চিকিৎসা কৰিবলৈ গৈ প্ৰেম আৰু তাৰ পিছত স্থাপন হ’ল শাৰীৰিক সম্পৰ্ক। পৰৱৰ্তী সময়ত দুয়োৰে সম্পৰ্কত তিক্ততা অহাত ৰোগীক দিনে দিনে নিচাজাতীয় ঔষধ খুৱাবলৈ আৰম্ভ কৰিলে এগৰাকী ভাৰতীয় মূলৰ চিকিৎসকে। ইংলেণ্ডত সংঘটিত হৈছে এই ভয়ংকৰ কাণ্ড। প্ৰায় এবছৰ ধৰি চলি থকা এই অপকৰ্ম পোহৰলৈ অহাৰ পিছত সমগ্ৰ ব্ৰিটেইনত তীব্ৰ চাঞ্চল্যৰ সৃষ্টি হৈছে।
অভিযুক্ত চিকিৎসকগৰাকীৰ নাম চিৰাগ পেটেল। তেওঁ ২০১৮ চনৰ পৰা ৱেলছৰ কাৰ্ডিফ ইউনিভাৰ্চিটি হাস্পতালত নিউৰ’চাৰ্জন হিচাপে কৰ্মৰত আছিল। ২০১৯ চনত এগৰাকী মহিলাই তাত চিকিৎসাৰ বাবে গৈছিল। মহিলাগৰাকীৰ মেৰুদণ্ডৰ কিছু অংশ বেয়া হৈ গৈছিল, যাৰ বাবে অস্ত্ৰোপচাৰ কৰি সেই অংশটো কাটি পেলাবলগীয়া হৈছিল।
জানিব পৰা মতে, ২০১৯ চনৰ ফেব্ৰুৱাৰীৰ পৰা ২০২১ চনৰ ডিচেম্বৰ মাহৰ ভিতৰত চিকিৎসক চিৰাগে মহিলাগৰাকীৰ মুঠ তিনিবাৰ অস্ত্ৰোপচাৰ কৰিছিল। ২০১৯ চনৰ দ্বিতীয় অস্ত্ৰোপচাৰৰ পিছৰে পৰা দুয়োৰে মাজত ঘনিষ্ঠতা বাঢ়িবলৈ ধৰে।
জানিব পৰা মতে, মহিলাগৰাকীৰ শাৰীৰিক অৱস্থা ইমানেই জটিল আছিল যে চিৰাগৰ বাহিৰে আন কোনো চিকিৎসকৰ তেওঁক সুস্থ কৰাৰ অভিজ্ঞতা নাছিল। সমগ্ৰ ৱেলছত তেওঁৰ বাবে আন কোনো বিকল্পও নাছিল। চিকিৎসা চলি থকাৰ সময়তে দুয়োৰে মাজত কেইবাবাৰো শাৰীৰিক সম্পৰ্ক স্থাপন হয়। কিন্তু কিছু সময়ৰ পিছত মহিলাগৰাকীয়ে চিকিৎসকজনক ব্লেকমেইল কৰিবলৈ আৰম্ভ কৰে আৰু তেওঁলোকৰ গোপন সম্পৰ্কৰ কথা সকলোকে জনাই দিয়াৰ ভাবুকি দিয়ে।
ব্লেকমেইলিং আৰম্ভ হোৱাৰ লগে লগে চিৰাগে ৰোগীগৰাকীক নিচাজাতীয় ঔষধ দিবলৈ আৰম্ভ কৰে। হাস্পতালৰ চৰকাৰী নথিপত্ৰতো এই ঔষধ দিয়াৰ কোনো উল্লেখ নাছিল। প্ৰায় তিনি বছৰ আগতে মহিলাগৰাকীয়ে আৰক্ষীৰ ওচৰত এক অভিযোগ দাখিল কৰিছিল। আৰক্ষীৰ তদন্ত নহ’লেও পিছত মেডিকেল কাউন্সিলৰ ট্ৰাইবুনেলত চিৰাগৰ বিচাৰ আৰম্ভ হয়। কাউন্সিলে কয় যে নিজৰ পেচাৰ সুযোগ লৈ চিৰাগে ৰোগীৰ সৈতে যি আচৰণ কৰিছে, সেয়া আন ৰোগীসকলৰ বাবেও অতি বিপদজনক। এই ৰায়দানৰ পিছতেই চিৰাগক হাস্পতালৰ পৰা চাকৰিচ্যুত কৰা হৈছে। অৱশ্যে তেওঁক ভাৰতলৈ ঘূৰাই পঠোৱা হ’ব নে নহয়, সেয়া এতিয়াও জানিব পৰা হোৱা নাই।
