তীব্ৰ চাঞ্চল্য সৃষ্টিকাৰী ছেৰফাংগুৰি গুলীচালনাৰ ঘটনাই নতুন মোৰ লৈছে। ছেৰফাংগুৰিৰ নাৰাবাৰীৰ ঘটনাত নিষিদ্ধ ঘোষিত সংগঠন কেএলঅ’ৰ নাম সাঙোৰ খাই পৰিছে। ক্ষুদ্ৰ ব্যৱসায়ী সুনীল মণ্ডলৰ গুলীচালনাৰ ঘটনাৰ আৰু কেএলঅ’ (KLO) ৰ সৈতে জড়িত মডেলকে ধৰি ছয়জনক আৰক্ষীয়ে আটক কৰিছে।
আৰক্ষীয়ে ঘটনাস্থলীৰ কাষৰ পৰা উত্তম ৰায় আৰু মৃদুল ৰায়ক আটক কৰাৰ পিছত নিশা আৰক্ষীয়ে পুনৰ গৌৰ চন্দ্ৰ ৰায় (নাৰাবাৰী,৩৮), নিৰ্মল দাস (চৰাইখোলা,৩২), কোকৰাঝাৰ সদৰ চহৰৰ জনাজাত মডেল নৱনীতা বৰ্মন বোথ্ৰা আৰু তেওঁৰ স্বামী বিকাশ বোথ্ৰাক আটক কৰিছে ।
উল্লেখ্য যে বিটিআৰৰ কোকৰাঝাৰ জিলাৰ ছেৰফাংগুৰি আৰক্ষী থানাৰ অন্তৰ্গত নাৰাবাৰী গাঁৱত নিশা কালি সংঘটিত হৈছিল এক গুলীচালনাৰ ঘটনা৷ মটৰ চাইকেলেৰে অহা দুই অস্ত্ৰধাৰীয়ে ক্ষুদ্ৰ ব্যৱসায়ী সুনীল মণ্ডলক নিচেই ওচৰৰ পৰা গুলীয়াই পলায়ন কৰিছিল৷
ঘটনাৰ আকস্মিকতাত উৱাদিহ হেৰুওৱা পৰিয়াল আৰু গাঁৱবাসীয়ে লগে লগে বুকুত গুলী লাগি আহত হোৱা সুনীল মণ্ডলক আক্ৰমণৰ ঘটনা ছেৰফাংগুৰি আৰক্ষীক অৱগত কৰাত ঘটনাস্থলীত উপস্থিত হৈ আৰক্ষীয়ে আহত ক্ষুদ্ৰ ব্যৱসায়ী সুনীল মণ্ডলক নিশাই বঙাইগাঁও লৱাৰ আছাম হস্পিতালত চিকিৎসাৰ বাবে ভৰ্তি কৰায়৷
নাৰাবাৰীৰ বাসিন্দা সুনীল মণ্ডলে ধান ক্ৰয় কৰি চাউল বিক্ৰীৰে এক ক্ষুদ্ৰ ব্যৱসায়ৰ জৰিয়তে পৰিয়াল-পোহপাল দিয়ে৷ ঘটনাক গাঁওবাসীয়ে গৰিহণা দি দোষীক অতি শীঘ্ৰে কৰায়ত্ত কৰি কঠোৰ শাস্তি প্ৰদান কৰিবলৈ চৰকাৰ-প্ৰশাসনৰ ওচৰত দাবী জনাইছিল৷
আৰক্ষীয়ে এই ঘটনাত কেএলঅ’ জড়িত থকাৰ সম্ভেদ লাভ কৰিছে আৰু এতিয়ালৈ ছয়জনক আটক কৰিবলৈ সক্ষম হৈছে।
