ইম্ফলত মাৰ সম্প্ৰদায়ৰ শীতকালীন উৎসৱ ছিকোই ৰুই উদযাপন

১২ ডিচেম্বৰ বুধবাৰে ইম্ফলৰ ট্ৰাইবেল ৰিছাৰ্চ ইন্সটিটিউটৰ সভাগৃহত উদযাপিত হয় ছুকোই ৰুই উৎসৱ। ঘাইকৈ শীতকালি উদযাপিত হোৱা এই উৎসৱত মুখ্য অতিথি হিচাপে যোগদান কৰে মুখ্য মন্ত্ৰী নথমবাম বীৰেন সিঙে।

এই উৎসৱৰ মুখ্য আকৰ্ষণ আছিল বৈচিত্ৰ্যময় সাংস্কৃতিক পৰিৱেশনা আৰু সমূহীয়া ভোজ। উল্লেখ্য যে যদিহে বছৰটোত খেতি-বাতি ভাল হয় আৰু কোনো মাৰি-মৰক  নহয়, তেতিয়াহে এই উৎসৱ পালিত হয়।

শিক্ষা মন্ত্ৰী থ ৰাধেশ্যাম সিং, মণিপুৰ পৰ্যটন কৰ্প’ৰেশ্যন লিমিটেডৰ অধ্যক্ষ ড০ ছাপম ৰঞ্জন, তিপাইমুখৰ বিধায়ক ড০ চালটনলিয়েন আমো, মিজোৰাম ইন্সটিটিউট অব মেডিকেল ইডুকেশ্যন এণ্ড ৰিছাৰ্চৰ সঞ্চালক ড০ এল ফিমোটেই উপস্থিত থাকে।

অনুষ্ঠানত ভাষণ ৰাখি মুখ্য মন্ত্ৰী বীৰেনে কৈছে যে সম্প্ৰদায় আৰু ধৰ্মৰ ভিত্তিত ৰাজনীতি কৰা কেতিয়াও উচিৎ নহয়। ৰাজনীতি মানৱৰ সেৱাৰ বাবে হ’ব লাগে।

মুখ্য মন্ত্ৰীগৰাকীয়ে কয় যে ৰাজ্যখনত বাস কৰা প্ৰগতিশীল, শিক্ষিত আৰু বিনয়ী সম্প্ৰদায়সমূহৰ ভিতৰত এটা হৈছে মাৰ সম্প্ৰদায়। তেওঁ কৈছে যে যে পথ যোগাযোগ উন্নত হলে ইম্ফল-ফেৰজাৱললৈকে মণিপুৰ ৰাজ্যিক পৰিবহণৰ বাছ সেৱা সম্প্ৰসাৰিত কৰাৰ কথা বিৱেচনা কৰা হ’ব।

তেওঁ আৰু কয় যে জিলাখনৰ পাৰবুং গাঁৱত আদা মহোৎসৱ অনুষ্ঠিত কৰা হেতুকে জিলাখনৰ আদা খেতিয়কসকলে তেওঁলোকৰ উৎপাদিত আদা বিক্ৰি কৰাৰ বাবে গ্ৰাহকৰ অসুবিধাত ভুগা নাই। তেওঁ আৰু কৈছে যে জিলাখনত উৎপাদিত আদা আৰু আন আন উদ্যান-শস্য সংৰক্ষণ কৰাৰ বাবে ফেৰজৱালত এটা ক্ষুদ্ৰ শীতলগৃহ নিৰ্মাণ কৰা হ’ব।

আনহাতে উপস্থিত ৰাইজক সম্বোধন কৰি শিক্ষা মন্ত্ৰী ৰাধেশ্যামে কৈছে যে বাৰে বিভিন্ন সম্প্ৰদায়ে বাস কৰা মণিপুৰ হৈছে এখন ৰং বিৰঙী ফুলৰ বাগিচা। তেওঁ কয় যে মণিপুৰত বাস কৰা প্ৰতিটো জাতি সম্প্ৰদায়ে শান্তি আৰু মিলাপ্ৰীতিৰে বাস কৰে তেতিয়াহে ৰাজ্যখনৰ সমৃদ্ধি হ’ব।