খাদ্যৰ অভাৱৰ সমস্যা সমাধানৰ ক্ষেত্ৰত ভাৰতীয় খাদ্য নিগম (এফচিআই)ৰ তাৎক্ষণিক পদক্ষেপৰ অভাৱৰ ফলশ্ৰুতিত দক্ষিণ অসম, ত্ৰিপুৰা আৰু মিজোৰাম তীব্ৰ খাদ্য সংকটে দেখা দিয়াৰ সম্ভাৱনা আছে।
কাছাৰৰ এজন স্থানীয় ব্যক্তিয়ে অভিযোগ কৰিছে যে দক্ষিণ অসমৰ লগতে মিজোৰাম আৰু ত্ৰিপুৰাৰ কিছু অংশত সৃষ্টি হোৱা জৰুৰী পৰিস্থিতি এফচিআইয়ে উপলব্ধি কৰা নাই।
এফচিআইয়ে ৰাষ্ট্ৰীয় খাদ্য সুৰক্ষা আইন (এনএফএছএ) আৰু প্ৰধানমন্ত্ৰী গৰিব কল্যাণ যোজনাৰ (পিএমজিকেৱাই) অধীনত দৰিদ্ৰ হিতাধিকাৰীসকলৰ বাবে খাদ্যশস্য যোগান ধৰাৰ বাবে সক্ৰিয় পদক্ষেপ গ্ৰহণ কৰা নাই বুলিও অভিযোগ কৰিছে স্থানীয় লোকজনে।
সূত্ৰ অনুসৰি এফচিআইয়ে অসমৰ একাধিক ডিপোৰ পৰা খাদ্যশস্য যোগান ধৰাৰ বাবে নিবিদা আগবঢ়াইছে যদিও বৰ্তমান পৰ্যন্ত এই বিষয়ত কোনো চূড়ান্ত সিদ্ধান্ত গ্ৰহণ কৰা হোৱা নাই।
এফচিআইয়ে বৰ্তমান কেৱল গুৱাহাটীৰ উপকণ্ঠত অৱস্থিত চাংসাৰীস্থিত ডিপোৰ পৰাহে খাদ্য সামগ্ৰীৰ যোগান ধৰি আছে।
জৰুৰীকালীন অৱস্থাৰ প্ৰতি লক্ষ্য ৰাখি অসমৰ একাধিক ডিপোৰ পৰা খাদ্যশস্য যোগান নধৰিলে এই অঞ্চলকেইটাৰ বাসিন্দাসকল তীব্ৰ খাদ্যৰ অভাৱৰ সন্মুখীন হ’ব বুলি অনুমান কৰা হৈছে।
উল্লেখ্য যে শেহতীয়া বান আৰু ভূমিস্খলনৰ বাবে দক্ষিণ অসমৰ বৰাক উপত্যকা আৰু ডিমা হাচাও জিলাৰ লগতে চুবুৰীয়া ত্ৰিপুৰা আৰু মিজোৰামৰ সৈতে সংযোগ প্ৰায় বিচ্ছিন্ন হৈ আছে।
শেহতীয়া এই বান আৰু ভূমিস্খলনে অসম আৰু মেঘালয়ৰ একাধিক স্থানত ৰাস্তাৰ লগতে ৰে’লপথৰো বিস্তীৰ্ণ ক্ষতি সাধন কৰিছে। ডিমা হাচাও জিলাৰ বিভিন্ন স্থানতো ভূমিস্খলনৰ ফলত পথৰ লগতে ৰে’ল সংযোগ ব্যাহত হৈছে।
লামডিং-বদৰপুৰ শাখাত ৰেলপথত ভূমিস্খলন আৰু বানৰ ফলত বৰাক উপত্যকা, মণিপুৰ, ত্ৰিপুৰা আৰু মিজোৰামলৈ ৰে’ল যোগাযোগ বন্ধ হৈ পৰিছে।
আনহাতে মেঘালয়ৰ পূব জয়ন্তীয়া পাহাৰ জিলাত ভূমিস্খলনৰ ফলত মিজোৰাম আৰু ত্ৰিপুৰাৰ বৰাক উপত্যকাৰ কিছু অংশলৈ যোগাযোগ বিচ্ছিন্ন হৈ পৰিছে।
এনে পৰিস্থিতিত মিজোৰাম আৰু ত্ৰিপুৰাৰ কিছু অংশৰ উপৰিও দক্ষিণ অসমত জৰুৰী পৰিস্থিতিৰ সৃষ্টি হৈছে আৰু খাদ্যশস্যৰ তাৎক্ষণিক প্ৰয়োজন আছে।
গতিকে এফচিআই- এ জৰুৰীকালীনভাৱে খাদ্য শস্য যোগানৰ ব্যৱস্থা নকৰিলে এই অঞ্চলকেইটাত তীব্ৰ খাদ্য সংকটে গা কৰি উঠাৰ সম্ভাৱনা বৃদ্ধি পাইছে।