সন্ত্ৰাসমুক্তৰ পণ! ২০২২ বৰ্ষত জম্মু-কাশ্মীৰত ৯৩ টা এনকাউণ্টাৰত নিহত ১৭২ সন্ত্ৰাসবাদী

ভূ-স্বৰ্গ খ্যাত জম্মু-কাশ্মীৰক সন্ত্ৰাসবাদ মুক্ত কৰি তোলাৰ পণ লৈছে গৃহ মন্ত্ৰালয়ে। গৃহ মন্ত্ৰালয়ৰ এই লক্ষ্যক ৰূপায়িত কৰাৰ বাবে উপত্যটোত কঠোৰ হৈ পৰিছে নিৰাপত্তা বাহিনী। সন্ত্ৰাসবাদ নিৰ্মূলৰ লক্ষ্যৰে এই বৰ্ষত জম্মু-কাশ্মীৰত নিৰবিচ্ছিন্ন ৰূপত সন্ত্ৰাসবাদ বিৰোধী অভিযান চলায় নিৰাপত্তা বাহিনীয়ে।

আজি চলিত বৰ্ষৰ শেষৰ দিনটোত জম্মু-কাশ্মীৰ আৰক্ষীয়ে দাঙি ধৰিছে সন্ত্ৰাসবাদীৰ বিৰুদ্ধে এই বৰ্ষত সফলতাৰ তথ্য। আৰক্ষীৰ তথ্য অনুসৰি ২০২২ বৰ্ষত কাশ্মীৰত নিৰাপত্তা বাহিনীয়ে অঞ্চলটোত শান্তি নিশ্চিত কৰিবলৈ ৯৩ টা সফল এনকাউণ্টাৰ কৰি ৪২ বিদেশী সন্ত্ৰাসবাদীকে ধৰি মুঠ ১৭২ সন্ত্ৰাসবাদীক হত্যা কৰিছে।

কাশ্মীৰৰ অতিৰিক্ত আৰক্ষী সঞ্চালক প্ৰধানে সদৰী কৰা মতে নিহত প্ৰায় ১০৮ সন্ত্ৰাসবাদী মূলতঃ লস্কৰ-ই-তৈবা আৰু দ্য ৰেজিষ্টেন্স ফ্ৰণ্ট (TRF)ৰ সদস্য আছিল। আনহাতে জইছ-ঈ-মহম্মদৰ ৩৫ গৰাকী, হিজবুল-মুজাহিদিনৰ ২২ গৰাকী, আল-বদৰৰ ৪ গৰাকী আৰু আনছাৰ গাজৱাত-উলৰ-হিন্দৰ ৩ গৰাকী সদস্য এই বৰ্ষত নিৰাপত্তা বাহিনীৰ গুলীত নিহত হয় বুলি তেওঁ সদৰী কৰে।

আনহাতে আৰক্ষী বিষয়া গৰাকীৰ তথ্য মতে, এই বৰ্ষত সন্ত্ৰাসবাদী গোটত ১০০ সদস্যৰ নতুন নিযুক্তিৰ বাতৰি পোৱা গৈছিল। এই সংখ্যা যোৱা বছৰৰ তুলনাত ৩৭ শতাংশ হ্ৰাস পায় বুলি তেওঁ লগতে উল্লেখ কৰে। মুঠ নতুন নিযুক্তিৰ ভিতৰত ৬৫ সন্ত্ৰাসবাদীক গুলীয়াই হত্যা কৰা হৈছে, ১৭ গৰাকীক গ্ৰেপ্তাৰ কৰা হৈছে আৰু ১৮ গৰাকী এতিয়াও সক্ৰিয় হৈ আছে বুলি তেওঁ লগতে কয়।

উল্লেখ্য যে গৃহমন্ত্ৰী অমিত শ্বাহে চলিত সপ্তাহৰ আৰম্ভণিতে জম্মু-কাশ্মীৰৰ সাধাৰণ মানুহৰ মংগল সুনিশ্চিত কৰিবলৈ উপত্যকাটোত সন্ত্ৰাসবাদীক গতি প্ৰদান কৰা পৰিৱেশতন্ত্ৰ ভাঙি পেলোৱাৰ প্ৰয়োজন বুলি মন্তব্য কৰিছিল। সন্ত্ৰাসবাদৰ বিৰুদ্ধে শূন্য সহনশীল নীতি কঠোৰভাৱে মানি চলিবলৈও গৃহমন্ত্ৰী শ্বাহে বিষয়াসকলক নিৰ্দেশ দিছিল।