উত্তৰ প্ৰদেশৰ কানপুৰৰ ভিআইপি ৰোড এলেকাত সংঘটিত এই দুৰ্ঘটনা। লেমবৰ্গিনিৰ খুন্দাত কমেও ছয়জন লোক গুৰুতৰভাৱে আহত হয়। দেওবাৰে বিয়লি তীব্ৰবেগী লেমবৰ্গিনিৰ চালকজনে হঠাতে নিয়ন্ত্ৰণ হেৰুৱাই পেলায়। যাৰ বাবেই সংঘটিত হয় এই দুৰ্ঘটনা।
আৰক্ষীয়ে তথ্য লাভ কৰাৰ পিছতে ততাতয়াকৈ সেই স্থানত উপস্থিত হয়। আহতসকলক উদ্ধাৰ কৰি স্থানীয় চিকিৎসালয়লৈ লৈ যোৱা হয়। সম্প্ৰতি তেওঁলোক চিকিৎসাধীন হৈ আছে। একে সময়তে আৰক্ষীয়ে জব্দ কৰিছে লেমবৰ্গিনিখন।
সূত্ৰ অনুসৰি আৰক্ষীয়ে অভিযুক্ত চালকজনৰ নাম শিৱম মিশ্ৰ বুলিও জানিবলৈ দিয়ে। অঞ্চলটোৰ প্ৰভাৱশালী ব্যৱসায়ী কে কে মিশ্ৰৰ পুত্ৰ। বিলাসী গাড়ীখন বৰ বেগেৰে আহি আছিল। লেমবৰ্গিনীখনে প্ৰথমে এখন অটোৰিক্সাত খুন্দা মাৰে। ইয়াৰ পিছত সন্মুখত থিয় হৈ থকা মটৰ চাইকেল এখনত খুন্দা মাৰে। যাৰ বাবে মটৰ চাইকেল আৰোহীজন যথেষ্ট দূৰলৈ ছিটিকি পৰে। ইয়াৰ পিছত লেমবৰ্গিনিখনে মটৰ চাইকেলখন যথেষ্ট দূৰলৈ মহতিয়াই নি বিদ্যুতৰ খুঁটাত খুন্দা মাৰে। সেই সময়ত কেইবাজনো পথচাৰী আহত হয়।
দুৰ্ঘটনাটোৰ পিছতে উত্তেজিত স্থানীয় ৰাইজে গাড়ীখন চাৰিওফালৰ পৰা ঘেৰাও কৰে। অভিযোগ অনুসৰি গাড়ীৰ চালকৰ সৈতে অহা বাউন্সাৰসকলে স্থানীয় লোকৰ সৈতে অভব্য আচৰণ কৰে। এই ঘটনাই অঞ্চলটোত ব্যাপক আলোড়নৰ সৃষ্টি কৰে। ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে আৰক্ষীয়ে। ক্ষীপ্ৰতাৰে আহতসকলক উদ্ধাৰ কৰি স্থানীয় চিকিৎসালয়ত ভৰ্তি কৰে।
স্থানীয় ৰাইজে গাড়ীৰ চালক আৰু আৰক্ষীৰ বিৰুদ্ধেও অভিযোগ আনে। স্থানীয় ৰাইজে অভিযোগ উত্থাপন কৰিছে যে অভিযুক্তজন প্ৰভাৱশালী পৰিয়ালৰ পুত্ৰ হোৱাৰ বাবেই আৰক্ষীয়ে ব্যৱস্থা গ্ৰহণত পলম কৰিছে। অৱশ্যে গাড়ীখন থানালৈ অনা হৈছে বুলি আৰক্ষীয়ে অৱগত কৰে। ঘটনা সন্দৰ্ভত এফআইআৰ দাখিল কৰা হৈছে। লগতে আৰক্ষীয়ে আইন অনুসৰি বিহিত ব্যৱস্থা গ্ৰহণৰ আশ্বাস দিছে।
