ভাৰতীয় কুস্তি ফেডাৰেচনৰ মুৰব্বী তথা বিজেপিৰ সাংসদ ব্রিজভূষণ সিঙৰ বিৰুদ্ধে শীঘ্ৰেই যৌন নিৰ্যাতনৰ FIR ল’ব লাগিব৷ কমনৱেলথৰ পদক বিজয়ী ভিনেশ ফ’গাটকে ধৰি সাতগৰাকী মহিলা মল্লযুঁজাৰুৱে এই দাবীৰে উচ্চতম ন্যায়ালয়ৰ কাষ চাপিছিল। মঙলবাৰে উচ্চতম ন্যায়ালয়ে দিল্লী আৰক্ষীক এই বিষয়ত এফআইআৰ গ্ৰহণ কৰিবলৈ নিৰ্দেশ দিয়ে।
মল্লযুঁজাৰুসকলৰ গোচৰ মানি লৈ উচ্চতম ন্যায়ালয়ে এই বিষয়ত দিল্লী আৰক্ষীক জাননী জাৰি কৰে। মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বৰ এখন বিচাৰপীঠে কয়, ‘মল্লযুঁজাৰুসকলে অতি গুৰুতৰ অভিযোগ উত্থাপন কৰিছে। আন্তঃৰাষ্ট্ৰীয় মঞ্চত ভাৰতক প্ৰতিনিধিত্ব কৰা সকলে যৌন নিৰ্যাতনৰ অভিযোগ উত্থাপন কৰিছে। আদালতে বিষয়টো গুৰুত্বসহকাৰে চাব।’
লগতে জনোৱা হয় যে বন্ধ খামত উল্লেখ কৰা অভিযোগসমূহ আবেদনত তালিকাভুক্ত কৰা হ’ব। কিন্তু যিসকলে যৌন নিৰ্যাতনৰ অভিযোগ উত্থাপন কৰিছে, তেওঁলোকৰ নাম ৰাজহুৱা নকৰিবলৈ নিৰ্দেশ দিয়া হৈছে। ২৮ এপ্ৰিলত এই গোচৰৰ পৰৱৰ্তী শুনানি হ’ব।
আন্তঃৰাষ্ট্ৰীয় মল্লযুঁজত পদক লাভ কৰা মল্লযুঁজাৰুসকলৰ অবিৰত প্ৰতিবাদৰ বাবে সোমবাৰেই ভাৰতীয় মল্লযুঁজ ফেডাৰেচনৰ স্বচ্ছ নিৰ্বাচনৰ বাবে তদৰ্থ সমিতি গঠন কৰা হয়। ইয়াৰ উপৰিও ক্ৰীড়া মন্ত্ৰালয়ে ঘোষণা কৰে যে অহা ৭ মে’ত অনুষ্ঠিত হ’বলগীয়া ফেডাৰেচনৰ নিৰ্বাচনো বাতিল কৰা হৈছে।
লগতে পঢ়ক: পুনৰ মাজ আকাশত প্ৰস্ৰাৱ কাণ্ড! নিউয়র্কৰ পৰা দিল্লী অভিমুখী বিমানত যাত্রীৰ অভব্য আচৰণ
সোমবাৰে ক্ৰীড়া মন্ত্ৰালয়ে ভাৰতীয় অলিম্পিক সংস্থালৈ পত্ৰ লিখি এখন তদৰ্থ সমিতি গঠনৰ বাবে অনুৰোধ জনায়। তদুপৰি দায়িত্ব লোৱাৰ ৪৫ দিনৰ ভিতৰত ফেডাৰেচনৰ নিৰ্বাচন অনুষ্ঠিত কৰিবলৈও সমিতিক নিৰ্দেশ দিয়া হৈছে। অৰ্থাৎ এতিয়াৰ পৰা তদৰ্থ সমিতিখনে মল্লযুঁজ ফেডাৰেচনৰ সকলো কাম-কাজ চোৱাচিতা কৰিব। এইবাৰ উচ্চতম ন্যায়ালয়েও গুৰুত্বসহকাৰে বিষয়টোৰ ওপৰত দৃষ্টি দিছে।
