৫ আগষ্টত দেশ এৰিছিল শ্বেখ হাছিনাই। জুলাই মাহৰ তীব্ৰ আন্দোলনৰ পিছত আগষ্ট মাহত বাংলাদেশত হাছিনা চৰকাৰৰ পতন ঘটিছিল। দুবছৰৰ পাছত পুনৰ আহিল আগষ্ট মাহ। এইবাৰ ৫ আগষ্টৰ দিনাই হাছিনাই দেশলৈ উভতি অহাৰ কথা ঘোষণা কৰিব নেকি, তাক লৈ ব্যাপক চৰ্চা চলিছে।
কেইদিনমান আগতে মুজিব কন্যাই স্পষ্ট কৰি দিছিল যে জেল বা শাস্তি যিয়েই নহওক কিয়, তেওঁ নিজৰ দেশলৈ উভতি যাব। কিন্তু কেতিয়া যাব, তাক লৈয়েই এতিয়া প্ৰশ্ন উঠিছে। ৰাজনৈতিক মহলত প্ৰশ্ন উত্থাপন হৈছে যে বুধবাৰেই তেওঁ এই দিনক্ষণ জনাব নেকি? ৫ আগষ্ট, বুধবাৰে দ্য ফৰেইন কৰেছপণ্ডেণ্টছ ক্লাৱ অৱ চাউথ এছিয়াত শ্বেখ হাছিনাই ভাষণ দিব। অৱশ্যে তেওঁ ভাৰ্চুৱেলীহে এই বাৰ্তা প্ৰদান কৰিব। এই অনুষ্ঠানত হাছিনাৰ পুত্ৰ সজীৱ ৱাজেদ জয়, ক্ৰিকেটাৰ ছাকিব আল হাছানকে ধৰি বহু লোক উপস্থিত থাকিব।
গণঅভ্যুত্থানৰ ফলত ক্ষমতা হেৰুৱাইছিল হাছিনাই। ইতিমধ্যে আন্তঃৰাষ্ট্ৰীয় ট্ৰাইবুনেলে হাছিনাক গণহত্যাৰ অপৰাধত মৃত্যুদণ্ডৰ শাস্তি প্ৰদান কৰিছে। এই শাস্তি মূৰ পাতি লৈ তেওঁ দেশলৈ উভতি যাব নে নাই, সেই জল্পনা-কল্পনাৰ মাজতেই তেওঁ নিজেই উভতি যোৱাৰ কথা প্ৰকাশ কৰিছিল।
হাছিনাই কেইদিনমান আগতে জনাইছিল যে তেওঁ এই বছৰৰ শেষৰ ফালে অৰ্থাৎ ডিচেম্বৰ মাহত দেশলৈ উভতি যোৱাৰ পৰিকল্পনা কৰিছে। দেশলৈ গৈ আদালতত আত্মসমৰ্পণ কৰাৰ পৰিকল্পনা থকা বুলিও তেওঁ জনাইছিল। ইয়াৰ পাছতেই সংবাদ সংস্থা ৰয়টাৰ্ছক দিয়া এক সাক্ষাৎকাৰত হাছিনাই কয় যে দেশলৈ উভতি যোৱাৰ পিছত তেওঁলোকে মোক গ্ৰেপ্তাৰ কৰিব পাৰে, আনকি হত্যাও কৰিব পাৰে। তথাপিও মই যাবই লাগিব। মোৰ দলৰ নেতা-কৰ্মীসকল চৰম নিৰ্যাতনৰ বলি হৈছে। মৃত্যু যদি আহিবলগীয়া আছে, তেন্তে সেয়া যেন মোৰ নিজৰ মাটিতেই আহে।
ইয়াৰ পূৰ্বে বাংলাদেশৰ প্ৰাক্তন প্ৰধানমন্ত্ৰীগৰাকীয়ে আন এক সাক্ষাৎকাৰত কৈছিল যে দেশলৈ উভতি অহাৰ বিষয়টো কোনো নিৰ্দিষ্ট তাৰিখ বা সময়ৰ ওপৰত নিৰ্ভৰ নকৰে। বাংলাদেশত এক গণতান্ত্ৰিক পৰিৱেশ নিশ্চিত কৰা, মত প্ৰকাশৰ স্বাধীনতা, ৰাজনৈতিক অধিকাৰ আৰু আইনৰ শাসন পুনৰ প্ৰতিষ্ঠা কৰাৰ লক্ষ্যৰে আমি কাম কৰি আছো বুলি তেওঁ উল্লেখ কৰিছিল। এয়া কেৱল তেওঁৰ উভতি যোৱাৰ বাবেই জৰুৰী নহয়, বৰঞ্চ দেশৰ স্বাধীনতা আৰু সাৰ্বভৌমত্ব ৰক্ষা কৰাৰ লগতে জনসাধাৰণৰ সামগ্ৰিক কল্যাণ নিশ্চিত কৰাৰ বাবেও অপৰিহাৰ্য বুলি তেওঁ মন্তব্য কৰিছিল।
