বঙাইগাঁও জিলাৰ অন্তৰ্গত গেৰুকাবাৰী আৰক্ষী পহৰা চকীৰ আৰক্ষীয়ে শেহতীয়াকৈ এডাল কেঁকো সাপসহ সাতজন ব্যক্তিক আটক কৰে ৷
এক নিৰ্ভৰযোগ্য সূত্ৰৰ পমখেদি গেৰুকাবাৰী আৰক্ষীয়ে আটক কৰা লোককেইজন হ’ল ধেমাজি জিলাৰ জোনাই থানাৰ অন্তৰ্গত ৩ নং ৰায়াঙৰ মামুন বৰগয়াৰী ( ৩২) , ওদালগুৰি জিলাৰ খৌৰাং আৰক্ষী থানাৰ অন্তৰ্গত ৰণেন্দ্ৰপুৰৰ শ্যাম পৰিয়াৰ (৩২), চিৰাং জিলাৰ ঢালিগাঁও থানাৰ অন্তৰ্গত উত্তৰ ৰৌমাৰীৰ চন্দন বড়ো (২৬ ), ঢালিগাঁও থানাৰ অন্তৰ্গত ছাতিপুৰৰ ৰমজান আলী (৫২), চিৰাঙৰ ৰুণীখাতা থানাৰ অন্তৰ্গত দেৱৰবিলৰ ৰহম আলী (৫৪), বিজনী থানাৰ অন্তৰ্গত এলেংমাৰীৰ তালেব আলী (৬১) আৰু বঙাইগাঁও জিলাৰ মাণিকপুৰ থানাৰ অন্তৰ্গত ১ নম্বৰ জামদহাৰ ছোহৰাব আলী(৫৬) ৷
আৰক্ষী সূত্ৰে প্ৰকাশ কৰা মতে ধেমাজিৰ জোনাই থানাৰ অন্তৰ্গত ৩ নম্বৰ ৰায়াঙৰ মামুন বৰগয়াৰীয়ে কেঁকো সাপডাল মিজোৰামৰ পৰা বিক্ৰীৰ বাবে আনিছিল ৷
আৰক্ষীয়ে অভিযুক্ত লোককেইজনৰ পৰা ৭ টা মোবাইল হেণ্ডছেট, এএছ ১৯ কে ০৭৪৪ আৰু এ এছ ২৬ ই ৪০৩০ নম্বৰৰ দুখন মটৰ চাইকেল আৰু নগদ ৪,০৭০ টকা জব্দ কৰিছে৷ জানিব পৰা মতে ব্যক্তিকেইজনে কেঁকো সাপডাল কেইবা লক্ষাধিক টকাত বিক্ৰী কৰাৰ বাবে আনিছিল যদিও আৰক্ষীয়ে খবৰ লাভ কৰি অসামৰিক পোচাকত উপস্থিত হৈ হাতে- লোটে আটক কৰে ৷ আটকাধীন লোক কেইজনক পিচত আৰক্ষীয়ে কেঁকো সাপসহ বন বিভাগৰ হাতত গতাই দিয়ে ৷