আদালত অৱমাননাৰ অভিযোগত দোষী সাৱ্যস্ত হৈছে বিশিষ্ট আইনজ্ঞ অধিবক্তা প্ৰশান্ত ভূষণ।
শুকুৰবাৰে উচ্চতম ন্যায়ালয়ৰ ন্যায়াধীশ অৰুণ মিশ্ৰৰ নেতৃত্বৰ তিনি সদস্যৰ খণ্ড বিচাৰপীঠে এই কথা জনায়।
অৱশ্যে, প্ৰশান্ত ভূষণৰ শাস্তি কি হ’ব সেয়া আজি ঘোষণা কৰা নাই। অহা ২০ আগষ্টত তাৰ বাবে শুনানি হ’ব।
আদালত অৱমাননাৰ বাবে সৰ্বোচ্চ ছয় মাহৰ জেইল বা ২০ হাজাৰ টকাৰ জৰিমনা অথবা দুয়োটাই হ’ব পাৰে।
উল্লেখ্য যে যোৱা ২৭জুনত উচ্চতম ন্যায়ালয়ৰ বিৰুদ্ধে আৰু ২৯জুনত মুখ্য ন্যায়াধীশৰ বিৰুদ্ধে প্ৰশান্ত ভূষণে টুইট কৰিছিল।
ইয়াৰ পাছতে উচ্চতম ন্যায়ালয়ে তেওঁক যোৱা ২২জুলাইত জাননী দিয়ে।
প্ৰথমটো টুইটত প্ৰশান্ত ভূষণে অভিযোগ কৰিছিল যে গণতন্ত্ৰ ধ্বংস কৰাৰ ক্ষেত্ৰত উচ্চতম ন্যায়ালয় আৰু শেষৰজন প্ৰাক্তন ন্যায়াধীশৰ ডাঙৰ ভূমিকা আছে।
সেইদৰে, আনটো টুইটত মুখ্য ন্যায়াধীশ ব’বডেই কিয় এজন বিজেপি কৰ্মীৰ বিলাসী বাইক চলাইছে তাক লৈ তেওঁ অভিযোগ তুলিছিল।
আনহাতে, গোচৰ চলি থকাৰৰ সময়ত বিশিষ্ট আইনজীৱী প্ৰশান্ত ভূষণে উক্ত টুইটৰৰ বাবে ক্ষমা খুজিবলৈ সাজু হোৱা নাছিল। বৰঞ্চ তেওঁ ইয়াক তেওঁৰ সাংবিধানিক অধিকাৰৰ অংশ বুলিহে দাবী কৰিছিল।
তাৎপৰ্যপূৰ্ণভাৱে, প্ৰশান্ত ভূষণৰ বিৰুদ্ধে আন এটি আদালত অৱমাননাৰ গোচৰো চলি আছে। সেই একেইখন খণ্ড বিচাৰপীঠতে তাৰো শুনানি হ’ব।
উল্লেখ্য যে ২০০৯চনত এক সাক্ষাৎকাৰত তদানীত্বন মুখ্য ন্যায়াধীশক লৈ তেওঁ আপত্তিজনক মন্তব্য কৰিছিল যাৰ বাবে সেই গোচৰ তৰা হয়। অহা ১৭ আগষ্টত সেই গোচৰৰো শুনানি লোৱা হ’ব।
