‘আমূল গাৰ্ল’ কোন? নীলা চুলি আৰু ৰঙা বিন্দুযুক্ত ফ্ৰক পিন্ধা ছোৱালীজনীৰ আঁৰত প্ৰকৃত চৰিত্ৰ আছে নেকি? শেহতীয়াকৈ এই সন্দৰ্ভত আন এক আলোচনা হৈছে। বিতৰ্কৰ সৃষ্টি কৰিছে মাৰ্কেটিং কনচালটেণ্ট সঞ্জয় অৰোৰাই। তেওঁ নিজৰ ইনষ্টাগ্ৰাম হেণ্ডেলত এটা ভিডিঅ’ শ্বেয়াৰ কৰি দাবী কৰে যে আমূল গাৰ্ল আচলতে কংগ্ৰেছৰ সাংসদ শশী থাৰুৰৰ ভগ্নী শোভা থাৰুৰ শ্ৰীনিবাসন। আমূলৰ প্ৰথম ক’লা-বগা বিজ্ঞাপনত শোভা আছিল। পিছলৈ আমূল গাৰ্লৰ চিত্ৰকল্প কাৰ্টুন চৰিত্ৰ হিচাপে তেওঁৰ প্ৰতিচ্ছবিত নিৰ্মাণ কৰা হয়।
সঞ্জয় অৰোৰাৰ ভিডিঅ’ দেখাৰ পাছত নেটত ধুমুহা সৃষ্টি হয়। কিছুদিন পূৰ্বে শোভা থাৰুৰ শ্ৰীনিবাসনেও এক্স হেণ্ডেল পোষ্টত কৈছিল যে তেওঁ প্ৰথম ‘আমূল বেবী’। আমূলৰ ক’লা-বগা বিজ্ঞাপনত তেঁওৰ ছবিখন ব্যৱহাৰ কৰা হৈছিল। ছবিখন তুলিছিল বিখ্যাত চলচ্চিত্ৰ পৰিচালক শ্যাম বেনেগালে।
পোষ্টটোত শোভাই লগতে কয় যে তেওঁৰ আনগৰাকী ভগ্নী স্মিতা থাৰুৰও আমূলৰ বৰ্ণিল বিজ্ঞাপনত আছিল। অৱশ্যে তেওঁৰ শৈশৱৰ ছবিখনেই ইউষ্টেচ ফাৰ্নাণ্ডেজে সৃষ্টি কৰা ‘আমূল গাৰ্ল’ৰ প্ৰেৰণা আছিল নেকি সেয়া নিশ্চিত নহয়।
যদিও সকলো জল্পনা-কল্পনা আমূলে স্পষ্টীকৰণ দিছে, তথাপিও স্পষ্ট কৰা হৈছে যে আমুলৰ বিজ্ঞাপনত থকা কণমানিজনী শোভা থাৰুৰৰ পৰা একেবাৰেই অনুপ্ৰাণিত হোৱা নাছিল। চিত্ৰকল্পৰ সৃষ্টিকৰ্তা হৈছে চিলভেষ্টাৰ ডা কুনহা আৰু শিল্পী ইউষ্টেচ ফাৰ্নাণ্ডেজ।
যদিও ভাইৰেল ভিডিঅ’টোত বিপণন পৰামৰ্শদাতা সঞ্জয় অৰোৰাই দাবী কৰিছে যে যোৱা শতিকাৰ ষাঠিৰ দশকত আমুলৰ তেতিয়াৰ বিজ্ঞাপন মুৰব্বী চিলভেষ্টাৰ ডি কুনহাই তেওঁৰ বন্ধু চন্দন থাৰুৰক তেওঁৰ সন্তানৰ ছবি বিচাৰিছিল। তাৰ ভিতৰত শোভাৰ ছবিখনো আছিল। সেই সময়ত তাইৰ বয়স ১০ মাহ। সেই ছবিখনে শিল্পী ইউষ্টেচ ফাৰ্নাণ্ডেজক অনুপ্ৰাণিত কৰিছিল বুলি কোৱা হয়, যিয়ে পিছলৈ ছোৱালীজনীৰ কাৰ্টুন চৰিত্ৰ “আটাৰ্লি বাটাৰলি” সৃষ্টি কৰিছিল, যিটো এতিয়া ‘আমূল গাৰ্ল’ নামেৰে জনাজাত।
