আজিৰে পৰা তৈল নগৰী দুলীয়াজানত আৰম্ভ হ’বলগীয়া দুদিনীয়া আৰক্ষী অধীক্ষকসকলৰ সন্মিলনত অংশগ্ৰহণৰ বাবে ৰাজ্যখনৰ মুখ্যমন্ত্ৰী হিমন্ত বিশ্ব শৰ্মা দেওবাৰেই আহি ইয়াত উপস্থিত হৈছে।
মুখ্যমন্ত্ৰীগৰাকীয়ে আজি পুৱা ৮ বজাত দুলীয়াজানৰ অইল হায়াৰছেকেণ্ডাৰী স্কুলত ১৫বছৰৰ পৰা ১৮ বছৰৰ ভিতৰৰ শিশুসকলক দিবলগীয়া কোভিড-১৯ টীকাকৰণ আনুষ্ঠানিকভাৱে শুভাৰম্ভ কৰে।
আৰক্ষী অধীক্ষকসকলৰ সন্মিলনত ৰাজ্যখনৰ ১২০গৰাকীতকৈয়ো অধিক বিষয়াই অংশগ্ৰহণ কৰিব। সন্মিলনত প্ৰধানকৈ ৰাজ্যখনৰ আইন-শৃংখলা পৰিস্থিতিৰ ওপৰত পৰ্যালোচনা কৰা হ’ব।
ইয়াৰ পূৰ্বে কাজিৰঙাত আৰক্ষী অধীক্ষকসকলৰ সন্মিলন অনুষ্ঠিত হৈছিল।
দুদিনীয়া আৰক্ষী অধীক্ষকসকলৰ সন্মিলনত অংশগ্ৰহণৰ বাবে ইতিমধ্যে শীৰ্ষ আৰক্ষী বিষয়াসকল আহি ডিব্ৰুগড়ত উপস্থিত হৈছে।
মুখ্যমন্ত্ৰী হিমন্ত বিশ্ব শৰ্মাই মুখ্যমন্ত্ৰী হিচাপে কাৰ্যভাৰ গ্ৰহণ কৰাৰ পাছত এইখন হৈছে দ্বিতীয়খন আৰক্ষী অধীক্ষক পৰ্যায়ৰ সন্মিলন।
