ফিফা বিশ্বকাপ ২০২৬ চনত অংশগ্ৰহণ কৰিবলৈ গৈ আমেৰিকাৰ পৰা প্ৰৱেশৰ অনুমতি নোপোৱা চোমালিয়াৰ তাৰকা ফুটবল ৰেফাৰী ওমৰ আব্দুলকাডিৰ আৰ্টান নিজ দেশলৈ ঘূৰি অহাৰ পিছত এক অভূতপূৰ্ব বীৰোচিত আদৰণি লাভ কৰিলে। চোমালিয়াৰ আদিম আব্দুল্লা উসমান আন্তঃৰাষ্ট্ৰীয় বিমানবন্দৰত তেওঁক আদৰিবলৈ শ শ ফুটবল অনুৰাগী, ক্ৰীড়া ব’ৰ্ডৰ বিষয়ববীয়া আৰু উচ্চপদস্থ চৰকাৰী প্ৰতিনিধিয়ে ভিৰ কৰিছিল। দেশপ্ৰেম আৰু একতাৰ নিদৰ্শন দাঙি ধৰি জনতাই তেওঁৰ নাম ধৰি জয়ধ্বনি দিলে, যিয়ে এটা বিষাদময় পৰিৱেশক এক উৎসৱৰ ৰূপ দিলে। বিমানবন্দৰত উপস্থিত হৈ আৰ্টানে সকলোকে আশ্বস্ত কৰি কয় যে পৰৱৰ্তী বিশ্বকাপত তেওঁ নিশ্চিতভাৱে উপস্থিত থাকিব।
এই ক্ৰীড়াবিদজনৰ বাবে যোৱা কেইদিনমান আছিল অতি যন্ত্ৰণাদায়ক। আফ্ৰিকাৰ অন্যতম শ্ৰেষ্ঠ ৰেফাৰী হিচাপে পৰিগণিত আৰ্টানক ২০২৫ চনত শ্ৰেষ্ঠ ৰেফাৰীৰ সন্মান প্ৰদান কৰা হৈছিল। বিশ্বকাপৰ বাবে নিৰ্বাচিত হোৱা তেওঁ প্ৰথমগৰাকী চোমালি নাগৰিক আছিল। কিন্তু ইস্তানবুলৰ পৰা মায়ামী বিমানবন্দৰত উপস্থিত হোৱাৰ পাছতেই আমেৰিকাৰ সীমান্ত সুৰক্ষা বাহিনীয়ে তেওঁক আটক কৰে। বৈধ ভিছা আৰু কূটনৈতিক পাছপোৰ্ট থকাৰ স্বত্বেও তেওঁক এঘাৰ ঘণ্টা ধৰি জেৰা কৰা হয়। আমেৰিকাৰ প্ৰশাসনে এই সিদ্ধান্তৰ সমৰ্থনত নিৰাপত্তাজনিত কাৰণ দৰ্শাইছে আৰু তেওঁক তুৰস্কলৈ উভতাই পঠিওৱাৰ ব্যৱস্থা কৰে।
এই কাণ্ডই সমগ্ৰ বিশ্বৰ ফুটবল মহলত তীব্ৰ প্ৰতিক্ৰিয়াৰ সৃষ্টি কৰিছে। চোমালি চৰকাৰে এই ঘটবাক নিন্দা কৰাৰ লগতে আৰ্টানৰ সাফল্যক নিজৰ গৌৰৱ বুলি অভিহিত কৰিছে। ফিফাই অৱশ্যে এই বিষয়টোৰ পৰা নিজকে আঁতৰাই ৰাখিছে আৰু ই কেৱল প্ৰশাসনিক প্ৰক্ৰিয়া বুলি উল্লেখ কৰিছে। সমগ্ৰ ঘটনাৰ পাছত এতিয়া চোমালিয়াৰ ৰাইজৰ বাবে তেওঁ কেৱল এজন ৰেফাৰী নহয়, বৰঞ্চ এজন আচল নায়ক হৈ পৰিছে। বিদেশত অপমানিত হ’লেও নিজ দেশত তেওঁ পোৱা এই মৰম আৰু আদৰণি চৰ্চাৰ বিষয় হৈ পৰিছে।
