পূজা-পাঠ আৰু যজ্ঞ কৰিলে জীৱনৰ পৰা আঁতৰি যাব ‘ছয়তানৰ ক’লা ছাঁ’—এনে আশ্বাস দি কলকাতাৰ এগৰাকী যুৱতীক প্ৰতাৰণা কৰাৰ অভিযোগ উঠিছে মুৰ্শিদাবাদৰ এজন তান্ত্ৰিকৰ বিৰুদ্ধে। যজ্ঞ কৰাৰ সময়ত যুৱতীক কুপ্ৰস্তাৱ দিয়াৰ লগতে শ্লীলতাহানি কৰাৰ অভিযোগৰ পিছত, পাছত টোপনিৰ দৰৱ মিহলি কৰা প্ৰসাদ খুৱাই কেইবা লাখ টকাৰ সোণৰ অলংকাৰ আৰু ৩ লাখ ২৫ হাজাৰ টকা লৈ পলায়ন কৰাৰো অভিযোগ উত্থাপন হৈছে। এই কাণ্ডত তান্ত্ৰিকজনৰ লগত থকা এগৰাকী মহিলা আৰু এজন শিষ্য জড়িত থকাৰ অভিযোগো কৰিছে যুৱতীগৰাকীয়ে।
আৰক্ষীৰ তথ্য অনুসৰি, বেহালাৰ ৰাজা ৰামমোহন ৰায় ৰোডৰ বাসিন্দা যুৱতীগৰাকী পাৰিবাৰিক সমস্যাৰ বাবে মানসিকভাৱে হতাশ হৈ আছিল। সেই সময়তে চিনাকি সূত্ৰে তেওঁৰ পৰিচয় হয় মুৰ্শিদাবাদৰ বহৰমপুৰৰ কাশিমবাজাৰ অঞ্চলৰ এজন তান্ত্ৰিকৰ সৈতে। যুৱতীগৰাকীৰ সমস্যাৰ কথা শুনি তান্ত্ৰিকজনে তেওঁৰ জীৱনত ‘ছয়তানৰ ছাঁ’ পৰা বুলি দাবী কৰে। কেইবাবাৰো পূজা-পাঠ আৰু যজ্ঞ কৰিলে এই অশুভ প্ৰভাৱ আঁতৰিব বুলি কৈ তেওঁক বিশ্বাসত লয়।
তান্ত্ৰিকজনৰ কথাত বিশ্বাস কৰি যুৱতীগৰাকীয়ে নিজৰ ঘৰতে যজ্ঞৰ আয়োজন কৰে। অভিযোগ অনুসৰি, সোমনাথ নামৰ তান্ত্ৰিকজনে এগৰাকী মহিলা সহযোগী আৰু এজন শিষ্যক লগত লৈ যুৱতীগৰাকীৰ ঘৰত উপস্থিত হয়। যজ্ঞৰ সময়ত যুৱতীগৰাকীক কাষত বহুৱাই তান্ত্ৰিকজনে কুপ্ৰস্তাৱ দিয়াৰ লগতে শ্লীলতাহানি কৰে বুলি অভিযোগ উঠিছে।
ইয়াৰ পিছত পূজা-পাঠ আৰু যজ্ঞৰ বিভিন্ন খৰচৰ নামত যুৱতীগৰাকীৰ পৰা ৩ লাখ ২৯ হাজাৰ টকা লোৱা হয় বুলি অভিযোগ। কিন্তু তাতো শেষ নহ’ল বিপদ। ‘ছয়তানৰ ছাঁ’ এতিয়াও আঁতৰা নাই বুলি কৈ তান্ত্ৰিকজনে যজ্ঞ সম্পূৰ্ণ কৰিবলৈ সোণৰ প্ৰয়োজন বুলি দাবী কৰে। সেই অনুসৰি যুৱতীগৰাকীক ঘৰত থকা সকলো সোণৰ অলংকাৰ একেলগে সাজু কৰি ৰাখিবলৈ কোৱা হয়।
অভিযোগ অনুসৰি, যোৱা বছৰৰ নৱেম্বৰ মাহত পুনৰ সোমনাথ নামৰ তান্ত্ৰিকজন নিজৰ মহিলা সহযোগী আৰু শিষ্যসহ যুৱতীগৰাকীৰ ঘৰত উপস্থিত হয়। সেই সময়ত তেওঁলোকে যুৱতীগৰাকীক পূজাৰ প্ৰসাদ বুলি কিবা খুৱায়। সেই প্ৰসাদ গ্ৰহণ কৰাৰ কিছু সময়ৰ পিছতে যুৱতীগৰাকী অচেতন হৈ পৰে । সেই সুযোগতে তান্ত্ৰিকজন আৰু তেওঁৰ সহযোগী দুজনে যুৱতীগৰাকীৰ ঘৰৰ পৰা সকলো সোণৰ অলংকাৰ লৈ উধাও হয় বুলি অভিযোগ কৰা হৈছে।
পিছত চেতনা ঘূৰি অহাৰ পাছত যুৱতীগৰাকীয়ে তান্ত্ৰিকজনৰ সৈতে যোগাযোগ কৰি নিজৰ অলংকাৰ আৰু ধন ঘূৰাই বিচাৰে। কিন্তু তাৰ বিপৰীতে তেওঁক ভাবুকি দিয়াৰ লগতে শাৰীৰিকভাৱে নিগ্ৰহ কৰা হয় বুলিও অভিযোগ কৰিছে যুৱতীগৰাকীয়ে। কেইবামাহ ধৰি ধন আৰু অলংকাৰ ঘূৰাই পোৱাৰ চেষ্টা কৰিও কোনো সুফল নোপোৱাৰ পিছত অৱশেষত তেওঁ বেহালা থানাত তান্ত্ৰিকজন, তেওঁৰ মহিলা সহযোগী আৰু শিষ্যজনৰ বিৰুদ্ধে এজাহাৰ দাখিল কৰে।
এজাহাৰৰ ভিত্তিত আৰক্ষীয়ে তদন্ত আৰম্ভ কৰিছে। অভিযোগত নাম অহা তান্ত্ৰিকজন আৰু তেওঁৰ সহযোগী দুজনৰ সন্ধানত মুৰ্শিদাবাদত অনুসন্ধান চলোৱা হৈছে বুলি আৰক্ষীয়ে জানিবলৈ দিছে।
