আমেৰিকাৰ বিচাৰ বিভাগত এক আচৰিত আৰু ডাঙৰ কেলেংকাৰী পোহৰলৈ আহিছে। নিজৰ কাৰ্যালয়ৰ চেম্বাৰত এগৰাকী শীৰ্ষ আৰক্ষী বিষয়াৰ সৈতে অবৈধ সম্পৰ্ক ৰখাৰ অপৰাধত আমেৰিকাৰ এজন ফেডাৰেল জিলা ন্যায়াধীশে কঠোৰ শাস্তিৰ সন্মুখীন হ’বলগীয়া হৈছে। সাতজনীয়া এখন বিচাৰ বিভাগীয় পেনেলৰ দীঘলীয়া তদন্তৰ অন্তত এই শাস্তিমূলক ব্যৱস্থা গ্ৰহণ কৰা হৈছে।
আন্তঃৰাষ্ট্ৰীয় সংবাদ মাধ্যমৰ প্ৰতিবেদন অনুসৰি, এই ঘটনা পোনপ্ৰথমে পোহৰলৈ আনে সেই ন্যায়াধীশজনৰেই এজন আইন বিষয়া বা ল’ ক্লাৰ্কে। তেওঁ মুখ্য ন্যায়াধীশ উইলিয়াম প্ৰায়ৰৰ ওচৰত এখন আনুষ্ঠানিক অভিযোগ দাখিল কৰিছিল। অভিযোগ অনুসৰি, অভিযুক্ত ন্যায়াধীশজনে কাৰ্যালয়ৰ সময়তেই নিজৰ বন্ধ কোঠাত এগৰাকী আৰক্ষী বিষয়াৰ সৈতে নিয়মীয়াকৈ শাৰীৰিক সম্পৰ্ক স্থাপন কৰিছিল। আটাইতকৈ অস্বস্তিকৰ কথাটো হ’ল, আদালতৰ আন কৰ্মচাৰীসকলৰ বহা ঠাইৰ পৰা এই কোঠাটো একেবাৰে ওচৰত আছিল আৰু ভিতৰৰ মাত বাহিৰলৈ শুনা গৈছিল। ইয়াৰ ফলত আদালতৰ কৰ্মচাৰীসকলৰ বাবে তাত কাম কৰাটো অতি লজ্জাজনক আৰু কঠিন হৈ পৰিছিল।
প্ৰথম অৱস্থাত ন্যায়াধীশজনে তেওঁৰ বিৰুদ্ধে উত্থাপিত সকলো অভিযোগ ভিত্তিহীন বুলি নাকচ কৰিছিল। কিন্তু পৰিস্থিতি বেয়া হোৱাৰ পিছত এই বিষয়টো পৰীক্ষা কৰিবলৈ এখন বিশেষ তদন্ত সমিতি গঠন কৰা হয়। তদন্তত কেলেংকাৰীৰ স্পষ্ট প্ৰমাণ পোৱা গৈছে। প্ৰায় দুবছৰ ধৰি তেওঁ এই অনৈতিক সম্পৰ্ক চলাই আহিছিল। ইমানেই নহয়, প্ৰাৰম্ভিক তদন্তৰ সময়ত তেওঁ উচ্চপদস্থ কৰ্তৃপক্ষৰ আগত কেইবাটাও মিছা কথা কৈ ঘটনাটো লুকুৱাবলৈ চেষ্টা কৰিছিল। ইয়াৰ লগতে, আইন উলংঘা কৰি স্থানীয় এজন জিলা অধিবক্তা প্ৰাৰ্থীৰ ৰাজনৈতিক প্ৰচাৰতো তেওঁ অংশগ্ৰহণ কৰিছিল।
অভিযোগৰ গুৰুত্ব বুজি বিচাৰ বিভাগীয় পেনেলখনে ন্যায়াধীশজনৰ ওপৰত কেইবাটাও কঠোৰ নিষেধাজ্ঞা জাৰি কৰিছে। শাস্তি স্বৰূপে তেওঁ ভৱিষ্যতে কেতিয়াও ফেডাৰেল আদালতৰ মুখ্য ন্যায়াধীশ হ’ব নোৱাৰিব। আনকি জুডিচিয়েল কনফাৰেন্সৰ কোনো কমিটীতে অংশ লোৱাৰ অধিকাৰ তেওঁ হেৰুৱাইছে। ইয়াৰ উপৰিও, এই বেয়া পৰিস্থিতিৰ বাবে মানসিক আঘাত পোৱা ছয়জন প্ৰাক্তন আইন বিষয়াৰ ওচৰত লিখিতভাৱে ক্ষমা খুজিবলৈ ন্যায়াধীশজনক নিৰ্দেশ দিয়া হৈছে।
সমিতিখনে তেওঁলোকৰ পৰ্যবেক্ষণত অতি কঠোৰ ভাষাত জানিবলৈ দিছে যে, এজন উচ্চপদস্থ বিষয়াৰ এনে আচৰণে সমগ্ৰ আদালতৰ পেছাদাৰী পৰিৱেশ ধ্বংস কৰি দিছে। একে সময়তে, এই অবৈধ সম্পৰ্কৰ বাবে ন্যায়াধীশজন ব্লেকমেইলৰ দৰে বিপদতো পৰিব পাৰিলেহেঁতেন, যিটো বিচাৰ ব্যৱস্থাৰ নিৰাপত্তাৰ বাবে অতি বিপদজনক। অৱশ্যে, ঘটনাটো প্ৰমাণিত হোৱাৰ পিছতো বিচাৰ বিভাগৰ তৰফৰ পৰা আজিলৈকে অভিযুক্ত ন্যায়াধীশজনৰ নাম বা পৰিচয় ৰাইজৰ আগত প্ৰকাশ কৰা হোৱা নাই।
