ৰাভা হাছং স্বায়ত্ব শাসিত পৰিষদৰ অধীনস্থ ৭নং দক্ষিণ দুধনৈ পৰিষদীয় সমষ্টিৰ লগতে মাজ-জাখিলী, বান্দৰ্শী আৰু ডিৰ্মা জাখিলী সমষ্টিৰ উচ্চতৰ মাধ্যমিক আৰু স্নাতক বৰ্ষৰ মুঠ ৭৬ গৰাকী কৃতী জনজাতি ছাত্ৰ-ছাত্ৰীক স্কলাৰশ্বিপৰ চেক প্ৰদান কৰা হয়।
সমষ্টিটোত এইবেলি হাইস্কুল শিক্ষান্ত পৰীক্ষাত উত্তীৰ্ণ ছাত্ৰ-ছাত্ৰী সকলক ৩,৫০০ টকা আৰু উচ্চতৰ মাধ্যমিক চূড়ান্ত পৰীক্ষাত উত্তীৰ্ণ ছাত্ৰ-ছাত্ৰীক ৪,০০০ টকা কৈ পৰিষদৰ জনজাতি কল্যাণ বিভাগৰ পৰা এই অনুদান আগবঢ়োৱা হৈছে৷
স্কলাৰশ্বিপ চেক বিতৰণ অনুষ্ঠানত ৰাভা হাছং পৰিষদৰ মুখ্য কাৰ্যবাহী সদস্য টংকেশ্বৰ ৰাভাই এই অনুদান আগবঢ়ায়৷
চেক প্ৰদান অনুষ্ঠানত ৰাভা হাছঙৰ মুৰব্বী গৰাকীয়ে কয়, “ৰাভা হাছঙৰ অধিকাংশ এলেকাই অনগ্ৰসৰ আৰু জীৱন-জীৱিকা নথকা এলেকা৷ এই এলেকাৰ জনজাতি ছাত্ৰ-ছাত্ৰী সকলৰ অধ্যয়ন কালত সুবিধা হোৱাকৈ এই নুন্যতম ধনৰাশি আগবঢ়োৱা হৈছে”৷
উল্লেখ্য যে পৰিষদীয় এলেকাৰ মুঠ ৩৬ টা সমষ্টিৰ এহেজাৰ (১০০০) জনজাতীয় দৰিদ্ৰ ছাত্ৰ-ছাত্ৰীক পৰিষদৰ জনজাতি কল্যাণ বিভাগৰ এই আঁচনিত সামৰি লোৱা হৈছে৷