অসম লোকসেৱা আয়োগৰ কাম-কাজত অসন্তুষ্ট হৈ মুখ্যমন্ত্ৰী সৰ্বানন্দ সোণোৱালৰ কাষ চাপিছে ২০১৬ বৰ্ষৰ মূল পৰীক্ষাত অৱতীৰ্ণ একাংশ প্ৰাৰ্থীয়ে। বাছনি প্ৰক্ৰিয়াত ব্যাপক অনিয়ম সংঘটিত হোৱাৰ অভিযোগ তুলি একাংশ অনুত্তীৰ্ণ প্ৰাৰ্থীয়ে মুখ্যমন্ত্ৰীৰ ওচৰত অভিযোগ-পত্ৰ দাখিল কৰিছে।
এই অসন্তুষ্ট প্ৰাৰ্থীসকলে প্ৰাৰ্থী বাছনিৰ ক্ষেত্ৰত অনিয়ম সংঘটিত হোৱা, নিৰ্দিষ্ট ক’চিং চেণ্টাৰত ক’চিং লোৱা প্ৰাৰ্থীয়ে অস্বাভাৱিকভাৱে উত্তীৰ্ণ হোৱাকে ধৰি বিভিন্ন অভিযোগ সম্বলিত এখন স্মাৰক-পত্ৰ মুখ্যমন্ত্ৰীক প্ৰদান কৰিছে।
২০১৬ বৰ্ষৰ মূল লিখিত পৰীক্ষাৰ ফলাফল যোৱা ২৮ ছেপ্টেম্বৰত ঘোষণা কৰা হৈছিল।অসম অসামৰিক সেৱা আৰু সংলগ্ন সেৱাৰ মুঠ ২০৫টা পদৰ বিপৰীতে ৪৩০গৰাকী প্ৰাৰ্থী মূল পৰীক্ষাত উত্তীৰ্ণ হৈছিল।
ইপিনে পৰীক্ষাৰ ফলাফল দেখি একাংশ প্ৰাৰ্থী হতবাক হৈ পৰে। কিয়নো মূল পৰীক্ষাত উত্তীৰ্ণ হোৱা ৪৩০গৰাকী প্ৰাৰ্থীৰ ভিতৰত ১৬৭ গৰাকী প্ৰাৰ্থীয়ে এটা নিৰ্দিষ্ট ক’চিং চেণ্টাৰৰ। অৰ্থাৎ, এটা ক’চিং চেণ্টাৰত প্ৰশিক্ষণ লৈ ১৬৭গৰাকী প্ৰাৰ্থী মূল পৰীক্ষাত উত্তীৰ্ণ হয়।
জানিব পৰা মতে ১৬৭গৰাকী উত্তীৰ্ণ প্ৰাৰ্থী গুৱাহাটীৰ এটা বিশেষ আই এ এছ ক’চিং চেণ্টাৰৰ। ইয়াতেই সন্দেহ ঘনীভূত হৈ মুখ্যমন্ত্ৰীৰ কাষ চাপিছে একাংশ বঞ্চিত প্ৰাৰ্থী। তেওঁলোকে অসম লোকসেৱা আয়োগৰ অধ্যক্ষৰ ওচৰতো সুকীয়া অভিযোগ-পত্ৰ দাখিল কৰে।
এতিয়া এই অভিযোগ-পত্ৰ সন্দৰ্ভত মুখ্যমন্ত্ৰীয়ে কি ব্যৱস্থা গ্ৰহণ কৰে সেয়া লক্ষ্যণীয় হৈ পৰিছে। অসম লোকসেৱা আয়োগৰ সংস্কাৰৰ বাবে মুখ্যমন্ত্ৰীয়ে বিশেষ পদক্ষেপ গ্ৰহণ কৰা বুলি দাবী কৰি অহাৰ সময়তে ২০১৬ চনৰ মূল পৰীক্ষাত অৱতীৰ্ণ একাংশ প্ৰাৰ্থীয়ে দুৰ্নীতিৰ অভিযোগ আনিছে।
তাৎপৰ্যপূৰ্ণভাৱে, একাংশ প্ৰাৰ্থীয়ে অনা অভিযোগ অনুসৰি আই আই টি, এন আই টিৰ ছাত্ৰ-ছাত্ৰীয়ো অসম লোকসেৱা আয়োগৰ পৰীক্ষাত উত্তীৰ্ণ হ’বলৈ সক্ষম নহ’ল। সেইদৰে কলেজ শিক্ষকৰ বাবে অৰ্হতা অৰ্জন কৰিবলৈ সক্ষম নেট, শ্লেট, পি এইচ ডি থকা বহু প্ৰাৰ্থী উত্তীৰ্ণ নোহোৱাৰ বিপৰীতে বিশেষ এটা ক’চিং চেণ্টাৰৰ ছাত্ৰ-ছাত্ৰীয়ে কেনেকৈ অস্বাভাৱিক হাৰত উত্তীৰ্ণ হ’ল সেয়া সন্দেহৰ আৱৰ্তত সোমাই পৰিছে।