ৰাজ্যত অনুষ্ঠিত হ’ব লগা দুটা পৰ্য্যায়ৰ পঞ্চায়ত নিৰ্বাচনৰ বাবে শিৱসাগৰ জিলা প্ৰশাসনে পূৰ্ণ প্ৰস্তুতি চলাইছে। এই কথা ব্যক্ত কৰে শিৱসাগৰ জিলা উপায়ুক্ত পল্লৱ গোপাল ঝাই। অহা ৫ ডিচেম্বৰত প্ৰথম পৰ্য্যায়ত হ’বলগীয়া পঞ্চায়ত নিৰ্বাচনৰ বাবে জিলা প্ৰশাসনৰ প্ৰস্তুতি সৰ্ম্পকে আলোচনা কৰিবলৈ আজি জিলা উপায়ুক্ত পল্লৱ গোপাল ঝাৰ সভাপতিত্বত এক বৈঠক অনুষ্ঠিত হয়।
বৈঠকত উপায়ুক্ত গৰাকীয়ে বিভিন্ন ৰাজনৈতিক দলৰ প্ৰতিনিধিৰ উপস্থিতিত নিৰ্বাচনৰ নীতি নিৰ্দেশনা সম্পৰ্কে আলোচনা কৰাৰ লগতে নিৰ্বাচনী আচৰণ বিধি মানি চলিবলৈ আহ্বান জনায়। লগতে নিৰ্বাচনী আচৰণ বিধি উলংঘা কৰা সকলৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলি উপায়ুক্তগৰাকীয়ে ব্যক্ত কৰে। তদুপৰি নিৰ্বাচন প্ৰক্ৰিয়াত জড়িত সকলো বিষয়া-কৰ্মচাৰীকে নিষ্ঠা সহকাৰে নিজৰ দায়িত্ব পালন কৰিবলৈ আহ্বান জনায়।
উপায়ুক্তগৰাকীয়ে কয় যে, জিলাখনত মুঠ ৬৩৮ টা ভোট গ্ৰহণ কেন্দ্ৰত ১৩ খন জিলা পৰিষদ, ৪ খন আঞ্চলিক পঞ্চায়ত ৬২ খন গাঁও পঞ্চায়ত আৰু ৬২০টা ৱাৰ্ডত পঞ্চায়ত নিৰ্বাচন অনুষ্ঠিত হব। তেওঁ লগতে কয় যে জিলা খনত ১৭৫০২৭গৰাকী পুৰুষ আৰু ১৬৯০৫২ গৰাকী মহিলাৰ সৈতে মুঠ ৩৪৪০৭৯গৰাকী ভোটাৰে ভোট দান কৰিব। জিলাখনৰ মুঠ ভোট গ্ৰহণ কেন্দ্ৰ সমূহৰ মাজত ৪৬১ টা তুলনামুলক ভাৱে সুৰক্ষিত, ১৭৪ টা স্পৰ্শকাতৰ আৰু ৩টা অতি স্পৰ্শকাতৰ বুলি উল্লেখ কৰে।
আনহাতে ১০ নৱেম্বৰৰ পৰা মনোনয়ন পত্ৰ জাৰি কৰা হ’ব আৰু ১৫ নৱেম্বৰৰ পুৱা ১১ বজাৰ পৰা বিয়লি ৩ বজাৰ ভিতৰত মনোনয়ন পত্ৰ দাখিল কৰিব লাগিব। মনোনয়ন পত্ৰ সমূহ ১৬ নৱেম্বৰৰ পুৱা ১০. ৩০ বজাৰ পৰা পৰীক্ষা কৰা হ’ব আৰু সেইদিনাই বিয়লি মনোনিত প্ৰাৰ্থী সকলৰ তালিকা প্ৰকাশ কৰিব।
ইফালে প্ৰাৰ্থীসকলে ১৯ নৱেম্বৰৰ বিয়লি ৩ বজাৰ ভিতৰত মনোনয়ন প্ৰত্যাহাৰ কৰিব পাৰিব। আৰু উক্ত দিনাই বিয়লি ৩ বজাৰ পিছত প্ৰতিদ্বন্দী প্ৰাৰ্থী সকলৰ তালিকা প্ৰকাশ কৰা হ’ব বুলি উপায়ুক্তগৰাকীয়ে জানিবলৈ দিয়ে।
তেওঁ লগতে জানিবলৈ দি কয় যে প্ৰয়োজন সাপেক্ষে ৭ ডিচেম্বৰত পুৱা ৭ বজাৰ পৰা বিয়লি ৩ বজালৈ পুনৰ ভোট দানৰ ব্যৱস্থা কৰা হ’ব। তদুপৰি ১২ ডিচেম্বৰৰ পুৱা ৮ বজাৰ পৰা ভোট গননা প্ৰক্ৰিয়া আৰম্ভ হ’ব বুলি জানিবলৈ দিয়ে উপায়ুক্ত পল্লৱ গোপাল ঝাই।
আজিৰ এই বৈঠকত আৰক্ষী অধীক্ষক সুবোধ সোনোৱাল, জিলা পৰিষদৰ কাৰ্য্যবাহী বিষয়া শেৱালী বৰদলৈ, জিলা উন্নয়ন আয়ুক্ত নবাব আল আজহাৰ আলী, অতিৰিক্ত উপায়ুক্ত মুন গগৈ, বিজিত দাস, অতিৰিক্ত আৰক্ষী অধীক্ষক নবীন সিং, শিৱসাগৰ ৰাজহ চক্ৰ বিষয়া সম্প্ৰীতি গোস্বামী, ডিমৌ ৰাজহ চক্ৰ বিষয়া মনোৰমা মৰাং, আমগুৰি ৰাজহ চক্ৰ বিষয়া মৌচুমী চেতিয়া, নিৰ্বাচনী বিষয়া জগদীশ ব্ৰহ্ম, সংলগ্ন চক্ৰ বিষয়া ৰিতুৰাজ বৰদলৈ, ইন্দিকা গগৈ আৰু খণ্ড উন্নয়ন বিষয়াকে ধৰি অন্যান্য বিভাগৰ বিষয়া সকল উপস্থিত থাকে।
নিৰ্বাচনী বিধি উলংঘা কৰাৰ ক্ষেত্ৰত ওজৰ আপত্তি দৰ্শাবলৈ হ’লে ০৩৭৭২-২২৩৩৯৭ আৰু ৮৪৭১৮৬৪৩৫৫ নম্বৰত যোগাযোগ কৰিব পাৰিব আৰু নিৰ্বাচন সম্পৰ্কে অধিক তথ্য জানিবৰ বাবে ০৩৭৭২-২২২১৭৭ নম্বৰত যোগাযোগ কৰিব পাৰিব বুলি আজিৰ বৈঠকতে জিলা উপায়ুক্তই জানিবলৈ দিয়ে।