শিৱসাগৰত অ’এনজিচি কৰ্তৃপক্ষৰ দায়িত্বজ্ঞানহীনতাৰ বাবেই E-1400-1 নম্বৰৰ ৰিগত কৰ্মৰত আৰু ছয়জন কৰ্মচাৰীৰ শৰীৰত ধৰা পৰিছে কোভিড পজিটিভ।
অ’এনজিচি কৰ্তৃপক্ষৰ দায়িত্বহীনতাৰ বাবেই শিৱসাগৰ জিলাৰ গেলেকী হাতিপটিস্থিত E-1400-1 নম্বৰৰ ৰিগত কৰ্মৰত ১০ জনকৈ কৰ্মচাৰীৰ শৰীৰত কোভিড ১৯ পজিটিভ পোৱা গৈছিল।
সেই একেটা ৰিগতে কৰ্মৰত আন ছয়জন কৰ্মচাৰীৰ শৰীৰত মংগলবাৰে কোভিড১৯ পজিটিভ ধৰা পৰে। যাৰবাবে এতিয়া আতংকৰ সৃষ্টি হৈছে অ’এনজিচিৰ বিভিন্ন ৰিগত কৰ্মৰত কৰ্মচাৰীৰ মাজত।
উল্লেখ্য যে যোৱা ২৯ জুলাইত হাতিপটিৰ E-1400-1 নম্বৰ ৰিগটোত কৰ্মৰত হেমন্ত কুমাৰ নামৰ কৰ্মচাৰীজন ৰেপিড এন্টিজেন টেষ্টত কোভিড১৯ পৰজিটিভ পোৱা যায়।
কৰ্মচাৰীজনক চিকিৎসালয়লৈ প্ৰেৰণ কৰে যদিও ৰিগটোত কন্টেইনমেন্ট জ’ন হিচাপে ঘোষণা কৰাৰ পৰিৱৰ্তে দুটা দিন অন্য কৰ্মচাৰীৰ সহায়ত খনন কাৰ্য চলাই থাকে।
আনহাতে কৰ্মচাৰীজনৰ কভিড১৯ পজিটিভ পোৱাৰ পাছতো ৰিগটো চেনিটাইজ নকৰাৰ আন এক গুৰুত্বৰ অভিযোগ উঠিছে অ’এনজিচি কৰ্তৃপক্ষৰ বিৰুদ্ধে।
ইপিনে দুদিন পিছত অৰ্থাৎ ৩১ জুলাইত ৰিগটোত কৰ্মৰত আন কৰ্মচাৰীসকলক ৰেপিড এন্টিজেন টেষ্ট কৰোৱাত ৭ জন কৰ্মচাৰীৰ শৰীৰত কোভিড১৯ ধৰা পৰে। আৰু ১ আগষ্টৰ দিনা আন দুজন কৰ্মচাৰীৰ দেহত কোভিড১৯ পজিটিভ ধৰা পৰে।
নতুনকৈ আজি কোভিড১৯ পজিটিভ পোৱা অ’এনজিচিৰ কৰ্মচাৰী কেইজন হ’ল চন্দন দুৱৰা (জাঁজী), সীমান্ত বৰা (কোঁৱৰপুৰ), তিলক বৰুৱা (গেলেকী), ব্ৰজা শৰ্মা (অ’এনজিচি ক’লনি), মানসপ্ৰতীম গগৈ আৰু পূৰ্ণ বসুমতাৰী।
২৯ জুলাইত ৰিগটোত কৰ্মৰত প্ৰথমজন কোভিড১৯ পজিটিজ কৰ্মচাৰী ওলোৱাৰ পিছত ৰিগটো চেনিটাইজ কৰি বা কন্টেইনমেন্ট জ’ন হিচাপে ঘোষণা কৰি অন্য কৰ্মচাৰীসকলক কোৱাৰেন্টাইনত ৰখা হ’লে ৰিগটোত কৰ্মৰত কৰ্মচাৰীসকলক কোভিডৰ পৰা বচাব পাৰিলেহেতেন।
কিন্তু অ’এনজিচি কৰ্তৃপক্ষই তাকে নকৰি দুটা দিন ৰিগৰ কাম চলাই থকাত ৰিগটোত কৰ্মৰত প্ৰায় সংখ্যক কৰ্মচাৰীয়েই কোভিড১৯ত আক্ৰান্ত হ’ল বুলি ক’ব বিচাৰে একাংশ সচেতন মহলে।
কেৱল অ’এনজিচিৰ গাফিলতি আৰু দায়িত্বহীনতাৰ বাবেই এটা ৰিগত কৰ্মৰত ১৬ জনকৈ ব্যক্তি কোভিড১৯ পজিটিভত আক্ৰান্ত হ’ল।
