অসম আৰক্ষীৰ তদাৰকী তথা দুৰ্নীতি নিবাৰক শাখাই এগৰাকী ছাত্ৰীৰ মাৰ্কশ্বিটত নাম শুধৰাই দিয়াৰ নামত উৎকোচ গ্ৰহণ কৰাৰ অভিযোগত মাধ্যমিক শিক্ষা পৰিষদ(ছেবা)ৰ এগৰাকী বিষয়াক গ্ৰেপ্তাৰ কৰিছে।
আৰক্ষী সূত্ৰ মতে, ভিজিলেন্সে শুকুৰবাৰে ছেবাৰ সহকাৰী সচিব হেমন্ত ডেকাক উৎকোচ লোৱাৰ সময়ত হাতে-লোটে ধৰা পেলায়।
অভিযোগ অনুসৰি, ছেবাৰ বিষয়াগৰাকীয়ে শিৱ কুমাৰ ভুজেল নামৰ এগৰাকী ব্যক্তিৰ পৰা তেওঁৰ কন্যাৰ মেট্ৰিকৰ প্ৰমান পত্ৰৰ মাৰ্কশ্বিটৰ নামটো শুধৰাই দিয়াৰ বাবে ১০,০০০টকা দাবী কৰিছিল।
আনহাতে, ভুজেলে ভিজিলেন্স সঞ্চালকালয়ৰ এন্টি কৰাপশ্যন ব্যুৰোক অৱগত কৰি এখন অবিযোগ পত্ৰ দাখিল কৰে।
তেওঁ শুকুৰবাৰে উৎকোচৰ দিবলগীয়া টকাখিনি আদায় দিয়াৰ বাবে যায় আৰু ভিজিলেন্সৰ বিষয়াসকলে পৰিকল্পিতভাৱে জাল ৰচনা কৰি ৰাখে।
তাৰ পাছত উৎকোচ গ্ৰহণ কৰাৰ সময়তে গুৱাহাটীৰ ছেবাৰ কাৰ্যালয়ত ডেকাক হাতে-লোটে ধৰা পেলায়।
‘’অভিযান সফল হয় আৰু পৰিকল্পনা অনুসৰি আদায় দিবৰ বাবে ৰখা মুঠ ৮,০০০টকা অভিযুক্তৰ পৰা জব্দ কৰা হয়,’’-এগৰাকী জ্যেষ্ঠ আৰক্ষী বিষয়াই কয়।
