অৰুণাচল প্ৰদেশৰ বিধানসভা নিৰ্বাচনত জয়ী হৈয়ো জয়ৰ সুখবৰ ল’বলৈ নাপালে ৰাজ্যখনৰ পশ্চিম খুনচা বিধানসভা সমষ্টিৰ এন পি পিৰ প্ৰাৰ্থী তথা বিধায়ক তিৰং আবহে।
ৰাজ্যখনৰ পশ্চিম খুনচা বিধানসভা সমষ্টিত এন পি পিৰ হৈ প্ৰতিদ্বন্দ্বিতা আগবঢ়োৱা তিৰং আবহক যোৱা ২১ মে’ত অৰুণাচল প্ৰদেশৰ তিৰাপত সন্দেহযুক্ত এন এছ চি এন (আই এম)য়ে নৃশংভাৱে গুলীয়াই হত্যা কৰিছিল।
এই ভয়ংকৰ আক্ৰমণটোত বিধায়ক আবহৰ উপৰি তেওঁৰ সৰু পুতেক, চালক, গৃহৰক্ষীকে ধৰি মুঠ ১১জন লোকৰ মৃত্যু হৈছিল।
ঘোষণা কৰা বিধানসভা নিৰ্বাচনৰ ফলাফল অনুসৰি উগ্ৰপন্থীৰ গুলীত নিহত এন পি পিৰ প্ৰাৰ্থী আবহে সমষ্টিটোৰ পৰা ১০৫৫ টা ভোটৰ ব্যৱধানত বিজেপিৰ প্ৰাৰ্থী ফাৱাং ল’ৱাঙক পৰাজিত কৰিবলৈ সক্ষম হয়। পশ্চিম খুনচা বিধানসভা সমষ্টিত আবহৰ এই জয় আছিল দ্বিতীয়বাৰৰ জয়।
উল্লেখযোগ্য যে অৰুণাচল প্ৰদেশত লোকসভা নিৰ্বাচনৰ সমান্তৰালভাৱে ৰাজ্যখনৰ ৬০ খন বিধানসভা আসনৰ বাবেও নিৰ্বাচন অনুষ্ঠিত হৈছিল। ভাৰতীয় নিৰ্বাচন আয়োগৰ তথ্যত প্ৰকাশ পোৱা অনুসৰি বিজেপিয়ে ৰাজ্যখনত একক সংখ্যাগৰিষ্ঠতা লাভ কৰিবলৈ সক্ষম হয়।
