দক্ষিণ ভাৰতীয় চলচ্চিত্ৰ জগতৰ জনপ্ৰিয় অভিনেত্ৰী অনুষ্কা শ্বেট্টীৰ অনুৰাগীসকল তেওঁৰ ব্যক্তিগত জীৱনৰ প্ৰতি অন্তহীন কৌতুহলী। বিশেষকৈ ‘বাহুবলী’ চিনেমাখনৰ আকাশলংঘী সফলতাৰ পাছত পৰ্দাত তেওঁৰ চৰিত্ৰ ‘দেৱসেনা’ই দৰ্শকৰ হৃদয়ত নিগাজী স্থান দখল কৰিছে, আৰু পৰ্দাৰ বাহিৰত প্ৰভাসৰ সৈতে তেওঁৰ কেমিষ্ট্ৰীৰ চৰ্চাও কম হোৱা নাই।
দক্ষিণ ভাৰতৰ মেগাষ্টাৰ প্ৰভাসৰ সৈতে অনুষ্কা বিবাহপাশত আবদ্ধ হ’ব পাৰে বুলি বহুদিনৰ পৰা চৰ্চা চলি আছিল। অৱশ্যে সকলো জল্পনা-কল্পনাৰ অন্ত পেলাই তেওঁৰ বিয়াৰ খবৰে নতুন চৰ্চাৰ বাট লৈছে।
মুম্বাইৰ সংবাদ মাধ্যমৰ সূত্ৰ অনুসৰি ৪২ বছৰীয়া সুন্দৰী অভিনেত্ৰীগৰাকীয়ে প্ৰভাসৰ সৈতে নহয়, এগৰাকী প্ৰখ্যাত ব্যৱসায়ীৰ সৈতে জীৱনৰ পৰৱৰ্তী অধ্যায় আৰম্ভ কৰিবলৈ ওলাইছে।
জানিব পৰা মতে অনুষ্কাৰ পৰিয়ালে দৰা নিৰ্বাচন কৰিছে। কোৱা হৈছে যে এইটো ‘এৰেঞ্জ মেৰেজ’ হ’বলৈ গৈ আছে। যদিও দৰাৰ নাম বা পৰিচয় এতিয়াও কঠোৰ গোপনীয়তাৰ মাজত ৰখা হৈছে, তথাপিও ঘনিষ্ঠ সূত্ৰই প্ৰকাশ কৰিছে যে তেওঁ এগৰাকী ডাঙৰ ব্যৱসায়ী।
দীৰ্ঘদিন ধৰি অনুষ্কা আৰু প্ৰভাসৰ সম্পৰ্কক লৈ ছ’চিয়েল মিডিয়াত বহু চৰ্চা চলি আহিছে। তেওঁলোকৰ অন-স্ক্ৰীণ কেমিষ্ট্ৰী দেখি অনুৰাগীসকলে একপ্ৰকাৰ নিশ্চিত হৈছিল যে তেওঁলোক বাস্তৱ জীৱনতো দম্পতী হ’ব। আনকি কেইবাবাৰো তেওঁলোকৰ এংগেজমেণ্টৰ খবৰও আহিছিল।
অৱশ্যে প্ৰতিবাৰেই এই দুয়োগৰাকী তাৰকাই দাবী কৰি আহিছে যে ইজনে সিজনৰ কেৱল ‘ভাল বন্ধু’। এতিয়া অনুষ্কাৰ বিয়াৰ সিদ্ধান্তৰ লগে লগে নিমিষতে দীৰ্ঘদিনীয়া জল্পনা-কল্পনাৰ অন্ত পৰিল।”
জানিব পৰা মতে, অনুষ্কাই সদায় পিতৃ-মাতৃৰ পছন্দক অগ্ৰাধিকাৰ দিয়ে। সেয়ে পৰিয়ালৰ আলোচনাৰ জৰিয়তে বিয়াৰ সিদ্ধান্ত লোৱা হৈছিল। বিয়াৰ প্ৰস্তুতিও আন্তৰিকতাৰে আৰম্ভ হৈছে। বৰ্তমান অনুষ্কাই নিজৰ কিছুমান ছবি শেষ কৰাত ব্যস্ত হৈ আছে যাতে বিয়াৰ বাবে যথেষ্ট সময় পায়।
অনুষ্কাৰ ঘনিষ্ঠ মহলৰ মতে, এই ভাল খবৰটো হয়তো অতি সোনকালে অনুৰাগীসকলৰ আগত আনুষ্ঠানিকভাৱে ঘোষণা কৰা হ’ব। অৱশ্যে এই খবৰটো প্ৰভাসৰ অনুৰাগীৰ বাবে অলপ দুখজনক হ’লেও অনুষ্কাৰ নতুন জীৱনৰ কামনাৰে ভৰি পৰিছে ইণ্টাৰনেট। এতিয়া, ‘দেৱসেনা’ই নিজৰ ৰাজকুমাৰক সকলোৰে আগত চিনাকি কৰাই দিয়াটো মাথোঁ সময়ৰ অপেক্ষা।
