ফুটবল প্লেয়াৰ্ছ এছ’চিয়েশ্যন অব ইণ্ডিয়া (এফ পি এ আই)ই প্ৰদান কৰি অহা ইণ্ডিয়ান ফুটবল এৱাৰ্ড’ছৰ চলিত বছৰৰ বঁটা সমূহ ২১ জুলাই অৰ্থাৎ দেওবাৰে প্ৰদান কৰা হ’ব। ছিকিমৰ পালজৰ ষ্টেডিয়ামত এক গাম্ভীৰ্যপূৰ্ণ অনুষ্ঠানৰ মাজেৰে বঁটা সমূহ প্ৰদান কৰিব।
প্ৰথমবাৰৰ বাবে এনে ধৰণৰ ডাঙৰ অনুষ্ঠান আয়োজন কৰিবলৈ পোৱা ফুটবল প্লেয়াৰ্ছ এছ’চিয়েশ্যন অব ছিকিমে (এফ পি এ এছ) ইতিমধ্যে প্ৰস্তুতি প্ৰায় সম্পূৰ্ণ কৰি তুলিছে। অনুষ্ঠানৰ দিনা এফ পি এ আই আৰু ছিকিম ষ্টাৰ্ছৰ মাজত অনুষ্ঠিত হ’ব এখন ফুটবল মেচ। ইতিমধ্যে এই মেচখনৰ বাবে ছিকিমত চলিছে ব্যাপক চৰ্চা।
পালজৰ ষ্টেডিয়ামত অনুষ্ঠিত হ’ব লগীয়া এই মেচখনত এফ পি এ আইক প্ৰতিনিধিত্ব কৰিব ভাৰতীয় ফুটবল দলৰ অধিনায়ক সুনীল চেত্ৰী, দীপক মণ্ডল, মহম্মদ নাৱাজ, আনৱাৰ আলী, নগেন টামাং, নাডং ভূটীয়াৰ লগতে ভাৰতৰ বিভিন্ন পেচাদাৰী ফুটবলাৰ।
আনহাতে ছিকিম ইলেভনত খেলিব ৰাজ্যখনৰ বিভিন্ন আগশাৰীৰ ফুটবলাৰ। আনহাতে ভাৰতীয় ফুটবল দলৰ প্ৰাক্তন অধিনায়ক বাইচুং ভুটীয়াও মেচখনত অংশ গ্ৰহণ কৰিব বুলি এফ পি এ আইৰ সভাপতি নিৰ্মল চেত্ৰীয়ে জানিবলৈ দিয়ে। অৱশ্যে ভূটীয়াই কোনটো দলৰ হৈ খেলিব সেয়া এতিয়ালৈ জানিব পৰা হোৱা নাই।
উল্লেখ্য যে বিগত বছৰ সমূহৰ দৰে এই বছৰো এফ পি এ আইয়ে বিভিন্ন শিতানত আগবঢ়াব বঁটা। শিতান সমূহ হ’ল বেষ্ট ইণ্ডিয়ান প্লেয়াৰ অব দা ইয়েৰ, ইণ্ডিয়ান ইমাৰ্জিং প্লেয়াৰ অব দা ইয়েৰ, ফেনছ প্লেয়াৰ অব দা ইয়েৰ, বেষ্ট কোচ্চ অব দা ইয়েৰ আৰু বেষ্ট ফৰেইন প্লেয়াৰ অব দা ইয়েৰ।
লগতে পঢ়ক : ফেনছ প্লেয়াৰ অব দ্যা ইয়েৰ এৱাৰ্ড’ৰ দৌৰত অসমৰ ফুটবলাৰ গৌৰৱ বৰা
ইফালে ভাৰতীয় ফুটবলৰ উত্তৰণত বিশেষ ভূমিকা অৱলম্বন কৰা প্ৰাক্তন ফুটবলাৰ তথা কেইজন মান বিশেষ ব্যক্তিকো সম্বৰ্ধনা জনোৱা হ’ব বুলি জানিব পৰা গৈছে।
প্ৰথমবাৰৰ বাবে ছিকিমত অনু্ঠিত হ’ব লগীয়া এই ঐতিহাসিক অনুষ্ঠানৰ সাক্ষী হ’বলৈ ৰাজ্যখনৰ ফুটবল প্ৰেমীসকলক দেওবাৰে পালজাৰ ষ্টেডিয়ামত উপস্থিত থাকিবলৈ অনুৰোধ জনায়।
উল্লেখ্য যে ‘ফেনছ প্লেয়াৰ অব দ্যা ইয়েৰ এৱাৰ্ড’ৰ বাবে বাছনি কৰি উলিওৱা ১০ জন ফুটবলাৰৰ ভিতৰত আছে অসমৰ গৌৰৱ বৰা। এফ পি এ আইয়ে প্ৰদান কৰি অহা এই এৱাৰ্ড ভোটিং পদ্ধতিৰে নিৰ্ণয় কৰা হয়।
