ভাৰতৰ উদীয়মান ক্ৰিকেটাৰ শুভমন গীলে সোমবাৰে দেওধৰ ট্ৰফী ক্ৰিকেট প্ৰতিযোগিতাত ভাৰত ‘চি’ক নেতৃত্ব দি ভাৰতীয় দলৰ অধিনায়ক বিৰাট কোহলীৰ নামত থকা দহ বছৰীয়া পুৰণি এক অভিলেখ ভংগত কৰে।
কোহলীৰ অভিলেখ ভংগ কৰি শুভমনে দেওধৰ ট্ৰফীৰ ফাইনেলত কোনো দলক নেতৃত্ব দিয়া দেশৰ সৰ্বকনিষ্ঠ অধিনায়কত পৰিণত হয়। শুভমনে মাত্ৰ ২০ বছৰ বয়সতে ভাৰত ‘চি’ক নেতৃত্ব দিয়ে দিয়ে।
আনহাতে, বিৰাট কোহলীয়ে ২০০৯-১০ বৰ্ষৰ দেওধৰ ট্ৰফীৰ ফাইনেলত ২১ বছৰ বয়সত উত্তৰ মণ্ডলৰ অধিনায়ক হিচাপে আছিল।
উল্লেখযোগ্য যে, পূৰ্বেও বিৰাট কোহলীয়ে শুভমন গীলৰ প্ৰতিভাৰ উচ্চ প্ৰশংসা কৰিছিল।
‘‘এই বয়সত ময়ো শুভমনৰ দৰে খেলিব পৰা নাছিলো,’’ চলিত বৰ্ষত শুভমনে ভাৰতীয় এদিনীয়া দলৰ হৈ অভিষেক ঘটোৱাৰ সময়ত কোহলীয়ে শুভমনক প্ৰশংসা কৰি কৈছিল।
উল্লেখযোগ্য যে, ফাইনেলত শুভমনে ভাৰত ‘চি’ক নেতৃত্ব দিলেও ভাৰত ‘বি’ৰ বিৰুদ্ধে পৰাস্ত হ’বলগীয়া হয়।
প্ৰতিযোগিতাখনত শুভমনে ভাৰত ‘এ’ৰ বিৰুদ্ধে খেলা শতকীয় ইংনিছটোৱে ভাৰত ‘চি’ক ফাইনেলত উপনীত হোৱাৰ ক্ষেত্ৰত সহায় কৰিছিল।
