গুৱাহাটীৰ বামুণীমৈদাম অঞ্চলত বুধবাৰে পুৱা এক অতি ভয়ংকৰ তথা বিচলিত কৰা ঘটনা পোহৰলৈ আহিছে। মহানগৰীত হোৱা ধাৰাসাৰ বৰষুণৰ ফলত সৃষ্টি হোৱা কৃত্রিম বানপানীত মানুহৰ এটা কটা ভৰি উটি অহা প্ৰত্যক্ষ কৰা হয়। এই ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে। আজি পুৱাৰ ভাগত হোৱা বৰষুণৰ ফলত চহৰখনৰ বিভিন্ন প্ৰান্তৰ লগতে বামুণীমৈদামতো একাঁঠু পৰ্যন্ত পানী জমা হয় আৰু তাৰ মাজতেই এই মৃতদেহৰ অংশটো উপঙি থকা দেখা পোৱা যায়।
আজি পুৱাৰ পৰা হোৱা বৰষুণৰ ফলত গুৱাহাটীৰ বাট-পথসমূহ জলমগ্ন হৈ পৰাত যাতায়তৰ ক্ষেত্ৰত চৰম বিশৃংখলতাৰ সৃষ্টি হয়। বিশেষকৈ কাৰ্যালয়লৈ যোৱা সময়ছোৱাত বহু যান-বাহন পানীৰ মাজত আবদ্ধ হৈ পৰে। তেনে এক জটিল পৰিস্থিতিৰ মাজতে বানপানীৰ সোঁতত কটা ভৰিখন উটি অহা দেখি ৰাইজ আতংকিত হৈ পৰে। পানীত উটি অহা এই ভৰিখন কাৰ বা ক’ৰ পৰা আহি ইয়াত ওলালহি সেই বিষয়ে বৰ্তমানলৈকে কোনো স্পষ্ট তথ্য পোৱা হোৱা নাই।
ইতিমধ্যে স্থানীয় ৰাইজে এই বিষয়ে গুৱাহাটী আৰক্ষীক অৱগত কৰিছে। আৰক্ষীৰ দল ঘটনাস্থলীত উপস্থিত হৈ ঘটনাটোৰ তদন্ত আৰম্ভ কৰিছে। এই ভৰিখন কোনো দুৰ্ঘটনাৰ ফলত বিচ্ছিন্ন হোৱা নে ইয়াৰ আঁৰত কোনো অপৰাধজনিত ঘটনা জড়িত হৈ আছে সেইটো আৰক্ষীৰ অনুসন্ধানৰ পাছতহে স্পষ্ট হ’ব। বৰ্তমানলৈকে উদ্ধাৰ হোৱা এই মানুহৰ ভৰিখনৰ পৰিচয় উদ্ধাৰ কৰিব পৰা হোৱা নাই। এনে এক বিভীষিকাময় ঘটনাই বানপীড়িত মহানগৰীৰ জনসাধাৰণৰ মাজত অধিক ভীতিৰ সঞ্চাৰ কৰিছে।
