মেঘালয়ৰ হানিমুন হত্যাকাণ্ডৰ অন্যতম মূল অভিযুক্ত সোণম ৰঘুবংশী এতিয়া ক’ত? সূত্ৰ অনুসৰি সোমবাৰে উত্তৰ প্ৰদেশৰ আদালতে গ্ৰেপ্তাৰ কৰা সোণম আৰু আন চাৰিজনক ৭২ ঘণ্টাৰ ট্ৰেনজিট ৰিমাণ্ডত মেঘালয়লৈ প্ৰেৰণ কৰিবলৈ নিৰ্দেশ দিয়ে। মেঘালয় আৰক্ষীয়ে ট্ৰেনজিট ৰিমাণ্ডত উত্তৰ প্ৰদেশৰ পৰা সোণমক লৈ বিহাৰলৈ লৈ যায়। সোণম এতিয়া পাটনাৰ ফুলৱাৰী শ্বৰীফ কাৰাগাৰত ভৰ্তি হৈ আছে।
বিহাৰ আৰক্ষীৰ সূত্ৰ অনুসৰি আজি (মঙলবাৰে) সোণমক পাটনাৰ পৰা ইণ্ডিগো বিমানেৰে (ফ্লাইট নম্বৰ: 6E775) কলকাতালৈ লৈ যোৱা হ’ব। বিয়লি ৩:৫৫ বজাত পাটনাৰ পৰা যাত্ৰাৰ সময়।
মঙলবাৰে কলকাতাৰ পৰা ইণ্ডিগ’ বিমানেৰে (6E572 নম্বৰৰ) গুৱাহাটীলৈ লৈ যোৱা হ’ব সোণমক। এই বিমানখন মঙলবাৰে নিশা ৯:২০ বজাত কলকাতাৰ পৰা যাত্ৰা কৰিব।
সূত্ৰ অনুসৰি বিমানৰ টিকট বুকিং কৰা পাঁচজন লোকৰ নাম হৈছে সোণম ৰঘুবংশী, শিদা খাৰাস্তী, ৰোজা এম খোন, শ্বিৰা চিল্টে ডি আৰু সুৰেন্দ্ৰ প্ৰসাদ ডি।
ইপিনে, সময়ৰ লগে লগে ‘মেঘালয় হানিমুন হত্যাকাণ্ডৰ গোচৰ’ৰ অন্যতম মূল অভিযুক্ত সোণম ৰঘুবংশীয়ে আৰক্ষীক ‘বিভ্ৰান্তিকৰ’ তথ্য দি গোচৰটোৰ সৈতে অধিক জড়িত হৈ পৰিছে।
তদন্তকাৰী আৰক্ষী বিষয়াসকলে দাবী কৰে যে সোমবাৰে পুৱা গ্ৰেপ্তাৰ হোৱাৰ পিছত প্ৰথমে সোণমে তেওঁক অপহৰণ কৰা বুলি দাবী কৰিছিল। পিছত অপহৰণকাৰীয়ে তেওঁক উত্তৰ প্ৰদেশৰ গাজীপুৰত এৰি থৈ যায়। গাজীপুৰ-বাৰানসী পথৰ এখন ধাবাৰ পৰা পৰিয়ালৰ লোকক ফোন কৰি অপহৰণৰ বিষয়ে অৱগত কৰে। সোমবাৰে সোণমে কেতিয়া সেই বক্তব্য দিছিল সেই কথা আৰক্ষীয়ে ৰেকৰ্ড কৰি ৰাখিছে।
উত্তৰ প্ৰদেশ আৰক্ষীৰ এডিজি (আইন শৃংখলা) অমিতাভ যশে দাবী কৰে যে কেইঘণ্টামান পিছত সোনামে জেৰাৰ সময়ত নিজৰ বক্তব্য সলনি কৰে।
আৰক্ষী বিষয়াগৰাকীয়ে কয় যে সোণমে তেওঁক ড্ৰাগছ সেৱন কৰোৱা বুলি দাবী কৰিছিল। নিচাযুক্ত অৱস্থাত তেওঁক গাজীপুৰলৈ আনিছিল। জেৰাৰ সময়ত সোণমে কয় যে তেওঁ এই ঘটনাৰ বলি হৈছে। তেওঁ নিজেই ঘটনাৰ বলি। উত্তৰ প্ৰদেশ আৰক্ষীয়ে অভিযোগ যে সোণমে বাৰে বাৰে তদন্তকাৰীক বিপথে পৰিচালিত কৰিবলৈ চেষ্টা কৰি আছে।
এডিজি (আইন আৰু শৃংখলা) অমিতাভ যশে কয় যে সোণমে অতি কেঁচা কাম কৰিছে। তেওঁৰ পৰিকল্পনাত বহুতো ত্ৰুটি আছিল। তেওঁ ভাবিছিল যে তেওঁ ভুক্তভোগীৰ অভিনয় কৰি ৰক্ষা পৰিব। তেওঁ এইটোও ভাবিছিল যে যদি নিজৰ বিধ্বস্ত চেহেৰা আৰু মানসিক ‘বিকাৰগ্ৰস্ত অৱস্থা’ক ঢাল হিচাপে ব্যহাৰ কৰি তেওঁ পুলিচৰ আগত মিছা কথা কয়, তেন্তে তদন্তকাৰীয়ে তেওঁক ১০০ শতাংশ বিশ্বাস কৰিব।
কিন্তু পুলিচৰ কামৰ পদ্ধতিৰ বিষয়ে সোণমৰ কোনো ধাৰণাই নাই। সোণমে কেতিয়া আৰু কাক কি বক্তব্য দিছিল, সেই কথা পুংখানুপুংখভাৱে লিপিবদ্ধ কৰা হৈছে। নিজৰ জালত নিজেই আবদ্ধ হৈ পৰিছে সোণম।
আই পি এছ বিষয়াগৰাকীয়ে কয় যে উত্তৰ প্ৰদেশ আৰক্ষীয়ে সোণমক জেৰা কৰি আছে। ইয়াৰ কাৰণ হ’ল উত্তৰ প্ৰদেশৰ গাজীপুৰৰ পৰা সোণমক গ্ৰেপ্তাৰ কৰা হৈছিল। এই হত্যাকাণ্ডৰ লগত জড়িত থকাৰ অভিযোগত উত্তৰ প্ৰদেশৰ পৰা গ্ৰেপ্তাৰ হোৱা সকলৰো জেৰা অব্যাহত আছে।
কিন্তু মেঘালয় আৰক্ষীয়েও এই গোচৰৰ তদন্ত অব্যাহত ৰাখিছে। উল্লেখযোগ্য যে তাত পূৱ খাছি পাহাৰ জিলাৰ আৰক্ষী। সেই জিলাৰ এক দুৰ্গম অঞ্চলৰ পৰা ইন্দোৰৰ পৰিবহণ ব্যৱসায়ী ৰাজা ৰঘুবংশী তথা সোণমৰ স্বামীৰ মৃতদেহ উদ্ধাৰ কৰিছিল।
