গুৱাহাটীত অনুষ্ঠিত ইউনাইটেড ব্ৰাদাৰ্ছ ক্লাবৰ উদ্যোগত অনুষ্ঠিত ষষ্ঠ বাৰ্ষিক সৰ্বভাৰতীয় প্ৰবীণ ফুটবল চেম্পিয়নশ্বিপত শ্বিলঙৰ স্প’ৰ্টিং ইউনাইটেড ক্লাবে বিজয়ীৰ খিতাপ অৰ্জন কৰিছে।
দেওবাৰে নিশা পল্টন বজাৰৰ ভাৰতীয় ক্ৰীড়া প্ৰাধিকৰণৰ আঞ্চলিক কেন্দ্ৰৰ খেলপথাৰত অনুষ্ঠিত ফাইনেলত শিলঙৰ ফ্ৰেণ্ডছ স্পৰ্টিং ইউনাইটেডে কাঠমাণ্ডুৰ চি এম জি ক্লাবক টাইব্ৰেকাৰত ৪-১ গ’লত পৰাস্ত কৰে।
ইয়াৰ পূৰ্বে নিৰ্দ্ধাৰিত সময়ত খেলৰ ফলাফল আছিল ১-১।
চেম্পিয়নশ্বিপৰ প্ৰখমখন ছেমি ফাইনেলত কাঠমাণ্ডুৰ চি এম জি ক্লাবে দিল্লীৰ ছানদে ক্লাবক ট্ৰাইব্ৰেকাৰত ৪-৩ গ’লত পৰাস্ত কৰাৰ বিপৰীতে দ্বিতীয়খন ছেমিত শ্বিলঙৰ ফ্ৰেণ্ডছ স্প’ৰ্টিং ইউনাইটেডে নাৰেংগী ফুটবল দলক ৪-০ গ’লত পৰাস্ত কৰি ফাইনেলত প্ৰৱেশ কৰিছিল।
দেওবাৰে মুখ্য অতিথি হিচাপে উপস্থিত থাকি মুখ্য মন্ত্ৰী সৰ্বানন্দ সোণোৱালে ফাইনেল খেলখন উদ্বোধন কৰিছিল। উদ্বোধনী অনুষ্ঠানত মুখ্য সচিব সঞ্জয় কৃষ্ণ, সাংসদ পল্লৱ লোচন দাস, বিধায়ক ঋতুপৰ্ণ বৰুৱা আদি উপস্থিত থাকে।
উল্লেখযোগ্য এইবাৰৰ টুৰ্ণামেণ্টখনত মুঠ ১২টা দলে ভাগ লৈছিল।
চেম্পিয়নৰ খিতাপ দখল কৰা ফ্ৰেণ্ডছ স্প’ৰ্টিং ইউনাইটেডক কনক চন্দ্ৰ বৰুৱা ট্ৰফীৰ লগতে ৫০ হেজাৰ টকাৰ আৰ্থিক পুৰস্কাৰ আগবঢ়োৱা হয়। খেলৰ সামৰণিত পৰিৱেশ মন্ত্ৰী পৰিমল শুক্লবৈদ্য আৰু এছ এল এ চিৰ সদস্য সচিব লক্ষ্য কোঁৱৰে বঁটা বিতৰণ কৰে।
