সিদ্ধু মুছেৱালা হত্যাত জড়িত পলাতক শ্বুটাৰক গ্ৰেপ্তাৰ কৰিলে পঞ্জাৱ আৰক্ষীয়ে: দুগৰাকী সহযোগীকো গ্ৰেপ্তাৰ
যোৱা ২৯ মে’ত সংঘটিত হোৱা পঞ্জাৱৰ জনপ্ৰিয় গায়ক সিদ্ধু মুছেৱালা হত্যাকাণ্ড জড়িত আন এগৰাকী শ্বুটাৰক শনিবাৰে গ্ৰেপ্তাৰ কৰে পঞ্জাৱ আৰক্ষীয়ে। ইয়াৰ লগে লগে মুছেৱালা হত্যাকাণ্ডত জড়িত আটাইকেইগৰাকী অভিযুক্ত শ্বুটাৰকে ধৰিবলৈ সক্ষম হয় আৰক্ষী।
জনপ্ৰিয় গায়কগৰাকীক আঠগৰাকী শ্বুটাৰে হত্যা কৰিছিল বুলি আৰক্ষীয়ে পূৰ্বে উল্লেখ কৰাৰ লগতে ইয়াৰ সাতজনকেই গ্ৰেপ্তাৰ কৰা হৈছে বুলিও জানিবলৈ দিছিল। মুছেৱালাক গুলীয়াই হত্যা কৰাৰ পাছৰে পৰা দীপক মুণ্ডি নামৰ শ্বুটাৰগৰাকীয়ে আত্মগোপন কৰি আছিল।
কালি এক অভিযানৰ অন্তত দীপক মুণ্ডিক আৰক্ষীয়ে পশ্চিম বংগ-নেপাল সীমান্তৰ পৰা গ্ৰেপ্তাৰ কৰে। পঞ্জাৱ আৰক্ষীৰ সঞ্চালক প্ৰধান গৌৰৱ যাদৱে এই কথা এক টুইটযোগে সদৰী কৰিছিল।
যাদৱে টুইটটোত উল্লেখ কৰা মতে পঞ্জাৱ আৰক্ষীয়ে কেন্দ্ৰীয় সুৰক্ষা সংস্থা আৰু দিল্লী আৰক্ষীৰ সৈতে এই যুটীয়া অভিযান চলাইছিল।
গ্ৰেপ্তাৰ হোৱা তিনিওগৰাকী অভিযুক্তই যোৱা কিছুদিনৰ পৰা চিগনেল এপৰ জৰিয়তে কানাডাস্থিত গেংষ্টাৰ গ’ল্ডি ব্ৰাৰৰ সৈতে পোনপটীয়াকৈ যোগাযোগ ৰক্ষা কৰি আহিছিল বুলি তেওঁ লগতে সদৰী কৰিছিল।
উল্লেখ্য যে যোৱা ২৯ মে’ত পঞ্জাৱৰ মানচা জিলাত এটা বন্দুকধাৰী দলে মুছেৱালাৰ ওপৰত নিৰ্বিচাৰ গুলীচালনা কৰি মুছেৱালাক হত্যা কৰিছিল। তাৰ পিছতে এই গোচৰৰ দায়িত্বত থকা পঞ্জাৱ আৰক্ষী আৰু দিল্লী আৰক্ষীয়ে তাৎক্ষণিকভাৱে কেইবাগৰাকীও অভিযুক্তক গ্ৰেপ্তাৰ কৰিছিল।
যোৱা ২০ জুলাইত অমৃতসৰৰ এক কাষৰীয়া অঞ্চলত পঞ্জাৱ আৰক্ষীৰ এনকাউণ্টাৰত মুছেৱালা হত্যাকাণ্ডত জড়িত দুগৰাকী গেংষ্টাৰ নিহত হৈছিল।
ইফালে শনিবাৰে দিল্লীৰ ৰোহিণী অঞ্চলৰ চেক্টৰ ৩৬ ত আৰক্ষীৰ সৈতে গ’ল্ডী ব্ৰাৰৰ গেঙৰ সদস্যৰ এক সংঘৰ্ষ হয়। ঘটনাস্থলীৰ পৰা তিনিজন সদস্যকো আটক কৰে আৰক্ষীয়ে।