ইতিমধ্যে টেষ্ট দলত স্থান পাইছিলেই এইগৰাকী ভৱিষ্যত তাৰকাই। মূল একাদশত খেলাৰ সুযোগ নাপালেও দুটা টেষ্ট ছিৰিজৰ ভাৰতীয় দলৰ সদস্য আছিল শুভমন গীল।
তাৰ পাছতো নিউজিলেণ্ডৰ বিৰুদ্ধে টেষ্ট ছিৰিজত সুযোগ পাবনে তাক লৈ অনিশ্চয়তা আছিল। কিয়নো ৰোহিত শৰ্মা, মায়ংক আগৰৱাল, শিখৰ ধাৱানৰ সমান্তৰালকৈ বেটেৰে সাৱলীল প্ৰদৰ্শন আগবঢ়াইছে লোকেশ ৰাহুল আৰু পৃথ্বী শ্ব’ই।
গতিকেই সুযোগ পাবলৈ শুভমনে বিশেষ দৃষ্টি আকৰ্ষণকাৰী কিবা এটা কৰাৰ প্ৰয়োজন আছিল আৰু সেয়া নিউজিলেণ্ডত কৰি দেখুৱালে শুভমনে। নিউজিলেণ্ড এ দলৰ বিৰুদ্ধে এখন অনুশীলন মেচত দ্বিশতৰাণ কৰি সকলোকে চমকিত কৰি তোলে নৱাগত ক্ৰিকেটাৰগৰাকীয়ে।
অহা ২১ ফেব্ৰুৱাৰিৰ পৰা নিউজিলেণ্ডৰ বিৰুদ্ধে দুখন টেষ্ট মেচল ছিৰিজ খেলিব ভাৰতে। সেই ছিৰিজৰ বাবে শীঘ্ৰেই দল নিৰ্বাচনৰ বাবে বহিব নিৰ্বাচকসকল।
ইয়াৰ পূৰ্বে শুভমন গীলে জনাই দিলে যে সুযোগ পালে তেওঁৱো টীম ইণ্ডিয়াৰ অশ্বমেধ চলাই নিয়াৰ বাবে সাজু।
নিউজিলেণ্ড এ দলৰ বিৰুদ্ধে খেলা অনুশীলন টেষ্টখনক দুটা ইনিংছতে গীলে ৰাণ কৰিবলৈ সক্ষম হয়। প্ৰথম ইনিংছত শুভমনে ৮৩ ৰাণ কৰাৰ বিপৰীতে দ্বিতীয় ইনিংছত ২০৪ৰাণৰ এটা আকৰ্ষণীয় ইনিংছ খেলে।
শুভমনে তেওঁৰ দ্বিশতকীয় ইনিংছটোত ২২টা চাৰি আৰু ৩টা ছয় কোবায়। তেওঁৰ লগতে খেলখনত ভাৰতৰ হৈ শতৰাণ কৰে দলটোৰ অধিননায়ক হিচাপে খেলা হনুমা বিহাৰী আৰু প্ৰিয়াংক পাঞ্চালেও।
শুভমনে ১৯ অনুৰ্ধ বিশ্বকাপত প্ৰদৰ্শন কৰা অনবদ্য খেলৰ সুবাদতে বাতৰিৰ শিৰোণামালৈ আহিছিল। তাৰ পাছত ঘৰুৱা ক্ৰিকেটতো নিয়মিত ভাল প্ৰদৰ্শন কৰি আহিছে খেলুৱৈগৰাকী।
এইবাৰ দেশৰ হৈ টেষ্ট খেলাৰ সপোন পূৰ হ’লে শুভমন গীল টীম ইণ্ডিয়াৰ ভৱিষ্যত তাৰকা হিচাপে উজলি উঠাৰ সম্ভৱনাও উজ্জ্বল।