চলিত লোকসভাৰ বাজেট অধিৱেশনত শাসক আৰু বিৰোধীৰ মাজৰ সংঘাত তুংগত উঠিছে। সোমবাৰে কংগ্ৰেছ দলে কেন্দ্ৰীয় চৰকাৰৰ বিৰুদ্ধে সংসদত বিৰোধীৰ কণ্ঠৰুদ্ধ কৰাৰ গুৰুতৰ অভিযোগ উত্থাপন কৰে। লোকসভাৰ অধ্যক্ষ ওম বিৰলাই পক্ষপাতিত্বমূলক আচৰণ কৰা বুলি দাবী কৰি কংগ্ৰেছ নেতৃত্বই এতিয়া অধ্যক্ষগৰাকীৰ বিৰুদ্ধে অনাস্থা প্ৰস্তাৱ অনাৰ সম্ভাৱনাও প্ৰকট কৰি তুলিছে। সংসদৰ মজিয়াত বিৰোধী দলপতি ৰাহুল গান্ধীক নিজৰ বক্তব্য ৰাখিবলৈ সুযোগ নিদিয়াৰ অভিযোগক কেন্দ্ৰ কৰি সৃষ্টি হোৱা এই উত্তপ্ত পৰিস্থিতিয়ে দেশৰ সংসদীয় ইতিহাসত এক নতুন পাক লৈছে।
কংগ্ৰেছ সাংসদ কে. চি. বেণুগোপালে অভিযোগ কৰে যে লোকসভাৰ বিৰোধী দলপতি ৰাহুল গান্ধী আৰু অন্যান্য বিৰোধী নেতাসকলক সদনত নিজৰ মতামত প্ৰকাশ কৰিবলৈ দিয়া হোৱা নাই। বিপৰীতে, চৰকাৰী পক্ষই যিকোনো কথা ক’ব পাৰে আৰু আনকি বিৰোধী সদস্যৰ বিৰুদ্ধে “অপমানজনক মন্তব্য”ও কৰিব পাৰে।
অধ্যক্ষ বিৰলাৰ বিৰুদ্ধে অনাস্থা প্ৰস্তাৱ অনাৰ সম্ভাৱনা সম্পৰ্কে সোধা এক প্ৰশ্নৰ উত্তৰত বেণুগোপালে কয়, “সংসদত কি ঘটিছে সেয়া আপোনালোকে দেখিছে। এই অধিবেশনত বিৰোধী দলপতি ৰাহুল গান্ধীক সদনত একো ক’বলৈ দিয়া হোৱা নাই।”
সংসদ ভৱনৰ চৌহদত সাংবাদিকৰ সৈতে হোৱা বাৰ্তালাপত বেণুগোপালে লগতে কয়, “চৰকাৰী পক্ষই যিকোনো কথা ক’ব পাৰে। তেওঁলোকে যিকোনো ব্যক্তিকে আক্ৰমণ কৰিব পাৰে, আনকি জীৱিত নথকা লোকৰ বিৰুদ্ধেও অপমানজনক কথা ক’ব পাৰে। অধ্যক্ষই কংগ্ৰেছৰ মহিলা সাংসদসকলৰ বিৰুদ্ধে অভিযোগ উত্থাপন কৰিছে। এই সদনত বিৰোধীৰ বাবে কোনো স্থান নাই।”
তেওঁ আৰু কয়, “বিৰোধী দলপতি হওক বা অন্যান্য বিৰোধী নেতাই হওক, তেওঁলোকক কথা ক’বলৈ অনুমতি দিয়া হোৱা নাই। বিৰোধীৰ প্ৰতি এনেধৰণৰ আচৰণ আগতে কেতিয়াও হোৱা নাছিল।” বিৰোধীয়ে এনে প্ৰস্তাৱ আনিব নেকি বুলি সোধাত তেওঁ কয় যে সমগ্ৰ বিৰোধী ঐক্যবদ্ধ আৰু “পদক্ষেপ লোৱাৰ পিছতহে আপোনালোকে জানিব পাৰিব।”
অনাগত দিনবোৰৰ বাবে এক যৌথ ৰণনীতি প্ৰস্তুত কৰিবলৈ আজি পুৱা সংসদ ভৱনৰ চৌহদত কংগ্ৰেছ সভাপতি মল্লিকাৰ্জুন খাৰ্গেৰ কক্ষত বিৰোধী দলসমূহৰ সদনৰ দলীয় নেতাসকলৰ এখন বৈঠক অনুষ্ঠিত হৈছিল।
উল্লেখ্য যে, এক অভূতপূৰ্ব পৰিস্থিতিত যোৱা বৃহস্পতিবাৰে বিৰোধীৰ তীব্ৰ শ্ল’গান আৰু প্ৰতিবাদৰ মাজতে প্ৰধানমন্ত্ৰীৰ পৰম্পৰাগত উত্তৰ অবিহনেই লোকসভাত ধন্যবাদ সূচক প্ৰস্তাৱ গৃহীত হৈছিল।
ইফালে, লোকসভাৰ অধ্যক্ষই যোৱা বৃহস্পতিবাৰে ক্ষোভ প্ৰকাশ কৰি কৈছিল যে তেওঁৰ ওচৰত “নিশ্চিত তথ্য” আছিল যে কংগ্ৰেছৰ বহু সদস্যই প্ৰধানমন্ত্ৰী নৰেন্দ্ৰ মোদীৰ আসনৰ ফালে আগবাঢ়ি গৈ “অঅপ্ৰত্যাশিত কিবা কাণ্ড” কৰাৰ সম্ভাৱনা আছিল। সেইবাবেই তেওঁ প্ৰধানমন্ত্ৰীক ৰাষ্ট্ৰপতিৰ ভাষণৰ ধন্যবাদ সূচক প্ৰস্তাৱৰ উত্তৰ দিবলৈ সদনলৈ নাহিবলৈ অনুৰোধ জনাইছিল। অধ্যক্ষগৰাকীয়ে মত প্ৰকাশ কৰে যে যদি এনে ঘটনা ঘটিলহেঁতেন, তেন্তে দেশৰ গণতান্ত্ৰিক পৰম্পৰা ধূলিস্যাৎ হ’লহেঁতেন।
অৱশ্যে, কংগ্ৰেছ নেত্ৰী প্ৰিয়ংকা গান্ধী ভাদ্ৰাই সাংবাদিকৰ আগত প্ৰতিক্ৰিয়া ব্যক্ত কৰি কয় যে প্ৰধানমন্ত্ৰীক আঘাত কৰাৰ কোনো পৰিকল্পনা আছিল বুলি কৰা দাবীটো “সম্পূৰ্ণ মিছা”। তেওঁ অভিযোগ কৰে যে প্ৰধানমন্ত্ৰী মোদীয়ে অধ্যক্ষৰ আৰঁত “আত্মগোপন” কৰিছে।
