ভাৰতীয় কৃষি বিজ্ঞানীসকলে এক ডাঙৰ সফলতা লাভ কৰিছে। প্ৰায় ২৩ বছৰৰ পৰিশ্ৰমৰ ফলত ইণ্ডিয়ান ইনষ্টিটিউট অব ভেজিটেবল ৰিচাৰ্ছৰ বিজ্ঞানী সকলে ভেন্দিৰ এটা নতুন প্ৰজাতি বিকশিত কৰিবলৈ সক্ষম হৈছে।
সচাৰচৰ দেখি অহা সেউজীয়া ৰঙৰ বিপৰীতে বিজ্ঞানী সকলে বিকশিত কৰা এই নতুন ভেন্দিবিধ হ’ব ৰঙা ৰঙৰ। সেয়ে এই ভেন্দিবিধৰ নাম ৰাখিছে ‘কাশি লালিমা’।
উত্তৰ প্ৰদেশৰ বাৰাণসীস্থিত ইণ্ডিয়ান ইনষ্টিটিউট অব ভেজিটেবল ৰিচাৰ্ছৰ শেহতীয়া এই সফলতা বিশেষভাৱে চৰ্চিত হোৱা পৰিলক্ষিত হৈছে।
বিজ্ঞানী সকলৰ মতে এই নতুন প্ৰজাতিৰ ভেন্দিবিধত এণ্টি অক্সিডেণ্ট, আইৰন আৰু কেলচিয়াম প্ৰচুৰ পৰিমানে পোৱা যাব। সাধাৰণ ভেন্দিৰ তুলনাত এই নতুন প্ৰজাতিৰ ভেন্দিবিধৰ দাম বেছি হ’ব বুলিও জানিবলৈ দিয়ে।
বিভিন্ন প্ৰকাৰৰ কাশি লালিমাৰ মূল্য প্ৰতি কিলোত ১০০ৰ পৰা ৫০০টকা পৰ্যন্ত হ’ব বুলি বিজ্ঞানীসকলে জনাইছে।
উল্লেখ্য যে ১৯৯৫-৯৬ চনতে ইণ্ডিয়ান ইনষ্টিটিউট অব ভেজিটেবল ৰিচাৰ্ছৰ কৃষি বিজ্ঞানী সকলে এই নতুন প্ৰজাতিৰ ভেন্দিবিধৰ বিকশিত কৰাৰ কামত জড়িত হৈ পৰিছিল।
পশ্চিমিয়া দেশ সমূহত প্ৰচুৰ পৰিমানে উৎপাদিত লাল ৰঙৰ ভেন্দিবিধৰ বীজ ডিচেম্বৰ মাহৰ পৰা ভাৰতৰ কৃষকসকলে লাভ কৰিব বুলি সংস্থাটোৱে জনায়।
