গোলাঘাট, যোৰহাট, তিতাবৰত বিষাক্ত চুলাই সেৱন কৰি এশজনৰো অধিক লোকৰ মৃত্যু হোৱা ঘটনাই ৰাজ্যত এক শোকাকুল পৰিবেশ সৃষ্টি কৰাৰ সময়তে আজি পুৱাৰে পৰা শিৱসাগৰৰ বিভিন্ন স্থানত আবকাৰী বিভাগ আৰু আৰক্ষী বিভাগে দণ্ডাধীশৰ লগত যৌথ ভাৱে চুলাই মদৰ বিৰুদ্ধে তীব্ৰ অভিযান চলায়।
আজি পুৱাৰে পৰা চলোৱা অভিযানকালত অভিযানকাৰী দলটোৱে ডিমৌৰ গজালিত ২৫০০ লিটাৰ চুলাই জব্দ কৰি নষ্ট কৰে। বাতৰি লিখা সময়লৈকে ডিমৌৰ আন আন অঞ্চলতো অভিযান চলি আছে।
আনহাতে শনিবাৰে ডিমৌ বাগান, বৰবাম বাগান, থাওৰা বাগান, আঠাবাৰী বাগান, দিৰৈ বাগান, আদিত দণ্ডাধীশ ইন্দিকা গগৈৰ, শিৱসাগৰ জিলা আবকাৰী বিভাগৰ পৰিদৰ্শক অৰুণজ্যোতি ভৰালীৰ লগতে আৰক্ষীৰ এটা দলে ডিমৌ অঞ্চলৰ বাগান সমূহৰ ঘৰে ঘৰে তালাচী চলাই প্ৰায় আঠ হাজাৰ লিটাৰ চুলাই মদ জব্দ কৰি নষ্ট কৰি দিয়ে। উক্ত বাগানসমূহৰ প্ৰায় সংখ্যক ঘৰতেই অবৈধভাৱে চুলাই মদ প্ৰস্তুত কৰি ৰাখিছিল। ইয়াৰোপৰি জংঘলৰ মাজত চুলাই মদ প্ৰস্তুত কৰা বহু কেইটা ঘাটি উচ্ছেদ কৰে দলটোৱে। আনহাতে চুলাই মদ প্ৰস্তুত তথা বিক্ৰীৰ লগত জড়িত ৬ জন ব্যক্তিক আটক কৰে অভিযানকাৰী দলটোৱে।