বিতৰ্কই যেন লগ এৰিব বিচৰা নাই যোৱা ২৫ ডিচেম্বৰত প্ৰধান মন্ত্ৰী মোদীয়ে আনুষ্ঠানিকভাৱে মুকলি কৰা বগীবিল দলঙৰ। দলংখন মুকলি কৰাৰ পাছৰে পৰা বিভিন্ন ঘটনা সংঘটিত হৈ অহাৰ সময়তে ২ জানুৱাৰি অৰ্থাৎ বুধবাৰে দলংখনৰ নিচেই ওচৰতে ব্ৰহ্মপুত্ৰ নদীত এজন যুৱকৰ মৃতদেহ উদ্ধাৰ হোৱাক কেন্দ্ৰ কৰি পুনৰ তীব্ৰ চাঞ্চল্যৰ সৃষ্টি হয় সমগ্ৰ বগীবিল অঞ্চলতে।
উদ্ধাৰ হোৱা মৃতদেহটো লখিমপুৰ জিলাৰ ফনীন্দ্ৰ দেব পথৰ নিবাসী ড০ দেব কুমাৰ দেউৰী ভৰালীৰ পুত্ৰ গৌৰৱ কুমাৰ দেউৰী ভৰালী বুলি চিনাক্ত কৰা হৈছে।
আৰক্ষীয়ে ঘটনা সন্দৰ্ভত জানিবলৈ দিয়া অনুসৰি গৌৰৱে যোৱা ৩০ ডিচেম্বৰত বগীবিল দলং চাবলৈ আহিছিল আৰু তাৰ পাছত তেওঁ উত্তৰপাৰৰ ধেমাজি জিলাত অনুষ্ঠিত হৈ থকা বগীবিল উৎসৱলৈ গৈছিল। আৰু তাৰ পাছৰে পৰাই নিৰুদ্দেশ হৈ আছিল গৌৰৱ। গৌৰৱৰ কোনো শুসূত্ৰ নাপাই অৱশেষত যুৱকজন নিৰুদ্দেশ হোৱা বুলি বগীবিল আৰক্ষী চকীত এটা গোচৰ ৰুজু কৰিছিল।
‘বুধবাৰে ব্ৰহ্মপুত্ৰত ওপঙি থকা অৱস্থাত আমি উদ্ধাৰ কৰিবলৈ সক্ষম হও গৌৰৱৰ মৃতদেহ। মৃত্যুৰ কাৰণ এতিয়াও জানিব পৰা হোৱা নাই যদিও মৰণোত্তৰ পৰীক্ষাৰ বাবে মৃতদেহটো ডিব্ৰুগড় চিকিৎসা মহাবিদ্যালয়লৈ প্ৰেৰণ কৰা হৈছে’। এজন আৰক্ষী বিষয়াই এই কথা জনায়।
ইফালে বগীবিল দলং চাবলৈ আহি তিতাবৰৰ মুন্না ঠাকুৰ (৩০) নামৰ এজন যুৱকো যোৱা ২১ ডিচেম্বৰৰ পৰা সন্ধানহীন হৈ থকাত এতিয়া সমগ্ৰ ঘটনাটো ৰহস্যৰ আৱৰ্তত সোমাই পৰিছে। যুৱকজনে বছৰৰ শেষৰ দিনা ইমদাদ নামৰ এজন বন্ধুৰ সৈতে দলংখন চাবলৈ আহিছিল আৰু তেতিয়াৰ পৰাই নিৰুদ্দেশ হৈ আছে।
নিৰুদ্দেশ সন্দৰ্ভত এটা গোচৰ ৰুজু কৰা হৈছে যদিও আৰক্ষীয়ে এই পৰ্যন্ত যুৱকজনৰ কোনো সন্ধান উলিয়াব পৰা নাই।
উল্লেখ্য যে একেলগে দলং চাবলৈ যোৱা ইমদাদ নামৰ যুৱকজন ঘৰ আহি পালে যদিও তেওঁৰ সতীৰ্থ মুন্নাৰ কোনো খবৰ লাভ নকৰাত আৰক্ষীয়ে ঘটনা সন্দৰ্ভত ইমদাদক সোধা পোচা কৰে।
ইফালে আৰক্ষীয়ে জেৰাৰ সময়ত ইমদাদৰ ঘৰৰ পৰা মুন্নাৰ কিছু কাপোৰ উদ্ধাৰ হোৱাত সমগ্ৰ বিষয়টোৱে এক ৰহস্যৰ মাজলৈ ঠেলি দিছে।
ঘটনা সন্দৰ্ভত ইমদাদে জানিবলৈ দি কয়, ‘আমি দলং পৰিদৰ্শন কৰিবলৈ যাওতে মুন্নাই অত্যাধিক সুৰা সেৱন কৰি অনিয়ন্ত্ৰিত হৈ পৰিছিল। সেয়ে মই তাক এৰি ঘৰ গুচি আহিলো’।
ইফালে শোকত ভাগি পৰা মুন্নাৰ মাতৃয়ে কয় যে মই মুন্নাৰ মোবাইলত বহুবাৰ সংযোগ কৰাৰ চেষ্টা কৰিলো কিন্তু তাৰ মোবাইলটো চুইচট অফ দেখাই আছে। ‘মই এই বিষয়ে একো নাজানো, যিকোনো বিনিময়তে মই মোৰ ল’ৰা ঘৰলৈ উভটি অহাটো বিচাৰো’। এইদৰে শোকগ্ৰস্ত মাতৃয়ে আমাৰ আগত কয়।
