অসমৰ ২য় খন চৰকাৰী স্কুল শিৱসাগৰ চৰকাৰী উচ্চতৰ মাধ্যমিক বহুমুখী বিদ্যালয়ত বৃহস্পতিবাৰে সংঘটিত হ’ল এক নজিৰবিহীন ঘটনা। পুৱা বিদ্যালয়ৰ পাঠদান আৰম্ভ হোৱাৰ প্ৰাকক্ষণত স্বয়ং বিদ্যালয়ৰ ছাত্ৰ একতা সভাৰ সাধাৰণ সম্পাদকে সামান্য কথাতে শিক্ষাগুৰু, বিদ্যালয় খনৰ অধ্যক্ষ ৰমেন শৰ্মাক শাৰীৰিকভাৱে প্ৰহাৰ কৰে।
ঘটনাৰ বিৱৰণী মতে পুৱা ৮. ৪৫ বজাত বিদ্যালয়ৰ পাঠদান আৰম্ভ হোৱাৰ পূৰ্বে অধ্যক্ষগৰাকীয়ে প্ৰতিটো শ্ৰেণীকোঠা পৰিদৰ্শন কৰিছিল। ঠিক তেনে সময়তে নৱম শ্ৰেণীৰ কোঠাৰ সন্মুখত এদল ছাত্ৰই হুলস্থূলীয়া পৰিৱেশ সৃষ্টি কৰা দেখি অধ্যক্ষজনে নিয়ন্ত্ৰণ কৰিবলৈ উক্ত স্থানত উপস্থিত হোৱাৰ পাছতেই দশম শ্ৰেণীৰ ছাত্ৰ তথা ছাত্ৰ একতা সভাৰ সাধাৰণ সম্পাদকজনে অধ্যক্ষক উদ্দেশ্যি কটু বাক্য নিক্ষেপ কৰে। অধ্যক্ষজনে “তুমি কি কৈছা” বুলি ছাত্ৰজনক প্ৰশ্ন কৰাত ছাত্ৰজনে অধ্যক্ষগৰাকীৰ মূৰত এটা প্ৰচণ্ড ঘোচা মাৰে।
ছাত্ৰজনে অতৰ্কিতে কৰা এই আক্ৰমণত অধ্যক্ষগৰাকীয়ে ভাৰসাম্য ৰক্ষা কৰিব নোৱাৰি বিদ্যালয়ৰ বাৰাণ্ডাত বাগৰি পৰে। লগে লগে আন ছাত্ৰই অভিযুক্ত ছাত্ৰজনক কৰায়ত্ব কৰে আৰু আৰক্ষীক খবৰ দিয়ে। পিছত আৰক্ষী আহি অধ্যক্ষ ৰমেন শৰ্মাক শিৱসাগৰ অসামৰিক চিকিৎসালয়লৈ চিকিৎসাৰ বাবে লৈ যায়।
ঘটনাৰ পিছতেই বিদ্যালয়ৰ শিক্ষক গোটে ক’লা বেজ পৰিধান কৰাৰ লগতে এখন জৰুৰী সভাৰ আয়োজন কৰে। বিদ্যালয়ৰ শিক্ষক গোটৰ সিদ্ধান্ত অনুসৰি অধ্যক্ষই অভিযুক্ত ছাত্ৰজনৰ বিৰুদ্ধে শিৱসাগৰ সদৰ থানাত এখন এজাহাৰ দাখিল কৰে। উক্ত এজাহাৰৰ ভিত্তিত আৰক্ষীয়ে ভাৰতীয় দণ্ডবিধি আইনৰ ৩২২ ধাৰাৰ অধীনত ১০২৮/১৮ নম্বৰত এটা গোচৰ ৰুজু কৰে।
বিয়লি দুই বজাত অধ্যক্ষ ৰমেন শৰ্মা চিকিৎসালয়ৰ পৰা বিদ্যালয়ত উপস্থিত হৈ তৎকালীনভাৱে বলবৎ হোৱাকৈ অভিযুক্ত ছাত্ৰদ্বয়ক বিদ্যালয়ৰ পৰা বহিষ্কাৰ কৰে।
উল্লেখ্য যে এই বিদ্যালয়ৰেই আনজন দশম শ্ৰেণীৰ ছাত্ৰই দুদিন পূৰ্বে নিজৰ ফে’চবুক একাউন্টৰ পৰা বিদ্যালয়ৰ শিক্ষাগুৰুক উদ্দেশ্যি অশ্লীল মন্তব্য কৰিছিল।
দুয়োজন ছাত্ৰক কঠোৰ শাস্তি প্ৰদান কৰিবলৈ শিক্ষক গোটৰ লগতে প্ৰাক্তন ছাত্ৰই অধ্যক্ষৰ ওচৰত দাবী উত্থাপন কৰিছে।
ঘটনাটো নিন্দা কৰি সতীৰ্থ মিলন ৯৭ৰ সভাপতি আটিশ গুপ্তা আৰু কোষাধ্যক্ষ শ্যামকানু বৰুৱাই অভিযুক্ত ছাত্ৰদ্বয়ক কঠোৰ শাস্তি প্ৰদানৰ দাবী কৰিছে।
