সন্মুখত পঞ্চায়ত নিৰ্বাচনৰ প্ৰত্যাহ্বানৰ মাজতে নাগৰিকত্ব সংশোধনী বিধেয়কক লৈ ৰাজ্যখনত সৃষ্টি হোৱা প্ৰবল প্ৰতিবাদে চৰকাৰৰ নিদ্ৰা হৰণ কৰিছে। কৃষক মুক্তি সংগ্ৰাম সমিতি,জাতীয়তাবাদী যুৱ-ছাত্ৰ পৰিষদকে ধৰি ৭০টা জনগোষ্ঠীয় সংগঠনে নাগৰিকত্ব সংশোধনী বিধেয়কৰ বিৰুদ্ধে সংকল্প যাত্ৰাৰ অন্তত শুকুৰবাৰে বিশাল প্ৰতিবাদী কাৰ্যসূচী ৰূপায়ন কৰাৰ পাছতে মুখ্য মন্ত্ৰী সৰ্বানন্দ সোণোৱাল হঠাৎ দিল্লীলৈ যাত্ৰা কৰিছে।
আনহাতে, বিধেয়কখনৰ বিৰোধিতাৰে আছুকে ধৰি ২৮টা জনগোষ্ঠীয় সংগঠন আৰু নেছ’ই আন্দোলনৰ কাৰ্যসূচী ঘোষণা কৰিছে। এনে এক পৰিস্থিতিত নাগৰিকত্ব সংশোধনী বিধেয়কখনক লৈ বিজেপি নেতৃত্বাধীন চৰকাৰখন বিবুদ্ধিত পৰিছে। কিয়নো সন্মুখত পঞ্চায়ত নিৰ্বাচন আৰু লোকসভা নিৰ্বাচনৰ প্ৰত্যাহ্বান আহি পৰিছে।
এনে পৰিপ্ৰেক্ষিতত ৰাজ্যখনৰ বৰ্তমান পৰিস্থিতিৰ বিষয়ে দলৰ ৰাষ্ট্ৰীয় সভাপতি অমিত শ্বাহক অৱগত কৰিবলৈ মুখ্য মন্ত্ৰী সোণোৱালে শুকুৰবাৰে নিশা ৮ বজাত তাৎক্ষণিকভাৱে বিমানেৰে দিল্লীলৈ ৰাওনা হৈছে।
মুখ্য মন্ত্ৰীয়ে অমিত শ্বাহক সাক্ষাৎ কৰাৰ উপৰি গৃহ মন্ত্ৰালয়ৰ শীৰ্ষ বিষয়াৰ সৈতে ৰাজ্যখনৰ শেহতীয়া পৰিস্থিতি সন্দৰ্ভত এক বৈঠকত মিলিত হ’ব। তদুপৰি, সংসদৰ আগন্তুক শীতকালীন অধিৱেশনত যুটীয়া সংসদীয় সমিতিয়ে নাগৰিকত্ব সংশোধনী বিধেয়কৰ প্ৰতিবেদন দাখিল কৰাৰ বিষয়টো সম্পৰ্কতো সোণোৱালে আলোচনা কৰাৰ সম্ভাৱনা আছে।
মুখ্য মন্ত্ৰীৰ এই দিল্লী যাত্ৰাত ৰাজ্যৰ বিত্ত, গড়কাপ্টানী আৰু স্বাস্থ্য মন্ত্ৰী ড০ হিমন্ত বিশ্ব শৰ্মায়ো সংগ দিয়া বুলি জানিব পৰা গৈছে।
