আজি উচ্চতম ন্যায়ালয়ত এন আৰ চিৰ ক্ষেত্ৰত অতি গুৰুত্বপূৰ্ণ বিবেচিত এটা শুনানি হয়। বাদ পৰি ৰোৱা ৪০ লাখৰো অধিক লোকৰ দাবী-আপত্তিৰ ক্ষেত্ৰত পূৰ্বৰ ১৫বিধ নথি নে হাজেলাৰ প্ৰস্তাৱ অনুসৰি তাৰ মাজৰ ৫বিধ নথি বাদ দি ১০বিধক বৈধ নথি হিচাপে গণ্য কৰা হ’ব –এই মূল কথাটো আছিল আজিৰ শুনানিৰ গুৰুত্বপূৰ্ণ দিশ।
আজিৰ শুনানি লৈ মুখ্য ন্যায়াধীশ ৰঞ্জন গগৈ আৰু ন্যায়াধীশ ৰহিন্তন ফলি নৰিমানৰ দ্বাৰা গঠিত খণ্ড বিচাৰপীঠে নতুন নিৰ্দেশনা দিয়ে।
এই নতুন নিৰ্দেশনা মতে, এন আৰ চিৰ ৰাজ্যিক সমন্বয়ক প্রতীক হাজেলাক অসম চৰকাৰৰ বিষয়া তথা অধিবক্তা, কেন্দ্ৰীয় চৰকাৰৰ বিষয়া তথা অধিবক্তা, বিভিন্ন সংগঠনৰ নেতৃত্বক কিয় এই পাঁচটা নথি দাবী-আপত্তি পৰ্যায়ত ব্যৱহাৰ কৰিব নালাগে, সেই সম্পৰ্কে অহা ২৬ অক্টোবৰৰ ভিতৰত বিস্তাৰিতভাৱে জনাবলৈ কয়। উক্ত দিনা পাৱাৰ পইণ্ট প্ৰেজেণ্টেইশ্যন (Power Point Presentation)ৰ সহায়ত সকলো দিশ বুজাই দিবলৈ নিৰ্দেশ দিয়া হৈছে।
ইয়াৰ উপৰি গোচৰৰ প্ৰতিপক্ষ প্ৰতিটো সংগঠনক প্ৰতীক হাজেলাৰ প্ৰতিবেদন আৰু পাৱাৰ পইণ্ট প্ৰেজেণ্টেইশ্যন চাই ইয়াৰ ওপৰত নিজৰ নিজৰ স্থিতি তথা মত শপতনামা আকাৰে অহা ৩০ অক্টোবৰৰ ভিতৰত উচ্চতম ন্যায়ালয়ত দাখিল কৰিবলৈ আহ্বান জনায়।
উল্লেখযোগ্য যে অসমত চলি থকা এন আৰ চি উন্নীতকৰণ প্ৰক্ৰিয়াৰ ৰাজ্যিক সমন্বয়ক প্ৰতীক হাজেলাই যোৱা ২২ অক্টোবৰত পূৰ্বৰ ১৫বিধ নথিৰ মাজৰে ৫বিধ বৈধ নথি হিচাপে অগ্ৰাহ্য কৰিবলৈ দুখনকৈ গোপন প্ৰতিবেদন আদালতত দাখিল কৰিছিল।
ইফালে উচ্চতম ন্যায়ালয়ৰ সংশ্লিষ্ট বিচাৰপীঠে হাজেলাৰ দ্বিতীয় প্ৰতিবেদনখন কেন্দ্ৰীয় চৰকাৰ, ৰাজ্য চৰকাৰৰ লগতে প্ৰতিপক্ষ সকলো সংগঠনৰ অধিবক্তাক অহা দুদিনৰ ভিতৰত বিতৰণ কৰিবলৈ আদালতৰ পঞ্জীয়কক নিৰ্দেশনা প্ৰদান কৰিছে।
পাঁচটা লিগেচি নথি কিয় ব্যৱহাৰ কৰিবলৈ দিব লাগে সেই বিষয়ে কেন্দ্ৰীয় চৰকাৰৰ এটৰ্নি জেনেৰেল, ৰাজ্য চৰকাৰৰ অধিবক্তা, আমছু আৰু জমিয়তৰ অসম ৰাজ্যিক সমিতিৰ হৈ জ্যেষ্ঠ অধিবক্তা কপিল ছিব্বাল, ছলমান খুৰশ্বিদ, ইন্দিৰা জেইছিংয়ে যুক্তি আগ বঢ়াবলৈ চেষ্টা কৰোতে বিচাৰপীঠখনে অহা ১ নৱেম্বৰত এই বিষয়ত সকলো পক্ষৰে যুক্তি শুনিব বুলি সিদ্ধান্ত দিয়ে।
মন কৰিব লগীয়া যে আজি শুনানিৰ সময়ত কেন্দ্ৰ আৰু ৰাজ্য চৰকাৰৰ প্ৰতিনিধিক কঠোৰ বাক্য শুনায় বিচাৰপীঠখনে। ব্যক্তিৰ দৰে নহয়, চৰকাৰৰ দৰে আচৰণ কৰিবলৈ সকীয়াই দিয়ে চৰকাৰ দুখনক।
