চেক গণৰাজ্যত পৰ্যটকৰ বাবে মুকলি কৰা হৈছে বিশ্বৰ সৰ্ববৃহৎ ওলোমা দলং। প্ৰায় দুবছৰ ধৰি নিৰ্মাণাধীন দলংখন শুক্ৰবাৰে আনুষ্ঠানিকভাৱে মুকলি কৰি দিয়া হয়।
এই আকৰ্ষণীয় দলংখনৰ নামাকৰণ কৰা হৈছে ‘স্কাই ব্ৰিজ ৭২১’ নামেৰে। চেক গণৰাজ্যৰ ৰাজধানী প্ৰাগৰ পৰা ২.৫ ঘণ্টাৰ যাত্ৰাপথৰ দূৰত্বত এই দলংখন অৱস্থিত।
দলংখনে জেচেঙ্কি পৰ্বতমালাৰ দুটা পৰ্বতৰ মাজত সংযোগ স্থাপন কৰিছে। উপত্যকাটোৰ মাজত ৯৫ মিটাৰ ওপৰত ওলমি আছে এই দলংখন। উল্লেখ্য যে দলংখনৰ মুঠ দৈৰ্ঘ্য হৈছে ৭২১ মিটাৰ।
১.২ মিটাৰ বহল দলংখন শিশুৰ পৰা বৃদ্ধলৈ, সকলো বয়সৰ ব্যক্তিৰ বাবে মুকলি। অৱশ্যে হুইলচেয়াৰ ব্যৱহাৰ কৰা লোকসকলৰ বাবে দলংখনত প্ৰৱেশ উপযুক্ত নহয় বুলি স্থানীয় কৰ্তৃপক্ষই জানিবলৈ দিছে।
স্থানীয় সংবাদ মাধ্যমৰ প্ৰতিবেদন অনুসৰি, এই ওলোমা দলংখনৰ নিৰ্মাণ মূল্য প্ৰায় 8.4 নিযুত ডলাৰ।
উল্লেখ্য যে চেক ৰিপাব্লিক স্কাই ব্ৰীজে ওলোমা দলঙৰ আকাৰৰ ক্ষেত্ৰত নেপালৰ বাগলুং পাৰবাট ফুটব্ৰিজক অতিক্ৰম কৰিছে।
সৰ্ববৃহৎ ওলোমা দলং হিচাপে ইতিপূৰ্বে গীণিজ ৱৰ্ল্ড ৰেকৰ্ডৰ স্বীকৃতিপ্ৰাপ্ত বাগলুং পাৰবাট ফুটব্ৰিজতকৈ স্কাই ব্ৰীজ ১৫৪ মিটাৰ দীঘল।
