অসমত বিভাজন ঘটিব শাসকীয় ভাৰতীয় জনতা পাৰ্টিৰ! বিজেপিক বিভক্ত কৰি প্ৰাক্তন কেন্দ্ৰীয় মন্ত্ৰী তথা পুৰণি বিজেপি নেতা ৰাজেন গোহাঁইৰ নেতৃত্বত গঠন হ’ব পাৰে এক নতুন ৰাজনৈতিক দল। ডিমৌ সমষ্টিৰ বকতাৰ নেমুগুৰিত দলৰ পুৰণি কৰ্মীৰে অনুষ্ঠিত এক অনুষ্ঠান এই ইংগিত দিছে বৰ্তমান দলৰ মজিয়াত এলাগী জ্যেষ্ঠ নেতাগৰাকীয়ে।
অনুষ্ঠানত অংশ লৈ ৰাজেন গোহাঁইয়ে ভাৰাতীয়া নেতা লৈ বিজেপিয়ে মুখ্যমন্ত্ৰী পতা বুলিও মন্তব্য কৰে। তেওঁ বিজেপি দল গঠন কৰাত পালন কৰা ভূমিকাৰ বিষয়ে উল্লেখ কৰি বৰ্তমানৰ নেতৃত্বৰ বিৰুদ্ধে ক্ষোভ প্রকাশ কৰে।
অগপ-কংগ্ৰেছৰ পৰা অহা নেতাই বিজেপিত পুৰণি নেতা-কৰ্মীক এলাগী কৰি তোলা বুলি পুনৰ এবাৰ প্ৰকাশ কৰে গোহাঁইয়ে। মুখ্যমন্ত্ৰী হিমন্ত বিশ্ব শৰ্মাই ৫০ হাজাৰ কোটি টকা ঋণ লৈ নাটক বাজী কৰি ফুৰিছে আৰু অসমীয়াই ভিক্ষাৰীৰ দৰে অৰুণোদয়ৰ পিছে পিছে দৌৰি আছে বুলিও মন্তব্য কৰে প্ৰাক্তন কেন্দ্ৰীয় মন্ত্ৰী গৰাকীয়ে।
লগতে পঢ়কঃ নদীৰ সৈতে নদীৰ সংযোগ! পৰিৱেশবিদৰ সতৰ্কবাণীক আওকাণ কৰি মোদীৰ পদক্ষেপ
তেওঁ কেৱল মুখ্যমন্ত্ৰী ডঃ হিমন্ত বিশ্ব শৰ্মাকেই সমালোচনা কৰি ক্ষান্ত হোৱা নাই। প্ৰাক্তন মুখ্যমন্ত্ৰী সৰ্বানন্দ সোণোৱালকো সমালোচনা কৰে ৰাজেন গোহাঁয়ে। ইয়াৰ সমান্তৰালভাৱে গোহাঁয়ে আঞ্চলিক দলৰ প্ৰয়োজনীয়তাৰ কথা দোহাৰে।
তেওঁ কয়, সম্প্ৰতি অসমত অসম গণ পৰিষদ, অসম জাতীয় পৰিষদ, ৰাইজৰ দল আদি আঞ্চলিক দল আছে যদিও এই দলসমূহে অসমৰ সমগ্ৰ জনগণক আকৰ্ষণ কৰিব নোৱাৰে। আঞ্চলিক দলসমূহে কেৱল থলুৱা অসমীয়াক প্রতিনিধিত্ব কৰাৰ বিপৰীতে বঙালী, বিহাৰী, মাৰোৱাৰী আদি লোকক আকৰ্ষণ নকৰে আৰু তেওঁলোকক আঞ্চলিক দলৰ মজিয়ালৈ আনিবলৈ কোনেও চেষ্টা কৰা নাই বুলিও তেওঁ মন্তব্য কৰে।
ইয়াৰ বিপৰীতে ৰাষ্ট্ৰীয় দলসমূহে সদায় অসমীয়া, বিহাৰী, বঙালী আদিৰ মাজত সংঘাত বিচাৰে বুলি উল্লেখ কৰি তেওঁ কয় যে সকলো শ্ৰেণীৰ লোককে ৰাষ্ট্ৰীয় দলে আকৰ্ষণ কৰে। সেয়ে ৰাষ্ট্ৰীয় দলসমূহে ইয়াৰ সুযোগ গ্রহণ কৰি আছে।
লগতে পঢ়কঃ বিৰাট বিতৰ্ক! ছেম কনষ্টাসক খুন্দিয়াই বিপদত কোহলি; নিষেধাজ্ঞাৰ সন্মুখীন হ’ব পাৰে আইচিচিৰ!
প্রাক্তন কেন্দ্রীয় মন্ত্ৰীজনৰ মন্তব্য পাছতেই তেওঁৰ নেতৃত্বত আঞ্চলিক দল গঠনৰ সম্ভাৱনা প্ৰৱল হৈ পৰা বুলি ধাৰণা কৰা হৈছে। ইফালে এক সূত্ৰৰ মতে, একাংশ পুৰণি বিজেপি আৰু আৰএছএছৰ নেতা-কৰ্মীক লৈ ৰাজেন গোহাঁইৰ নেতৃত্বত এটা আঞ্চলিক দল গঠন কৰাৰ পূৰ্ণ যো-জা চলিছে। গোহাঁইৰ নেতৃত্বতে ‘সাৰ্বজনীন ঐক্যমঞ্চ’ নামৰ এটা আঞ্চলিক দল গঠন হোৱাৰ পূৰ্ণ সম্ভাৱনা আছে।
