দীৰ্ঘদিন ধৰি অসুস্থ হৈ থকাৰ পাছত টাটা ট্ৰাষ্টৰ বৰ্তমানৰ অধ্যক্ষ ন’ৱেল টাটাৰ মাতৃ আৰু কোম্পানীটোৰ প্ৰাক্তন অধ্যক্ষ ৰতন টাটাৰ সতীয়া মাতৃ চিমোনে টাটাৰ মুম্বাইৰ ব্ৰীচ কেণ্ডি হস্পিতালত পৰলোকপ্ৰাপ্তি ঘটে।
শুকুৰবাৰে পুৱা হস্পিতালতে তেওঁ শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স হৈছিল ৯৫ বছৰ।
টাটা গ্ৰুপে এটা বিবৃত্তিযোগে চিমোনেৰ মৃত্যুৰ খবৰ নিশ্চিত কৰিছে। বিবৃতিত চিমোনেৰ মৃত্যুত শোক প্ৰকাশ কৰি কোৱা হৈছে যে অহা শনিবাৰে কোলাবাৰ কেথিড্ৰেল অৱ দ্য হোলি নেম চাৰ্চত তেওঁৰ অন্ত্যেষ্টিক্ৰিয়া সম্পন্ন কৰা হ’ব।
কেৱল উদ্যোগপতি পৰিয়ালৰ সদস্যাই নহয়, চিমোনে ভাৰতীয় প্ৰসাধন সামগ্ৰীৰ অন্যতম মুখ্য ব্ৰেণ্ড Lakmé-ৰ প্ৰতিষ্ঠাপকো আছিল।
চিমোনেৰ জন্ম হৈছিল ছুইজাৰলেণ্ডৰ ৰাজধানী জেনেভাত। ১৯৫১ চনত তেওঁ প্ৰথমবাৰ পৰ্যটক হিচাপে ভাৰতলৈ আহিছিল। ইয়াৰ দুবছৰ পাছত উদ্যোগপতি নাভাল টাটাৰ সৈতে তেওঁৰ বিবাহপাশত আৱদ্ধ হয়। ১৯৬০ চনত তেওঁ টাটা গ্ৰুপৰ ব্যৱসায়ত যোগদান কৰে।
১৯৬১ চনত চিমোনে Lakmé-ত যোগদান কৰে। সেই সময়ত Lakmé টাটা অইল মিলছ কোম্পানীৰ অধীনত থকা এটা সৰু ব্ৰেণ্ড আছিল। তাৰ পাছত লাহে লাহে নিজৰ ব্যৱসায়িক বুদ্ধিমত্তা প্ৰয়োগ কৰি চিমোনে Lakmé-ক আগুৱাই লৈ যায়।
১৯৮২ চনত তেওঁ Lakmé-ৰ অধ্যক্ষ হিচাপে নিযুক্ত হয়। ভাৰতৰ প্ৰসাধন উদ্যোগলৈ আগবঢ়োৱা বিপুল অৱদানৰ বাবে চিমোনেক ‘Cosmetics Czarina of India’ বা ভাৰতৰ প্ৰসাধন জগতৰ সম্ৰাজ্ঞী বুলি কোৱা হৈছিল।
