টীম ইণ্ডিয়াৰ তৰুণ প্ৰজন্মক উৎসাহিত কৰাৰ বাবে বিশেষ পদক্ষেপ গ্ৰহণ কৰিছে দেশৰ বিশিষ্ট উদ্যোগী আনন্দ মহিন্দ্ৰাই।
অষ্ট্ৰেলিয়াৰ বিৰুদ্ধে দুৰ্দান্ত প্ৰদৰ্শনৰ বাবে টি নটৰাজন, শাৰ্দুল ঠাকুৰকে ধৰি মুঠ ছয়জন ক্ৰিকেটাৰক মহিন্দ্ৰা গ্ৰুপৰ চেয়াৰমেন আনন্দ মহিন্দ্ৰাই দিছে বিশেষ উপহাৰ।
ইতিহাস গঢ়ি অষ্ট্ৰেলিয়াৰ মাটিত বৰ্ডাৰ-গাভাস্কাৰ ট্ৰফী হস্তগত কৰি দেশলৈ ওভতে কোহলী বাহিনী।
তাৰপাছতে ছয়জন ক্ৰিকেটাৰক মহিন্দ্ৰাৰ থৰ গাড়ী উপহাৰ দিয়াৰ কথা ঘোষণা কৰিছিল আনন্দ মহিন্দ্ৰাই।
সেই মতে প্ৰথম উপহাৰটো লাভ কৰে নটৰাজনে। এইবাৰ ‘বিষ্ট’ মহিন্দ্ৰা থৰ লাভ কৰিলে শাৰ্দুল ঠাকুৰেও।
ঘৰলৈ পঠিয়াই দিয়া গাড়ীখন দেখি উৎফুল্লিত শাৰ্দুলে টুইট কৰি নতুন গাড়ীখনৰ ফটো প’ষ্ট কৰি ধন্যবাদো জ্ঞাপন কৰিছে।
টুইটত শাৰ্দুলে লিখে,’’নতুন মহিন্দ্ৰা থৰ পাই গ’লো। এখন দুৰ্দান্ত গাড়ী নিৰ্মাণ কৰিছে মহিন্দ্ৰাই আৰু মোৰ এছ ইউ ভি চলাবলৈ বৰ ভাল লাগে। এৱনেকুৱা উপহাৰে তৰুণসকলক উৎসাহিত কৰিব। অষ্ট্ৰলিয়াত আমাৰ প্ৰদৰ্শন এনেদৰে উৎসাহিত কৰাৰ বাবে ধন্যবাদ।‘’
অষ্ট্ৰেলিয়া ভ্ৰমণৰ সময়ত ভাৰতীয় দলৰ একাধিক ছিনিয়ৰ ক্ৰিকেটাৰ আঘাতপ্ৰাপ্ত হৈ পৰাত সম্পূৰ্ণ তৰুণ ক্ৰিকেটাৰক লৈ খেলপথাৰত নামিছিল টীম ইণ্ডিয়া।
এনে সুযেগ গ্ৰহণ কৰি টীম ইণ্ডিয়াৰ তৰুণ ব্ৰিগেডৰ গীল, শাৰ্দুল, সুন্দৰ, নৱদীপ, ছিৰাজ আদিয়ে দুৰ্দান্ত প্ৰদৰ্শন দাঙি ধৰি অষ্ট্ৰিলিয়াক পৰাভূত কৰে।
টীম ইণ্ডিয়াৰ এই তৰুণ ব্ৰিগেডৰ ছয়জন ক্ৰিকেটাৰক আনন্দ মহিন্দ্ৰাই একোখনকৈ মহিন্দ্ৰা থৰ উপহাৰ দিছে।