যোৱা কেইটামান দশক ধৰি বিজ্ঞানীসকলে “ৰঙা গ্ৰহ” নামেৰে জনাজাত মংগল গ্ৰহৰ ৰহস্য সমাধানত ব্যস্ত হৈ আছে। ইফালে এইবাৰ এটা ডাঙৰ আপডেট পোহৰলৈ আহিছে। নতুন গৱেষণাৰ মতে প্ৰতি বছৰে শ শ বাস্কেটবল আকাৰৰ মহাজাগতিক শিল মংগল গ্ৰহৰ লগত সংঘৰ্ষ হয়। এইবোৰৰ বাবেই মংগল গ্ৰহৰ পৃষ্ঠত বৃহৎ বৃহৎ গহ্বৰৰ সৃষ্টি হৈছে।
মংগল গ্ৰহত ভয়ংকৰ পৰিস্থিতি:
নাছাৰ এখন মিশ্যন প্লেনাৰে মংগল গ্ৰহত ভৱিষ্যত ৰোবোটিক মিশ্যন আৰু মহাকাশচাৰীসকলে ক’ত অৱতৰণ কৰিব লাগিব সেইটো নিৰ্ণয় কৰিবলৈ এক বাতিল মিশ্যনৰ তথ্য ব্যৱহাৰ কৰিছে। ই নাছাৰ ইনচাইট নামে পৰিচিত। ২০২২ চনৰ ডিচেম্বৰ মাহত এই অভিযান বাতিল কৰা হৈছিল। কিন্তু এই অভিযানে ইমানবোৰ তথ্য প্ৰদান কৰিছে, যিবোৰৰ ওপৰত এতিয়াও গৱেষণা চলি আছে।
মংগল গ্ৰহ সন্দৰ্ভত পোহৰলৈ আহিছে চাঞ্চল্যকৰ তথ্য:
মংগল গ্ৰহত শ শ ভূমিকম্পৰ জোখ-মাখ কৰা হৈছে। ইনচাইট অভিযানৰ লেণ্ডাৰখনে মংগল গ্ৰহত প্ৰথমটো ছিছমোমিটাৰ (ভূমিকম্প জোখা যন্ত্ৰ) কঢ়িয়াই নিছিল। এই সংবেদনশীল যন্ত্ৰটোৱে গ্ৰহটোৰ বিষুৱৰেখাৰ ঠিক উত্তৰত থকা মসৃণ সমভূমি এলিছিয়াম প্লেনিচিয়াত ইনচাইটৰ স্থানৰ পৰা হাজাৰ হাজাৰ মাইল দূৰত সংঘটিত হোৱা ভূমিকম্পীয় তৰংগ ধৰা পেলাবলৈ সক্ষম হৈছিল।
ইনচাইটে মংগল গ্ৰহত থকা নিজৰ ভূমিকম্পমাপক ব্যৱহাৰ কৰি ১৩০০ৰো অধিক ভূমিকম্প ধৰা পেলাইছিল। চাপ আৰু তাপৰ ফলত মংগল গ্ৰহৰ পৃষ্ঠত ফাট মেলাৰ ফলত এইবোৰ ঘটিছিল। ইফালে ইনচাইটে মংগল গ্ৰহত উল্কাপিণ্ডৰ প্ৰভাৱৰ প্ৰমাণো বন্দী কৰে।
নতুন গহ্বৰ আৱিষ্কাৰ:
২০২১ চনৰ পৰা বিজ্ঞানীসকলে ইনচাইটৰ তথ্যৰ গভীৰ অনুসন্ধান কৰি দেখিছে যে মহাজাগতিক শিলবোৰে মংগল গ্ৰহত পূৰ্বতে ভবাতকৈ অধিক সঘনাই খুন্দা মাৰিছে। শেহতীয়াকৈ ছায়েন্স এডভান্সেছ নামৰ আলোচনীখনত প্ৰকাশিত এক নতুন অধ্যয়নত এই কথা উল্লেখ কৰা হৈছে। ব্ৰাউন বিশ্ববিদ্যালয়ৰ পৃথিৱী, পৰিৱেশ আৰু গ্ৰহ বিজ্ঞানৰ সহযোগী অধ্যাপিকা তথা অধ্যয়নৰ মুখ্য লেখিকা ইংগ্ৰিড ডাউবাৰে কয় যে ‘’আমি ভবাতকৈ মংগল গ্ৰহ ভূতাত্ত্বিকভাৱে অধিক সক্ৰিয় হ’ব পাৰে। যিয়ে গ্ৰহটোৰ পৃষ্ঠৰ বয়স আৰু বিৱৰ্তনৰ পৰিৱৰ্তন প্ৰতিফলিত কৰিব পাৰে।”
প্ৰতি বছৰে বিপুল সংখ্যক মহাজাগতিক শিলে আঘাত কৰে:
ইফালে, নেচাৰ কমিউনিকেচন আলোচনীত প্ৰকাশিত এখন গৱেষণা পত্ৰই বাস্কেটবল আকাৰৰ উল্কাপিণ্ডই প্ৰায় প্ৰতিদিনে মংগল গ্ৰহত আঘাত কৰে নেকি সেইটো নিৰ্ণয় কৰিবলৈ ইনচাইটে লিপিবদ্ধ কৰা ভূমিকম্পীয় পৰিঘটনাসমূহো অন্বেষণ কৰিছে। এই অধ্যয়ন অনুসৰি প্ৰতি বছৰে ২৮০ৰ পৰা ৩৬০টা উল্কাপিণ্ড ৰঙা গ্ৰহত আঘাত কৰে, আৰু ইহঁতে ২৬ ফুট (৮ মিটাৰ)তকৈও ডাঙৰ গহ্বৰ এৰি যায়। ইফালে মাহত এবাৰ ৯৮ ফুট (৩০ মিটাৰ) বহল গহ্বৰ গঠন হয়।
ছুইজাৰলেণ্ডৰ ই টি এইচ জুৰিখৰ ভূমিকম্পবিজ্ঞান আৰু ভূ-গতিবিদ্যাৰ অধ্যাপিকা ড০ জেৰাল্ডিন জেনহাউজেনে এক বিবৃতিত কয় যে ‘’এই হাৰ কেৱল কক্ষপথৰ চিত্ৰৰ পৰা অনুমান কৰা সংখ্যাতকৈ প্ৰায় পাঁচগুণ বেছি আছিল।”
