ইউজিচি-২০২৬ নীতিৰ দ্ৰুত কাৰ্যকৰীকৰণ আৰু নতুন দিল্লীত এছ এফ আইৰ কেন্দ্ৰীয় নেতৃত্বক গ্ৰেপ্তাৰ কৰাৰ বিৰুদ্ধে আজি গুৱাহাটীত এক উত্তপ্ত পৰিস্থিতিৰ সৃষ্টি হয়। ভাৰতীয় ছাত্ৰ ফেডাৰেচন চমকৈ এছ এফ আইৰ অসম ৰাজ্যিক কমিটিৰ উদ্যোগত আজি কটন বিশ্ববিদ্যালয়ৰ সমীপৰ নেহৰু পাৰ্কৰ সন্মুখত এক সাংকেতিক প্ৰতিবাদী কাৰ্যসূচী গ্ৰহণ কৰা হয়। প্ৰতিবাদকাৰী ছাত্ৰ-ছাত্ৰীসকলে উচ্চ শিক্ষা প্ৰতিষ্ঠানসমূহত চলি থকা সকলো ধৰণৰ বৈষম্য দূৰ কৰিবলৈ আৰু ছাত্ৰ-ছাত্ৰীৰ সুৰক্ষা নিশ্চিত কৰিবলৈ চৰকাৰক দাবী জনায়। বিশেষকৈ শিক্ষা প্ৰতিষ্ঠানসমূহত জাতিগত বৈষম্য ৰোধৰ বাবে ‘ৰোহিত এক্ট’ বলবৎ কৰাৰ যি দীৰ্ঘদিনীয়া দাবী আছিল, তাৰ পৰিপ্ৰেক্ষিতত ইউজিচিয়ে শেহতীয়াকৈ উত্থাপন কৰা নতুন বিধেয়কখন শক্তিশালীভাৱে ৰূপায়ণ কৰিবলৈ সংগঠনটোৱে আহ্বান জনাইছে।
প্ৰতিবাদস্থলীত উপস্থিত থকা এছ এফ আইৰ নেতৃত্বই অভিযোগ কৰে যে যোৱা এটা দশকত উচ্চ শিক্ষাৰ ক্ষেত্ৰত বৈষম্যৰ পৰিমাণ আশংকাজনকভাৱে বৃদ্ধি পাইছে। ইয়াৰ মাজতে যোৱা ৫ ফেব্ৰুৱাৰীত নতুন দিল্লীৰ শিক্ষা মন্ত্ৰালয়ৰ সন্মুখত শান্তিপূৰ্ণ প্ৰতিবাদ কৰাৰ সময়ত দিল্লী আৰক্ষীয়ে এছ এফ আইৰ সৰ্বভাৰতীয় সভাপতি আদৰ্শ এম সাজি আৰু যুটীয়া সম্পাদক ঐশী ঘোষকে ধৰি শতাধিক শিক্ষাৰ্থীক বৰ্বৰভাৱে আক্ৰমণ আৰু গ্ৰেপ্তাৰ কৰা কাৰ্যক সংগঠনটোৱে তীব্ৰ গৰিহণা দিয়ে। এই গ্ৰেপ্তাৰৰ প্ৰতিবাদতে আজি গুৱাহাটীৰ আকাশ-বতাহ প্ৰতিবাদী শ্লোগানেৰে মুখৰিত হৈ পৰে।
এছ এফ আইৰ নেতৃত্বই চৰকাৰৰ বিৰুদ্ধে সৰৱ হৈ কয় যে কেম্পাছসমূহত লিংগ, বৰ্ণ আৰু জাতিৰ নামত বিভাজন চলি আছে। উত্তৰ-পূৰ্বাঞ্চলৰ বহু শিক্ষাৰ্থীয়ে দেশৰ বিভিন্ন প্ৰান্তত নিৰ্যাতনৰ বলি হ’বলগীয়া হোৱা ঘটনাক উল্লেখ কৰি তেওঁলোকে নিদো তানিয়া আৰু এঞ্জেল চাকমাৰ দৰে শিক্ষাৰ্থীৰ মৃত্যুৰ কথা স্মৰণ কৰে। তেওঁলোকে লগতে কয় যে অসমৰ দৰে এখন বৈচিত্ৰ্যপূৰ্ণ ৰাজ্যতো বিভিন্ন জনগোষ্ঠীয় আৰু সংখ্যালঘু শিক্ষাৰ্থীসকল বৈষম্যৰ পৰা মুক্ত নহয়। বিজেপি চৰকাৰৰ মনুবাদী চিন্তা আৰু সাম্প্ৰতিক সময়ত ৰাজ্যৰ মুখ্যমন্ত্ৰীয়ে নিজৰ পৰিচয়ক লৈ দিয়া শেহতীয়া মন্তব্যই সমাজত বিভাজন আনিব বুলি এছ এফ আইয়ে আশংকা প্ৰকাশ কৰে।
সংগঠনটোৱে লগতে কা আইনৰ বলপূৰ্বক ৰূপায়ণ, ছয় জনগোষ্ঠীৰ জনজাতিকৰণৰ সমস্যা আৰু শেহতীয়াকৈ ৰাজ্যৰ বিভিন্ন ঠাইত সংঘটিত হোৱা উগ্ৰপন্থী ধৰণৰ কাৰ্যকলাপৰ বিৰোধিতা কৰে। বিজেপি আৰু আৰ এছ এছৰ দ্বাৰা পৰিচালিত নীতিসমূহে দেশৰ সাংস্কৃতিক বৈচিত্ৰ্যক ধ্বংস কৰিব বিচাৰিছে বুলিও প্ৰতিবাদকাৰীসকলে মত প্ৰকাশ কৰে। সমতা কেৱল এটা নীতি নহয়, ই শিক্ষাৰ্থীৰ সাংবিধানিক অধিকাৰ বুলি উল্লেখ কৰি এছ এফ আইয়ে অসমৰ প্ৰতিজন শিক্ষাৰ্থীক এই অন্যায়ৰ বিৰুদ্ধে একগোট হৈ আন্দোলন গঢ়ি তুলিবলৈ আহ্বান জনায়। আজিৰ এই কাৰ্যসূচীত সংগঠনটোৰ ৰাজ্যিক সভাপতি দেৱান ইফ্টিকাৰ হুছেইন আৰু সম্পাদক ৰাজদ্বীপ মহন্তই নেতৃত্ব প্ৰদান কৰে।
