উল্লেখযোগ্য যে শেহতীয়াকৈ উচ্চ শিক্ষা সঞ্চালকালয়ে এখন জাননী জাৰি কৰি উল্লেখ কৰে শ্ৰেণীত ৭০% উপস্থিতি হাৰ নথকা আৰু বেক থকা শিক্ষাৰ্থীসকলৰ কেৱল মাত্ৰ ৫০% মাচুলহে ৰেহাই দিব। উক্ত জাননীখনক ধিক্কাৰ জনাই এছ এফ আই ৰ ৰাজ্যিক সম্পাদক ৰাজদ্বীপ মহন্তয়ে বক্তব্য ৰাখে যে শিক্ষাৰ্থীৰ মৌলিক অধিকাৰ শিক্ষা বজাৰৰ কোনো পণ্য নহয় যে ৪০%/৫০% এনেধৰণৰে ৰেহাই দিব। কেৱল মাত্ৰ ৫০% ৰেহাই নহয় , প্ৰতিজন যোগ্য শিক্ষাৰ্থীক কোনোধৰণৰ চৰ্ত আৰোপ নকৰাকৈ বিনামূলীয়া নামভৰ্তি কৰিবলৈ দাবী উত্থাপন কৰে। যিসময়ত ইউ জি চি ৰ নিয়ম অনুসৰি অসমৰ প্ৰত্যেকখন মহাবিদ্যালয় আৰু বিশ্ববিদ্যালয়সমূহত ৯০ দিনৰ শ্ৰেণী সম্পূৰ্ণ নহয় , সেইসময়ত শিক্ষাৰ্থীৰ পৰা ৭০% উপস্থিতিৰ হাৰ বিচৰাটো কেতিয়াও যুক্তিপূৰ্ণ হ’ব নোৱাৰে।
ইয়াৰোপৰি মহাবিদ্যালয় আৰু বিশ্ববিদ্যালয়সমূহৰ কৰ্তৃপক্ষৰ ভুলৰ বাবে বিভিন্নধৰণৰ পৰীক্ষাগত বিভ্ৰান্তি সংঘটিত হৈ আহিছে। উপস্থিত থকাৰ পিছতো পৰীক্ষাত উপস্থিত নথকা বুলি অহা, ভালদৰে পৰীক্ষাত অৱতীৰ্ণ হোৱাৰ পিছতো বেক অহাটো অসমৰ প্ৰত্যেকখন মহাবিদ্যালয় আৰু বিশ্ববিদ্যালয়ৰ এক নিত্য নৈমিত্তিক ঘটনা। এনেক্ষেত্ৰত বেক থাকিলে বিনামূলীয়া নামভৰ্তিৰ পৰা বঞ্চিত কৰাটো কেতিয়াও যুক্তিসংগত হ’ব নোৱাৰে।
অৰ্থনৈতিক দুৰৱস্থাৰ বাবে বহু শিক্ষাৰ্থীয়ে ৰেপিড’ চলাই , চিকিউৰিটি গাৰ্ড হিচাপে কাম কৰি , অংশকালীনভাৱে অৰ্থ উপাৰ্জন কৰি অধ্যয়ন কৰি থাকিবলৈ বাধ্য হৈছে।
তেনেক্ষেত্ৰত ৭০% শ্ৰেণীত উপস্থিতিৰ হাৰ তেওঁলোকৰ বাবে প্ৰত্যাহ্বানমূলক।
সেই অৰ্থনৈতিক দুৰ্বল শিক্ষাৰ্থীসকলক যদি বিনামূলীয়া নামভৰ্তিৰ সুবিধা পৰা বঞ্চিত কৰা হয় , তেন্তে আধাতে শিক্ষা এৰিবলৈ তেওঁলোক বাধ্য হ’ব।
২০২৩ চনতে চাৰি বছৰীয়া স্নাতক পাঠ্যক্ৰম জাপি দিয়াৰ পিছতো ২০২৬ লৈকে অসমৰ মহাবিদ্যালয় আৰু বিশ্ববিদ্যালয়সমূহত পাঠ্যক্ৰম প্ৰস্তুত নহ’ল, পৰ্যাপ্ত আন্তঃগাঁথনি নিৰ্মাণ কৰা নহ’ল।
ইউ জি চি ৰ নিয়ম অনুসৰি ৯০ দিনৰ শ্ৰেণী সম্পূৰ্ণ কৰা দূৰৰ কথা অতি কম সংখ্যক দিনহে শ্ৰেণীত পাঠদান চলে। ইউ জি চি ৰ নিয়ম অনুসৰি পৰীক্ষাৰ ফলাফলো ঘোষণা কৰা নহয় , তেনেক্ষেত্ৰত অসমৰ মহাবিদ্যালয় আৰু বিশ্ববিদ্যালয়সমূহত সংঘটিত হৈ থকা এই অৰাজক পৰিৱেশক শিক্ষা বিভাগে গুৰুত্ব প্ৰদান কৰি তাৰ সমাধান সূত্ৰ উলিওৱাৰ পৰিৱৰ্তে অমূলক যুক্তিৰে বিনামূলীয়া নামভৰ্তিৰ পৰা বঞ্চিত কৰি অৰ্থনৈতিকভাৱে দুৰ্বল শিক্ষাৰ্থীসকলকহে শোষণ কৰাত ব্যস্ত হৈছে।
এছ এফ আই ৰ যুটীয়া সম্পাদিকা উৎপলা দাসে শিক্ষামন্ত্ৰী ৰণোজ পেগু লৈ সম্বোধন কৰা স্মাৰক পত্ৰ শিক্ষা বিভাগৰ সঞ্চালকালয়ৰ বিভাগীয় কৰ্তৃপক্ষক প্ৰদান কৰে আৰু ঘোষণা কৰে যে অহা ২০ আগষ্টৰ ভিতৰত চৰ্তবিহীনভাৱে বিনামূলীয়া নামভৰ্তি প্ৰদান কৰা নহয় তেতিয়া হ’লে ৰাজ্যজুৰি তীব্ৰ আন্দোলন গঢ়ি তুলিবলৈ বাধ্য হ’ব।
