আজি ৰাতিপুৱাই দিল্লীৰ পৰা ডিব্ৰুগড় অভিমুখী দ্বিতীয়খন বিশেষ যাত্ৰীবাহী ৰেইল মৰিয়নীত উপস্থিত হয়। পুৱা প্ৰায় ৩.৩০ বজাত মৰিয়নী জংচনত উপস্থিত হয় ৰেইলখন৷
উজনিৰ ৩ খন জিলাৰ মুঠ ২৯ গৰাকী যাত্ৰী মৰিয়নী জংচনত নামে৷ গোলাঘাট জিলাৰ ১৫ গৰাকী, যোৰহাট জিলাৰ ১১ গৰাকী, শিৱসাগৰ জিলাৰ ৩ গৰাকী যাত্ৰী ৰেইলখনৰ পৰা নামে৷
পুৱাই মৰিয়নী জংচনত উপস্থিত থাকে জিলা প্ৰশাসন, আৰক্ষী প্ৰশাসন, চিকিৎসক, যোৰহাট চিকিৎসা মহাবিদ্যালয়ৰ পৰা যোৱা চিকিৎসা কৰ্মীৰ দল, ৰেইল বিভাগৰ বিষয়ববীয়াৰ লগতে ৰেইল আৰক্ষীৰ দল৷
যাত্ৰী সকলক মৰিয়নী জংচনৰ বাহিৰ ভাগত স্কেনিং কৰে স্বাস্থ্য বিভাগৰ তৰফৰ পৰা৷ স্কেনিঙৰ অন্তত জিলা দণ্ডাধীশ সকলে বাছযোগে নিজ নিজ জিলাৰ কোৱাৰেন্টাইন চেন্টাৰলৈ যাত্ৰী সকলক লৈ যায়৷
মৰিয়নী জংচনত ৰেইলৰ পৰা নমা কোনো যাত্ৰীৰ ক’ভিড সম্পৰ্কীয় কোনো লক্ষণ নাই বুলি জানিবলৈ দিয়ে স্বাস্থ্য কৰ্মী তথা চিকিৎকৰ তৰফৰ পৰা৷
মৰিয়নী জংচনত যাত্ৰী সকলক বিৰোধী দলৰ মৰিয়নীৰ বিধায়ক ৰূপজ্যোতি কুৰ্মী উপস্থিত থাকি আদৰণি জনায় আৰু পৰিস্থিতি তদাৰক কৰে l
বিধায়ক গৰাকীয়ে যাত্ৰী সকলৰ বাবে একাপ চাহ আৰু শিশু সকলৰ বাবে শিশু খাদ্যৰ যোগান ধৰিবলৈ প্ৰশাসনক অনুৰোধ কৰে।
