কাইলৈ অসম গণ পৰিষদত সদলবলে যোগদান কৰিব কন্ঠশিল্পী কল্পনা পাটোৱাৰীয়ে।
অগপ সভাপতি অতুল বৰাৰ অতিকৈ ঘনিষ্ঠ তথা এক বিশ্বস্ত উচ্চস্তৰীয় সুত্ৰই জনাইছে এই কথা।
কাইলৈ পুৱা ১০ বজাত অসম গণ পৰিষদৰ আমবাৰীস্থিত মুখ্য কাৰ্য্যালয়ত যোগদান কৰিব কন্ঠশিল্পীগৰাকীয়ে।
আঞ্চলিকতাবাদী দলটোৰ সভাপতি অতুল বৰা, কাৰ্য্যকৰী সভাপতি কেশৱ মহন্ত, মন্ত্ৰী ফণীভুষণ চৌধুৰীকে ধৰি অন্য উচ্চস্তৰীয় নেতৃত্বই দলটোৰ মজিয়ালৈ আদৰিব কল্পনা পাটোৱাৰীক।
‘ভোজপুৰী কুইন’খ্যাত কল্পনা পাটোৱাৰীৰ লগত শতাধিক সমৰ্থকে অগপত যোগদান কৰিব বুলি সুত্ৰটোৱে দাবী কৰে।
অন্য এক সুত্ৰই জনোৱা অনুসৰি শেহতীয়াকৈ অসমত আহি উপস্থিত হোৱা কন্ঠশিল্পীগৰাকী আঞ্চলিকতাবাদী ভাবধাৰাৰ প্ৰতি আকৃষ্ট হৈছে।
উল্লেখযোগ্য যে, ইতিমধ্যে শাসক দল বিজেপিলৈ তথা প্ৰধান বিৰোধী কংগ্ৰেছলৈ বহুকেইগৰাকী শিল্পীৰ আগমণ ঘটিছে। কিন্তু আঞ্চলিকতাবাদী ভাবধাৰাৰে উদ্বুদ্ধ হৈ শিল্পী কল্পনা পাটোৱাৰীৰ অগপলৈ আগমণ হ’লে নিশ্চয়কৈ অন্য শিল্পীকো অগপ যোগদানত অনুপ্ৰাণিত কৰিব নেকি বুলি এক প্ৰশ্ন উত্থাপিত হৈছে।
অৱশ্যে, এই সন্দৰ্ভত নিজৰ স্পষ্ট মত বৰ্তমানলৈকে প্ৰকাশ কৰা নাই শিল্পীগৰাকীয়ে।