শ্বিলঙৰ ৰাজনীতিৰ ক্ষেত্ৰখনত ঘটিল এক কৰুণ ঘটনা। ৰাজ্যখনৰ জনপ্ৰিয় লোকসভা সাংসদ ড০ ৰিকি এণ্ড্ৰু জে চিংকনৰ আকস্মিক দেহাৱসান ঘটিছে। বৃহস্পতিবাৰে সন্ধিয়া মাউলাই মাউয়াং অঞ্চলত বন্ধুৰ সৈতে ফুটবল খেলি থকা অৱস্থাত হঠাৎ হাৰ্ট এটেকত আক্ৰান্ত হয়। খেলপথাৰতে ঢলি পৰে ৫৪ বছৰীয়া সাংসদগৰাকী। ততাতৈয়াকৈ তেওঁক চিকিৎসালয়লৈ প্ৰেৰণ কৰা হয়।
প্ৰত্যক্ষদৰ্শীৰ মতে, খেলৰ সময়ত হঠাতে তেওঁৰ অসুস্থ অনুভৱ হয় আৰু চেতনা হেৰুৱাই পেলায়। প্ৰথমতে তেওঁক ততাতয়াকৈ স্থানীয় স্বাস্থ্য কেন্দ্ৰলৈ আৰু পিছত ডাঃ এইচ গৰ্ডন ৰবাৰ্টছ চিকিৎসালয়লৈ লৈ যোৱা হয়। কিন্তু চিকিৎসকে তেওঁৰ প্ৰাণ ৰক্ষা কৰিব নোৱাৰিলে। নিশা ৮:৪২ বজাত তেওঁক মৃত ঘোষণা কৰা হয়।
কেৱল ৰাজনীতিবিদ নহয়, ৰিকি চিংকন আছিল মেঘালয়ৰ অতি প্ৰতিভাশালী ব্যক্তিত্ব। নৰ্থ-ইষ্টাৰ্ণ হিল ইউনিভাৰ্চিটিৰ (NEHU) অৰ্থনীতিৰ এই অধ্যাপকগৰাকী যথেষ্ট আকস্মিকভাৱে ৰাজনীতিত প্ৰৱেশ কৰিছিল।
২০২৪ চনৰ লোকসভা নিৰ্বাচনত তেওঁ ভইচ অৱ দ্য পিপল পাৰ্টিৰ (VPP) সাধাৰণ সম্পাদক হিচাপে প্ৰতিদ্বন্দ্বিতা কৰিছিল। আনহাতে, তেওঁৰ প্ৰতিদ্বন্দ্বী আছিল তিনিবাৰৰ হেভিৱেট কংগ্ৰেছৰ সাংসদ ভিনচেণ্ট এইচ পালা। তেওঁক ৩.৭ লাখ ভোটৰ অভিলেখ ব্যৱধানত পৰাস্ত কৰি ঐতিহাসিক জয় সাৱ্যস্ত কৰিছিল। ইয়াৰ পিছত তেওঁ দিল্লীৰ দৰবাৰত মেঘালয়ৰ বলিষ্ঠ কণ্ঠ হিচাপে নিজকে প্ৰতিষ্ঠা কৰিছিল।
তেওঁৰ আকস্মিক আৰু অকাল মৃত্যুত মেঘালয়কে ধৰি সমগ্ৰ উত্তৰ-পূব ভাৰত শোকত ভাগি পৰিছে। মুখ্যমন্ত্ৰী কনৰাড কে চাংমাৰ পৰা আৰম্ভ কৰি প্ৰায় সকলো বিৰোধী দলৰ শীৰ্ষ নেতাই চিকিৎসালয়ত গৈছে।
এগৰাকী বিনম্ৰ অধ্যাপকৰ পৰা জনপ্ৰিয় জননেতালৈ এই যাত্ৰাৰ অন্ত পৰাত তেওঁৰ অগণন অনুগামী বাকৰুদ্ধ হৈ পৰিছে। কেৱল উত্তৰ-পূব ভাৰততে নহয়, ৰাষ্ট্ৰীয় ৰাজনীতিতৌ শোকৰ গভীৰ ছাঁ পৰিছে। লোকসভাত তেওঁৰ বহু সতীৰ্থই শোক প্ৰকাশ কৰিছে।
