৰ ওপৰত পৰিবই পাৰে। কিন্তু সৃষ্টিশীল ব্যক্তিৰ আভ্যন্তৰীণ হেঁপাহ কেতিয়াবা সকলোতকৈ ডাঙৰ হৈ পৰে। তেওঁৰ মতে অকল অভিনয়ে সেই সৃষ্টিশীল তৃষ্ণা পূৰণ নকৰে। সেয়ে তেওঁ নিজৰ চিন্তা আৰু কাহিনী দাঙি ধৰাৰ হেঁপাহৰ পৰাই এই সিদ্ধান্ত লৈছে।
ইতিমধ্যে সৌৰভে নিজৰ পৰিচালনাৰ কামত মনোনিৱেশ কৰিছে। প্ৰবীণ অভিনেতা পংকজ কাপুৰ আৰু জনপ্ৰিয় অভিনেত্ৰী ডিম্পল কাপাদিয়াক তেওঁৰ নতুন ছবিত গুৰুত্বপূৰ্ণ চৰিত্ৰত দেখা যাব। সৌৰভৰ মতে এই সিদ্ধান্ত বহুতৰে বাবে ভুল বা অবুদ্ধিমান যেন লাগিব পাৰে। কিন্তু একে সময়তে দুটা ঠাইত থকাটো সম্ভৱ নহয়, গতিকে এটা বাছি ল’ব লাগিব। অভিনেতাগৰাকীৰ বিশ্বাস যে পৰিচালনাৰ জৰিয়তে তেওঁ নিজৰ সৃষ্টিশীল ধাৰণাসমূহ অধিক গভীৰভাৱে প্ৰকাশ কৰাৰ সুযোগ পাব।
এই কাৰণেই সৌৰভ শুক্লাই এতিয়া অভিনয় নহয়, পৰিচালনাৰ ওপৰত সকলো মনোযোগ কেন্দ্ৰীভূত কৰিব বিচাৰিছে।
